دەستپێکرنا ھەوا ھەلبژارتنان دەستپێکەک زور باشە بو ھندێ جارەک دیتر سازیێن گرنگێن ھەرێمێ شەرعیەتێ وەربگرنەڤە و باوەری ناڤبەرا خەلک و حکومەتێ موکم ببیت و ئەو وەزراەتێن ب وەکالەت و بێ وەزیر ژی د ئێنە رێڤەبرن ببنە خوەدی وەزیرێن خودان پسپوری و پلانێن ستراتیجی و بو ھندێ خزمەتگوزارێن پێـتڤی بو خەلکی بێنە بجە ئینان, تایبەتی ل ڤێ قوناغێ دا کو ڤالاتیەک ل سەروکاتیا ھەرێمێ دا ھەی وەک پوستەکێ یاسای و دەستور و سیاسی و رەمزێ ھەرێمێ , ھەروەسا بەرەف ئاڤاکرنا حکومەتەکا نوی ل عیراقێ ڤە دچین کو ئاڤاکرنا وێ ھەتا نھا ھەمبەری پازدە سالێن رابوری زور ئاسێ بویە و بدیتنا من ژی ئاڤاکرنا وێ دێ دیرکەڤیت و ھوسا ب ساناھی نە تێتە ئاڤاکرن و نە ب وان کەسان ژی تێتە ئاڤاکرن کو دسەرێ خەلکێ عیراقێ دانە و ھەمی سەرفرازیێن عیراقیان بو خو ڤەدگێرن!.د ئاستێ دەرڤە ژی دا کورد پێتڤی ب ڤەگەراندنا پێگەھێ خوەنە و ئەڤ چەندە ژی ب رێڤەچونا ھەلبژارتنێن پاکژ و بێ تەزویر و دیف ستاندەردێن جیھانی و بەرھەم د ئێن , ب ئەنجامدانا ڤێ پروسێ حکومەتەک دئێتە روژەڤێ کو بشێت کریزێن چوی ب رە و ریشالین ڤە چارەسەر بکەت و کو خەلک بو دەمێ چارسالێن رابوری کەفتبونە گرانترین کریز , ئەڤ کریزە ژی ھەر ھوسا و بێ پلان چارەسەر نابن بەلکی ب پلانەک موکم و ستراتیجی و ب ئیرادەکا نەتەوەی و دیر ژ نەفسیەتا حزبی و دژایەتیا گەندەلیێ دئێتە بەرھەم .
د ھەمی شورەش و بزاڤێن کوردی دا ئارمانجا دوژمنی ناڤبرنا گەلێ کورد بویە بێ ھزر بکەت ئەڤە یێ رەشە و یێ دیتر یێ سورە و ئەوێ ھە یێ سپی یە, بەروڤاژی ڤێ چەندێ کورد واتا دوژمنێن وانا ! ھەتا گەھشتە تیرورستێن داعش ژی خوەدی ھەمان نەرینا دەولەتێن داگیرکەرێن دەڤەرێ بون و ئانکو جوداھیا دین و مەزھەب و ئایدیایێن جودا کاریگەری ل سەر رەتکرنا کوردان نەکریە ژ ئالیێ دوژمنان ڤە. ئەگەر کوردان ھزر ژی کربیت کو دوژمن جوداھی دئێخیتە ناڤبەرا واندا ل سەر ھەلویستەکێ نەرم و خیانەتەکێ ھەمی خیال و ئاشوپە و چو ئەسل و ئەساس بونینە و ل ریدانێن دیروکێ دا زور جاران بو مە دیار بویە و شازدێ ئوکتوبەرێ ھەمی ئینا بەر چاڤێن مە دووبارە و ئەوا ل سەر کاغەزان دانە بەرچاڤێن مە. لەوما فەرە کورد بەردەوام ھزر ل چارەنڤیسێ ھەفپشک بکەت ل خوشی و نەخوشیان دا و بەرفرەھی و بەرتەنگیان دا , زێدەبارێ ھەبونا دەھان جوداھیێن ھزری ژی کو ب کارەک نورمال دئێتە ھژمارێ ل دونیایا سیاسەت و ھەڤرکیا سیاسی و بدەست ئینانا باوەریا پرانیا خەلکی, لێ نابیت بگەھیتە لێدن ل سنورێن ئێمناھیێ نەتەوەی کو ھێلا سورە.
بانگەشا ھەلبژارتنان د ڤێ قوناغا کو ب راستی سەردەمێ (بھێز یێ بێھێزی دخوت) ل روژھەلاتا ناڤین و بەرێ دوژمنێن کورد ل ھەر چار ئالیان ل ئەزمونێ حوکمرانیا کوردی سەرەرایێ ھەبونا دەھان کریز و کێم و کورتیان لێ بەردەوام پێوکلا ھندێ دکەن دەست وەردانێ بکەن و مەترسیی د ھەمی ئالیەکێ ڤە پێخنە سەر کوردستانێ ئەڤ چەندە ژی ل توپبارانێن ھەرێمی ب روونی دیار دبیت. ژ بەر ڤێ چەندێ ل سەر پارت و لایەنێن کوردستانیە وەک ئەرکەک نەتەوەی و ئایینی و نیشتیمانی و ئەخلاقی ب ھەمی شیان کار بکەن بو ھندێ پروسا ھەلبژارتنان ب جوانی و ئارامی و بێ کریز بداوی بێت . ئەو تابلویێ کو بدرێژاھیا دیروکی بو کوردان بویە ناڤ ھەتا نھا ژ پێکڤەژیانێ و رێزگرتنا بەرامبەر بمینیت و بەرەف پێش ڤە ببەت و بانگەشێ و ئەنجامان ژی ب دلەکێ بەرفرەە قەبول بکەن.
پشتی ریدانێن شازدێ ئوکتوبەرێ و ئەو سەروبەرێ ئالوزێ بدیف دا ھاتی ل ھزرا چو کەس و ئالیەکێ نەبو ژ دوست و دوژمنان ئیدی روژەک دێ ئێت جارەک دیتر کورد دێ زڤرن بو پروسەیەکا دیموکراسی و ئێمناھی دێ ل ھەرێمێ بەرقرار بیت و پێگەھێ بھێزێوێ دێ زڤریت و کریز سڤک و دەرباز ببیت و پەیوەندیێن دەرڤە دێ ب ھێزتر بن . ئەڤ چەندە ب پێکولێن حکومەتا ھەرێما کوردستانێ تایبەت سەروکێ حکومەتێ نێچیرڤان بارزانی و بەرەڤانی و خوراگریا خەلک و پێشمەرگەیێ کوردستانێ ھاتە روژەڤێ . لەوما میللەتێ کورد ل ھەمی جیھانێ چاڤ و دلێ وان ل ڤێ پارچا ئازاد و سەربەخویە کو ئیدی بەرژەوەندیێن حزبی و کەسی و بنەمالەی چارەنڤیسێ وێ بەرەف قوناغێن تاری و پری کریز و شەرمزاری و خیانەت نەبن بەلکو فەرە دەرفەت ل کریزێن عیراقێ و دەڤەرێ بێتەوەرگرتن و بو بھێزکرنا کوردستانێ و ھەروەسا زورگرنگە ئەو شاشی و خیانەت و نەبونا ئارمانجەکا ھەفپشک د دیروکا کەڤن و ھەتا یا نوی و ھەفچەرخ ژی دا ببیتە ھەڤێنێ برایتی و ئێکگرتن و ئێکرێزی و ھزرکرن ل چارەنڤیسێ ھەفپشک.