ژیوارێ نھا کوردستان پێدا دەرباز دبیت سەد و ھەشتێ پلەیان جودایە ژ وی دەمی کو مەرج ب گوترە ل سەر دھاتنە بجە ئینان ! پشتی ریدانێن شازدێ ئوکتوبەرێ . ئەڤرو کوردستان ل ئیراقێ دا خوەدی سەنگ و ھێز و کەساتیەک ھەژی رەوشێ یە کو دشیان دا ھەیە سەر و بنێن ھاوکێشێ بگوھریت و ھەر رەخێ تەرازیێ بچیتێ دێ ئالێ دی ژ ئەردی دەت , ئەگەر بەرەف گروپێ پشت گەرم ب ئەمریکا بچیت وی دەمی دێ سەروک وەزیرەک ئێتە د گورەپانا دەڤەرێ دا پتر جھێ رازیبونێ بیت و بەروڤا ژی ئەگەر بەرەف تەوەرێ پالپشت ب ئیرانێ ڤە چو رەوش دێ جودا بیت !
د ڤان سێ خالێن سەرەکی دا رەوشا سیاسی و ئابوری و دبلوماسی باس ژێ دکەین کو نھا زور گرنگە حکومەتا ھەرێمێ و ئالیێن سیاسی بو ڤی دەمی بجە بیننن :
(١)
بەرەف پێش برنا رەوشا ئابوری ل کوردستانێ دا , پشتی ئەو فاکتەرێن دەھان جاران مە ئیماژە پێدای ژ قوتکرنا بودجە و موچە و ھاتنا ئاوارە و شەرێ داعش و ئیدارەدانا خراب و نەبونا پلانێن ستراتیجی و زوریا رێژا فەرمانبەرێن دەولەتێ کوردستان ریبریێ کریزەک گران کر .سوپاس بو خودێ کو نھا بەرژەنگێن روون ھەنە بو دەربازکرنا ڤێ کریزا کو بدیتنا ھەر ئالیەکێ ئەگەر ئەڤ کریزە ژ ھەر وەلاتەکێ دیتربا رەنگە ببا ھوکارەک بو دەردەسەریان و ھەرفینا ئێک جارەکی , بەلێ خو راگریا کوردستانیان ژ ھەمی پێشبینیان ڤەدەر بو وکریز ھەتا رادەکێ دەرباز کرینە . نھا دەمێ بەرپرسێن حکومەتا ھەرێما کوردستانێ ژ ھەمی پلە و پوستەکێ باسێدەربازکرنا ڤێ کریزێ دکەن گەرماتیەک ڤەدگەریت بو خەلکی و بازاری . لێرە دا نابیت ب ھیچ ئاوایەکێ حکومەتا ھەرێما کوردستانێ تنێ ھزر ل سەر ھندێ بیت ڤێ کریزێ ب داوی بینیت ! بەلکی فەرە کار بکەن بو دیتنا ڤا دەرمانێ ڤێ کریزا ھندە مەزن کو چ نەمابوی کیانێ کوردستانێ ھەرفاندی . دەرمانێ ھەمیان باشتر ژی نەھیلانا گەندەلیێ و نەدادیێ و ئیدارەدانا خراب و دەست وەردانێن جودا جودانە ژ کارێن حکومەتێ . ھەروەسا دانانا پلانێن ستراتیجی کو کوردستان ئیدی ب پلان وەک وەلاتێن پێشکەفتی بەرەف پێش بچیت.
(٢)
رەوشا سیاسیا نافخو و ھەلبژاردن , بو ئاڤاکرنا حکومەتەکا نوی و سازیێن دەولەتێ فەرە ھەلبژاردن د دەمێ خوە دا بێنە کرن . پرانینا ئالیێن سیاسی د دەمەکێ دا داخازا ئەنجامدانا ھەلبژاردنان دکر نھا ب چ پیڤەر داخازا گیرو کرنا ڤێ پروسا ھندە گرنگ دکەن کو ب ئەنجامدانا ھەلبژاردنان ھێزەک نوی بو ھەمی رە و ریشالێن وەلاتی د زڤریت .لێرە دا ل سەر ھەمی ئالیێن سیاسیە کو ب ئێک دەنگ بەرەف ھەلبژاردنەک پاکژ و بێ تەزویر و مەدەنیانە و دیر ژ توند و تیژیێ بچن داکو وان ھەمی گومانان ل سەر پروسا سیاسی یا کوردستانێ لادەن کو چەند سالە بویە جھێ پرس و شروڤەیێن جودا .
(٣)
بەرەف بەغدا چون , پێک ئینانا حکومەتا نوی یا ئیراقێ بەرێ بنیاتێ ئاڤاکرنەکا ئیراقەکا نویە پشتی ٢٠٠٣ ژ بەرکو ئێکەم جارە شیعە ب ڤی ئاوای ببنە گروپ گروپ و ل سەر ئێک پروژە ل ھەڤ نەکەن . ھەروەسا ئەڤ حکومەتە ئێکەم حکومەتە پشتی بێھێزکرنا داعشێ و دەرکرنا وێ د ناڤ باژێران دا . زێدەبارێ ھندێ کو د نھا دا ئیرانێ وەک پازدە سالێن چوی ئەو سەنگ و ھێزا و بریار و گوتنا خوە ل سەر ھەمی شیعەیان نەمایە و رەوتەک بەرفرەە نھا ل گورەپانا سیاسی یا شیعی پەیدا بویە دژاتیا بالا دەستی و نفوزێ ئیرانێ د کەت ل ئیراقێ دا !کورد دڤێ ھەفکێشێ دا فەرە ل سەر بەرنامەکێ ھەفپشک کار بکەت بو ھندێ د پاشەروژێ دا پەشیمانی ڤی دەمی نەبیت .فەرە ئالیێن کوردستانی کار ل سەر بجە ئینانا دەستوری بکەن وەک ئێک پاکێج و ئەڤ چەندە ژی ببیتە مەرجێ پشکداریا کوردان د گەل مەزنترین کوتلا پەرلەمانی دا . گرەنتیا ڤێ چەندێ ژی ب دیتنا من فەرە یان ئەمریکا یان ئیران بدەت !
نھا ل سەر ئالیێن سیاسێن کوردستانی فەرە ب بەرنامەیەکێ ھەفپشک بەرەف بەغدا بچن بو ھندێ بشێن گرنتیا مافێن کوردستانیان بکەن . ھەروەسا ئەڤ ئێک دەنگیە ژی ل بەغدا پێتڤی دکەت ھەمی ئالی ل کوردستانێ ھەڤرا و ئێک رێز بن و رێز ژ ھەمی ئالیەکێ بێتە گرتن و ھەلبژاردن بێنە ئەنجامدان ب رەنگەکێ چ رەخنەک ل سەر پروسێ نەبن ل (٣٠ / ٩ ) . ھەروەسا کاری ھەری ژ پێشیێ یی حکومەتێ نھا نەھێلانا ڤێ کریزێ یە کو سوپاس بو خودێ بەرەف پاشەروژەک گەش دچین . بو دووبارە نەبونا ڤان کریزان ژی پلانێن ستراتیجی باشترین بژاردەنە.