پشتی سالا ٢٠٠٣ ێ ل ھەرفاندنا رژێما دکتاتۆریا بەعسا عیراقێ ، روویێ دبلۆماسیەتا جیهانێ بتایبەت ئەمریکا و وەلاتێن ھەڤپەیمان کەفتنە ھەرێما کوردستانێ ژبووری ئاڤاکرنا عیراقا نوو لسەر بنەمایێ دیموکراسیەتێ و دوور ئێخستنا شەرێ ناڤخۆیی ل عیراقێ ، ھەولێرا پایتەخت ببو قیبلەیا دبلۆماسیەتێ ل رۆژھەلاتا ناڤین ، چونکی ئەزمۆنا دبلۆماسی وکارگێریا ھەرێما کوردستانێ لسەر دەستێ سەرۆک مەسعود بارزانی سەرۆکێ ھەرێما کوردستانێ و سەرۆکێ حکومەتا ھەرێما کوردستانێ رێزدار نێچیرڤان بارزانی ئەزمۆنێن سەرکەفتی بوون و شیا بوون پشتی سالا ١٩٩٢ حکومەتا ساڤا یا ھەرێما کوردستانێ د رەوش و کاودانێن نازک و دژوار دا دەرباز بکەن و بکەنە نمۆنێ دیموکراسیێ و رێڤەبرنەکا ساخلەم و پاراستنا مافێ مرۆڤ و پێکھاتان . نەخاسمە لدەمێ سەرکەفتنێن پێشمەرگەھێن کوردستانێ بسەر ئیرۆرستێن داعش کو ھەمی جیھان شلەژان کربوو . ھەرێما کوردستانێ ب سیاسەتا سەرۆکێ ھەرێمێ و سەرۆکێ حکومەتێ شیان مفای ل ڤان ئەزمۆنان وەربگرن و پێگەھێ ھەرێما کوردستانێ لسەر ئاستێ جیھانێ بلند و بھێز بکەن .

لەوما پشتی راپرسیا سەرخۆبوونا کوردستانێ ل ٢٥ ێ ئیلۆنا سالا ٢٠١٧ چاڤێن نەیار و نەحەز و خیانەتکارا بڤان سەرکەفتنا رانەبوون کۆ لسەر دەستێ پارتی ھەرێما کوردستانێ دەسکەفتێن مەزنتر بدەستڤە بینیت و بگەھیتە قوناغا داویێ .

پەنا برە بەر خیانەتکاریا ١٦ ێ ئکتۆبەرا سالا ٢٠١٧ و بوونە دیڤەلانک و رێ نیشاندەرێن داگیرکەرا بۆ لاوازکرنا پێگەھێ ھەرێما کوردستانێ و زڤراندنەڤە بۆ قۆناغێن دەسپێکی و پشکەکا زۆرا ھەرێما کوردستانێ داگیر کر .

چاڤەرێ بوون پارتی و سەرکردایەتیا وێ گۆرەپانێ بۆ وان چول بکەت و ئەو ببنە حاکمێت موتلەقێن ھەرێمێ و ئەڤ دەسکەفتێن نەتەوی و نشتیمانی ب ساناھی لناڤ بچن .

لێ پشتی سەرکەفتنێن پێشکەرگەھێن کوردستانێ ب سەرپەرشتیا سەرۆک مەسعود بارزانی خەونا وان ھەلوەشاند و ھێزێن داگیرکەر تووشی مەزنترین شکەستن کرن و حکومەتا ھەرێما کوردستانێ ژی ب سیاسەتا سەرکەفتی و جھێ حیبەتیا جیھانێ یا نێچیرڤان بارزانی ،

ئۆمێد و ھیڤیێن خیانەتکار و داگیرکەران یێن مایی ژی ژناڤ برن و شیا لدەمەکێ ھەرە زوو ھەمی گەماروویا بشکێنیت و دووبارە پێگەھێ ھەرێما کوردستانێ بھێز بکەتەڤە و پەیوەندیێن دبلۆماسی دگەل مەزنە وەلاتێن جیھانێ مۆکۆم بکەتەڤە و ئەم دبینین رۆژانە ژمارەکا زۆرا دبلۆماتکار و بزنسمان و بازرگانێن وەلاتێن جودا جودا قەستا ھەرێما کوردستانێ دکەن و دووبارە ھەولێرا پایتەخت بوویە قیبلەیا دبلۆماسیەتێ ل دەڤەرێ .

ئەڤ سەرکەفتنێن ھەرێما کوردستانێ لسەر دەستێ سەرۆکێ حکومەتا ھەرێما کوردستانێ ، بەلگە و دیدەڤانێن بەرچاڤن کۆ سیاسەتا حکومەتا کوردستانێ سیاسەتەکا ھەرە سەرکەفتی بوویە و د چارچۆڤێ بەرژەوەندێن بلندن خەلکێ کوردستانێ و نەتەوی و نشتیمانی بوونە .

ئەگەر نە ھەرێمەکا بچووکا وەک کوردستانێ شیانێن خۆراگریێ بەرامبەر ڤان ھەمی و پیلان و ئاستەنگێن خیانەتکار و داگیرکارا نەدبوون .
لێ دیارە ئەڤ سەرکردێ مەزنێ کورد ژلایێ سیاسی و ئیداری گەھشتیە کۆپیتکا شارەزایی و لێ زانینێ دڤی واری دا و د قوتایخانەیەکا مەزنا کوردایەتیێ و وەلات پارێزیێ و مرۆڤ پەروەریێ دا پەروەردە بوویە و پێگەھشتیە ،
ئەو ژی قوتابخانا بارزانی نەمرە .
بۆ قوناغێن داھاتی ژی پێتڤی یە خەلکێ کوردستانێ ڤان ھەمی گاڤ و سەرکەفتنا لبەرچاڤ بگریت و زێدەتر ل جاران پشتەڤانیا پرۆژە و سیاسەتا سەرۆکێ حکومەتا ھەرێما کوردستانێ بکەت داکۆ بسەرفیرازی ڤان قاوناغا د بەرژەوەندا گشتی یا خەلکێ کوردستانێ دەرباز بکەین ، نەخاسمە ئەڤرۆ رەوشا دەڤەرێ بەرەڤ گۆرانکاریێن مەزن دچیت و گڤاشتن لسەر وەلاتێن پشتەڤانیا خیانەتکارا و گاڤ ھاڤێژێن داگیرکرنا کوردستانێ ھەنە ژلایێ سیاسی و ئابووری .

ئەز باوەرم ل قۆناغێن داھاتی و ل ھەر گۆرانکاریەکا چاڤەرێکری و نەچاڤەرێکری ل ڤێ دەڤەرێ سیاسەتا حکومەتا ھەرێما کوردستانێ و ھەرێما کوردستانێ ژی دێ د سەرکەفتی و بن و د بەرژەوەندا خەلکێ کوردستانێ دا دالەنگیت .

و ھەولێرا پایتەخت دێ بمینت قیبلەیا دبلۆماسیەتێ و ئاشتیێ و ئازادیێ و دیموکراسیەت و پێکڤە ژیانێ ل دەڤەرێ .