پشتی رێزدار نێچیرڤان بارزانی سەرۆکێ حکومەتا ھەرێما کوردستانێ ، پشکەکا دەسھەلاتێن سەرۆکێ ھەرێما کوردستانێ وەرگرتی . ژبلی گاڤێن سەرکەفتی ژلایێ دبلۆماسی و ئابووری و جڤاکی یێن جەنابێ وی ، ژلایێ سیستەمێ دیموکراسی ژی گاڤێن باش دھێنە ھاڤێتن ، سیستەمێ دیموکراسیێ ھەرێما کوردستانێ ، لڤان سالێن بووری ، روویێ گەشێ ھەرێما کوردستانێ ب خەلک و دەسھەلات ڤە نیشا جیھانێ دایە و ڤێ چەندێ پشتەڤانیا جیھانێ بۆ کوردستانێ راکێشایە و بوویە نمۆنێ دەسھەلاتا دیموکراسی ل دەڤەرێ . پرۆسا ھەلبژارتنان بھێزترین بنەمایێ دیموکراسیێ یە ، ھەرێما کوردستانێ بن سیبەرا ڤی سیستەمی بوویە ئەناگەھا پێکڤە ژیانێ و پاراستنا مافێن مرۆڤی ب ھەمی ئۆل و مەزھەب و بیر و ڕاڤە .
ژبووی پتر ئویتەدا بڤی سیستەمی و گەرشتر کرنا روویێ گەشێ ھەرێما کوردستانێ بەرامبەر جیھانێ ، سەرۆکێ حکومەتا ھەرێما کوردستانێ دەسھەلاتا خۆ بکار ئینایە بۆ ئەنجامدانا ھەلبژارتنێن گشتی یێن ھەرێما کوردستانێ ل ٢٥ ێ ئیلۆنێ و پارتی دیموکراتا کوردستانێ ژی ب تەمامی دگەل ئەنجامدانا ڤان ھەلبژارتنان دایە لدەمێ دیارکری و تەکەزیێ لسەر دکەت . چونکی پارتی وەک پارتەکا دیموکراسی ھاتیە دامەزراندن و ھەردەم داکۆکی لسەر بجە ئینانا بنەمایێن دیموکراسیێ بوویە .
لێ مخابن ھژمارەکا حزبێن کوردستانێ یێ خۆ ل پارتی دیموکراسی تر دیار دکەن ب رەنگەکێ نەراستە خۆ ھەولا پاشئێخستنا ھەلبژارتنان ددەن ، لدەمی دا ھەتا نھو ئەو حزب پارتی ب پارتیەکا نەدیموکراسی و پاشکەفتی دبینن ..! ، ئەگەر راستە ھون دیموکراتخوازن کەرمکەن ئەڤە گەز و ئەڤ مقەس ، ب رەنگەکێ ئاشتیانە و دیموکراسیانە وەرنە د گۆرەپانا سیاسی و ئیداریا ھەرێما کوردستانێ و دگەل ئەنجامدانا ھەلبژارتنان دا بن و بریارا دووماھیێ بلا دەستێ خەلکێ کوردستانێ دا بیت .
چونکی چ بەھانە بۆ پاشئێخستنا ھەلبژارتنێ، کوردستانێ نینە و دەمێ ڤان ھەلبژارتنان ژی بسەرڤە چوویە ,
ئەگەر حزبێن سیاسی یێَن ھەرێما کوردستانێ بڤێت روویێ گەشێ ھەرێمێ نیشا جیھانێ بدەن و پشتەڤانیا سیاسی بۆ زێدەتر ببیت ، دێ پالپشتیا ئەنجامدانا ھەلبژارتنان کەن .
لێ دیارە ئەو حزبێن دڤێت ئەڤ ھەلبژارتنە بھێنە پاشئێخستن ، یا ل رابردوویێ خۆ ددتر بەرامبەر خەلکێ کوردستانێ ، لسەر کار و رەفتار و درۆشمێن خۆ یێن بریقەدار و بێ ئەنجام ، یان ژی باوەر ب دیموکراسیەتێ نیە ، یان ژی نەڤێت پێگەھێ ھەرێما کوردستانێ لسەر ئاستێ جیھانێ بھێزتر بکەڤیت . نەخاسمە پشتی لسەر دەستێ پارتی دیموکراتی کوردستان و سەرۆکێ حکومەتا ھەرێما کوردستانێ پیلانێن وان ھاتینە ھەلوەشاندن بۆ لاوازکرنا پێگەھێ ھەرێما کوردستانێ و پشتی خیانەتا ١٦ ێ ئکتۆبەرێ شیای نە تنێ ھەرێما کوردستانێ ب پارێزن بەلکی لسەر ئاستێ جیھانێ پشتەڤانیا سیاسی و ئابووری و لەشکری بھێز کریەڤە و پرانیا قەیرانان چارەسەر کری و بەردەوامیا ڤان گاڤێن سەرۆکێ حکومەتا ھەرێمێ لدەمەکێ نێزیک دا قەیران نامینن و پرۆسا سیاسی و ئیدای و ئابووری دێ بھێزتر کەڤیت .
بتایەت پشتی ڕەوشا عیراقێ و وەلاتێن جیران بەرەڤ قەیرانێن کۆر دچیت و ناکۆکیێن دژوار دناڤبەرا وان و ئەمریکا و ھەڤپەیمانێن سەرھەلدای ، چونکی ئەڤ ناکۆکی و قەیرانە ، دێ پالپشتیا ئەمریکا و ھەڤپەمانێن وێ بۆ ھەرێما کوردستانێ زێدەتر بن .
گرنگە پارتی و حکومەتا ھەرێما کوردستانێ رێ نەدەت پرۆژێ ڤان حزبان بۆ پاشئێخستنا ھەلبژارتنا سەربگریت ، چونکی پاشئێخستنا وان دڤان کودانان دا دێ بیتە جھێ پسیارێ بۆ جڤاکێ نیڤ دەولەتی و پرۆسا دیموکراسیا ھەرێما کوردستانێ دێ لەنگەر بیت ، ڕەنگە مەبەستا وان ژی ھەر ئەڤە بیت ..! و پاشا پارتی و حکومەتا ھەرێما وەک دەسھەتا ئێکێ پێ تاوانبار بکەن ، ھەر وەکی ل دەمێن بووری ، ل ھەمی کێماسی و قەیرانان پارتی تاوانبار کریە و خۆ کریە شریکێن ھەمی دەسکەفت و سەرکەفتنان .
ئەز باوەرم کۆ ئەو ژی دزانن ، خەلکێ کوردستانێ ژی ڤان راستیا دزانیت لەوما نەوێرن بریارا دووماھیێ بێخنە ددەستێ خەلکێ کوردستانێ دا .