رەخنەگرتن ل کەتوارێ ھەیی و پێشکێش کرنا ئەلتەناتیفەک ھەژی و باش و مفادار , وەرگرتنا مەزنترین بەرپرسیاریەتی و ئەرک و خزمەت و کارە ل دەف نڤیسەر و خاندنەڤان و روشنبیرێن وەلاتی . لێ مخابن رەخنەگرتن و پێشکێش کرنا بەدیلێ باشتر و پێشنیارێن راست ژی وەکی دەھان پرسێن دیتر کەفتیە ناڤ کێشمە کێشا سیاسی و ھەڤرکیا تەسکا حزبایەتی و کەسی و بەرژەوەندیێن ئابوری.
ھەبونا ھژمارەک زور ژ خوەدیێ قەلەم و ئالیێن سیاسی و کەسێن سەربەخو ژی پروسا سیاسی د ھەمی بیاڤەکێ دا بەرەف پێش دبەتو زەنگینتر لێ دکەت , لێ یا جھێ سەر راوەستیانێ و سەرنجا ئەکادیمیست و خوەدی ویژدانان ئەوە کو تو رەوشێ ! وەکی تابلویەکێ رەش و رەش یان وەکی کەلێ بەفرێ سپی ببینی! و ھەمی گروڤەیان گوری نەرین و دیتن و بەرژەوەندیا خوە بکەی و ل راستیێ دور بکەڤی و ببیە بەندێ ھزر و بەرژەوەندیێن خوەیێن کورە.
ئەڤ گوتارا من پشتی وێ چەندێ ھات کو ھندەک کەسان ھەمی چاکیێن سازیێن حکومی ب خراب وەسف دکەن تایبەت د نھا دا کو سوپاس بو خودێ پروژەیان ب رێژەیەکا بەرفرەە دەستپێکریە و ئایندەیەک گەشتر د رێدایە س, ھەر وەکی دگوت (ئەوا ل سەر خرابی بنیات کربیت خراب و باتلە!) ئەرێ ئەوا د روژەڤێ دا ھەمی باتلە ؟! ب ھیچ ئاوایەکێ نابیت خوەدی قەلەمەک ھەبیت ئەڤێ ھەرێما ئەم وەکی گزیرتەک ژ ئارامیێ ددەینە نیاسین د ناڤا دەریایەک ژ کوشتن و تیرور و خوینرێشتنێ ب سفرێ ھەڤبەر بکەت. لێ دھەمان دەمدا نابیت ئەوێن کو ل سەر رەوشێ دنڤیسن و بەرەڤانیێ ژێ دکەن کەتوارێ مە ب بھەشتا سەر ئەردی وەسف بکەن.
بو ھندێ دناڤبەرا رەش و سپی دا رەنگێن دیژی ببینین فەرە د گوتار و گوتن و نڤیسانێ، خوەدا ئیماژێ ب چەند خالێن گرنگ بکەین کو د خزمەتا وێ رەوشێ بن ئەوا ب خوینا شەھیدان بەرھەم ھاتی و ب دبلوماسیەتا سەرکەفتیانە ھاتیە پاراستن پشتی وێ کریزا کو ئارمانج ژێ نەھێلانا ڤی کیانێ سیاسی و دەستوری بو .
- بو ھندێ د بەرامبەر خوینا شەھیدان و خەباتا پێشمەرگەین قەھرەمانو کوردسنتانیێن خوراگر سەربلند و بێ وەفا دەرنەچین , فەرە د گوتارێن خوەدا ھێلا نەتەوەی و نیشتیمانی و پرسێن گرێدای ب ئاسایشا نەتەوەی گرنگیێ پێ بدەین .
- ھەروەسا بو ھندێ وەلاتەک ئاڤەدان تر و ب ھێزتر ئاڤا ببیت بەردەوام فەرە گرنگیی ب وان چالاکی و کارێن حکومەتێ بێتە دان . ئەگەر پار سال بکەین نموونە و ل ھزرا دوست و دوژمنێن کوردا دا نەبو کوردستانەک دێ ھەبیتەڤە بیتە قیبلەتا وەفدێن سیاسی بو کوردستانێ. کەسێ ھزر نەدکر دێ کوردستان پێگەھێ خو زڤرینیت . کەسێ نەدانابی دێ ئابوری باشتر ژێ ئێت . د ڤێرەدا ویژدان دبیتە دادڤان و بریارێ ل سەر رەوشێ ددەت .
- ھەروەسا کارێ گرنگ تایبەت بو روشنبیران پێشکێش کرنا پێشنیار و رەخنێن ھەژی و مفادار و بنیاتنەرن , بو ھندێ ھەمی تاکێن جڤاکی مفای ژێ وەربگرن د گەل حکومەتێ.
ب ھەبونا ڤان خالان دگەل چەند تێبینی و خالێن دیتر ھەمی تاکەک ژ وان گوتار و نڤیسین و بەرنامەیان مفادار دبیت و ل داویێ ژی حکومەتەک بھێز ئاڤا دبیت کو شیانێن پاراستنا ھەمی تاکەکێ ھەبیت و مفای بو خوەدی مافی ڤەگەرینیت. لێ ئەگەر بەروڤاژی بو رەوش ب دوو رەنگ بتنێ ھاتنە دیتن ژ بال خەلکێ گشتی و سیاسی و روشنبیران ڤە وی دەمی ,نە ب باشیێ بدروستی دئێتە گوتن دەست خوش و سەرکەفتی بی ! نە ب خرابیێ ژی دئێتە گوتن ستوپ و بەسە ئەوا تو دکەی دەرئەنجامێن خراب ھەنە و ئەڤ وەلاتە کەشتیەکە و ب نقومبونا وێ ئەم ھەمی ژ ناڤدچین ! باش و خراب خوەدی ئالیگر دبن و ل ئەنجامێ ڤێ چەندێ دەست وەردانێن بیانی و بێ ھیڤیبونا جڤاکی تایبەت گەنجان و تێکچونا رەوشێ و حکومەت ژی ل باش و خرابان وەردبیت و ھەمی پرسەک دبیتە مزایدەیا سیاسی و حزبی .
لەوما فەرە ل داویێ بیرا خوە ژ خەونا ئەحمەدێ خانێ بینین و دەمێ د گوت (گەر دی مە ھەبا ئیتیفاقەک ...) ب راستی ژی ئیتیفاقا مە سەرێ ژووری نەبیت وی دەمی ئەم دێ ل جھێ سور و زەر و کەسک و شین ..تنێ رەش و سپی بینین و دەرگەە دێ ل سەر پشتێ بن بو ھەمی نەخوشی و دەردەسەریەکێ.