پشتى چه‌ند پرۆگرامه‌كێن به‌رنامێ له گه‌ل ره‌نج یێ كه‌نالێ رووداو ل دۆر ئاریشه‌یێن دهرمانان و كوالییتیاوان، ئیدى ئه‌و مژار بوویه بابه‌تێ وه‌لاتییان و ترسا ده‌رمانێن خراب و ده‌م ب سه‌ر ڤه چووى ل جه‌م نه‌خوه‌شان دروست بوویه، لێ وه‌كو هه‌رجار، سه‌رۆكێ حكومه‌تا هه‌رێما كوردستانێ نێچیرڤان بارزانى ب دیاركرنا پشته‌ڤانییا خوه بۆ بزاڤێن به‌رنامێ له گه‌ل ره‌نج و گرتنا قه‌چاخچى و ده‌رمانێن ب سه‌ر ڤه‌چووى، ئه‌و دوو دلى و ترسا ل ده‌ف خه‌لكێ كوردستانێ چێبووى ڤه‌ره‌ڤاند، سه‌رۆكێ حكومه‌تا د پریسكۆنفرانسه‌كێ دا راگه‌هاند: ئه‌و وه‌كو حكومه‌ت پشته‌ڤانیا ژناڤبرنا ده‌رمانێن خراب و ده‌م ب سه‌ر ڤه‌چووى دكه‌ن، ب هه‌موو شیانان ژى دێ هه‌ول ده‌ن كه‌سێن ل پشت ڤێ كریارا خراب و دژه مرۆڤاتى بگرن و سزا بده‌ن. ئه‌ڤ گۆتنێن سه‌رۆكێ حكومه‌تا هه‌رێمێ ب تنێ سه‌ر زاره‌كێ نه‌بوو، به‌لكو ب كریار ژى ئه‌و یه‌ك سه‌لماند كو حكومه‌ت ئالیێ به‌رپرسیاره و ئه‌ركێ مه‌زن و گران ل سه‌ر شانێ وییه بۆ چاره‌كرنا پرسا دهرمانان، له‌ورا مه دیت ل سنورێ هه‌ولێرێ هه‌وا گرتنا قه‌چاخچی و ده‌رمانێن قه‌چاخ و ده‌م ب سه‌ر ڤه‌چووى ده‌ستپێكر و هه‌ر د ئێكه‌م چالاكى دا رێژه‌یه‌كا زۆر یا ده‌رمانێن خراب و 6 قه‌چاخچى هاتنه ده‌سته‌سه‌ركرن. ل ڤێرێ گرنگه چ بهێته گۆتن، هه‌تا كو مه‌دیا و خه‌لكێ كوردستانێ لگه‌ل بزاڤێن حكومه‌تێ هاریكار نه‌بن، زۆر ب زه‌حمه‌ته ره‌هـ و ریشه‌یا ڤێ ئاریشه‌یا دهرمانان ب ئێكجارى بهێته بنبركرن، چونكى ب مخابنى ئه‌م وێ راستێ دبێژین، بازارێن هه‌رێما كوردستانێ كه‌فتیه ده‌ستێ هژماره‌كا بازرگانێن مشه‌خۆر، كو چه‌ند مفایێن وان ژ بۆ خه‌لكێ كوردستانێ هه‌یه، ب ده‌هان جار پتر زیانێ ب خه‌لكێ كوردستانێ دگه‌هینن، هه‌ر ئه‌ڤه ژى وه‌كریه تا نها هه‌رێما كوردستانێ ب تنێ بكارهێنه‌ره و نه‌بوویه هه‌رێمه‌كا به‌رهه‌م هێنه‌ر، ب گرتن و سزادانا بازرگانێن قه‌چاخچێ دێ ئێكه‌م پێنگاڤا وێ یه‌كێ ده‌ست پێكه‌ت كو ئیدى گه‌له‌ك ژ پێدڤیێن مه دناڤ خوه دا بهێته به‌رهه‌م ئینان، بۆ نموونه ئه‌گه‌ر ئێك ده‌ستێن حه‌بكێن نه‌خوه‌شیا شه‌كرێ تێچوویا دروستكرنا وێ 40 هزار دینار بن، وى ده‌مى قه‌چاخچى دكاریت وێ حه‌بكێ ب رێكا نه‌یاسایی و ئه‌رزانتر ب هاڤێته ناڤا بازارى، ب هه‌مان پاكێت و نڤێسین و به‌روارێ ده‌م ب سه‌رڤه‌چوونێ، لێ ئه‌و ماده‌یێ كو دناڤا وێ حه‌بكێ دایه ب تنێ (جه‌س)ـه و ژبلى زیانان بۆ مرۆڤى هیچ مفایه‌كێ ناگه‌هینیته كه‌سێ نه‌خوه‌ش، هه‌ر ژ به‌ر ڤێ یه‌كێ ژى بوویه تا نها ئه‌م نه‌شاینه هه‌موو ئه‌و پێدڤیێن كو دهێنه ناڤا هه‌رێما كوردستانێ بكه‌ینه به‌رهه‌مێ ده‌ستێ مرۆڤ و شاره‌زایێن كورد بخوه، چونكى وه‌به‌رهێنه‌رێن ناڤخوه دبینن كو ئه‌و نه‌شێن ده‌رمانه‌كى به‌رهه‌م بینن د هه‌مان ده‌م دا ئه‌و ده‌رمان كو ل ولاتێن ده‌رڤه دهێت و ب ئه‌رزانتر ل بازارى ب ده‌ست دكه‌ڤیت. كه‌واته ئه‌و بریارا سه‌رۆكێ حكومه‌تێ نێچیرڤان بارزانى داى ژ بۆ گرتنا وان بازرگانێن مشه‌خۆر و قه‌چاخچیێن دهرمانان، جهێ هێڤى و ئۆمێدێ بۆ خه‌لكێ كوردستانێ كو گومان ل سه‌ر وان دهرمانان نه‌مینیت كو ئه‌م ژبۆ نه‌خوه‌شیا خوه بكاردئینین
کارزان فەقێ
