ده‌ركه‌تنا ئۆپۆزسیۆنێ ل هه‌رێما كوردستانێ ل سالا 2009 و تا نها، ئه‌گه‌ر مۆدێله‌كا نووژى بیت، لێ پێچه‌وانه‌ى وه‌لاتێن كو مفاى ژ ئێنیرژیا ئۆپۆزسیۆنێ وه‌ردگرن، هه‌رێما كوردستانێ هندى زیان ژێ وه‌رگرتینه هند ژ هزرا وێ ئۆپۆزسیۆنێ مفادار نه‌بووینه، چونكى ده‌ركه‌تنا ئۆپۆزسیۆنێ بوویه ئه‌گه‌ر بێ باوه‌رى بوون دناڤبه‌را ده‌ستهه‌لات و خه‌لكى دا دروست ببیت، ب ره‌نگه‌كى ده‌ما كه‌سه‌ك یان تاوانباره‌ك دهێته سزادان، د سنوره‌كێ دا ئه‌و سزادان ب حزبیكرن و سیاسى كرن دهێته ل قه‌له‌مدان و ل سنوره‌كێ ژى ده‌ستخوه‌شی لێ دهێته كرن، زۆر سه‌یره داعشه‌ك دانپێدانێ ب تیرۆرستبوونا خوه ب كه‌ت د هه‌مان ده‌م دا حزبێن دژه پارتى و دژه حكومه‌تێ وێ یه‌كێ ب سیناریۆ نیشان بده‌ن، ئه‌ڤه بۆ خه‌لاتكرن و رێزگرتنێ ژى ب هه‌مان شێوه و ئه‌قلیه‌ته، ده‌ما ده‌سه‌ك دهێته خه‌لاتكرن یان پۆستێ وى دهێته بلندكرن، وى ده‌مى ژى ئۆپۆزسیۆنا مه گومانێ ل سه‌ر دروست دكه‌ت ژ بۆى كو هه‌ر روودانه‌كا هه‌ى ژ بۆ به‌رژه‌وه‌ندا خوه بكاربینیت و بزاڤ چاكسازیێن حكومه‌تێ ل پێش چاڤێ خه‌لكى به‌رزه بكه‌ت، لێ ل ڤێرێ ئه‌م پێدڤى ب دیدڤانیا كه‌سێن شاره‌زا دبین، ل بیرامنه ل ده‌ستپێكا قه‌یرانا دارایى و هاتنا داعشێ، پارتێن سیاسى هه‌بوون، هه‌م دناڤا حكومه‌تێ دا ب هه‌ردوو ملا دخوارن، هه‌م ژى د مه‌دیایا خوه دا چه‌پ و راست دژى حكومه‌تێ رادوه‌ستان، لێ ئێدى ب وى ره‌نگى بۆ وان نه‌چوو سه‌ر و ل داویا كابینا حكومه‌تێ خوه ڤه‌كێشان، نها ئه‌م وه‌زیرێن ئێكه‌تى دناڤا ڤێ كابینه‌یا حكومه‌تێ دبینین، لێ ئه‌گه‌ر ته‌ماشه‌ى مه‌دیا و داخویانیێن به‌رپرسێن ئێكه‌تى ل دۆر بزاڤ و چاكسازیێن حكومه‌تێ بكه‌ین، ئه‌م ئێكه‌تیێ وه‌كو حزب و جه‌ماوه‌ر دناڤا حكومه‌تێ دا نابینین، چونكى هه‌ر دناڤا وێ حزبێ دا باله‌كێ مه‌زن هه‌بوو كو ل گه‌ل پارتێن دى ل ده‌ستپێكا ئه‌ڤ ساله باس ل هه‌لوه‌شاندنا حكومه‌تێ دكرن و پرۆژه‌یێ حكومه‌تا رزگاریا نشتیمانى وه‌كو ئه‌لته‌رناتیڤێ ڤێ حكومه‌تێ پێشكێش دكرن، لێ سه‌رۆكێ حكومه‌تێ ل هه‌مبه‌ر وان به‌ربه‌سـتێن كو دناڤخوه‌یا هه‌رێمێ دهاتنه‌كرن ته‌سلیم نه‌بوو، سه‌ره‌راى به‌رسینگرتنا گڤاشتن و دۆرپێچێن ئیراقێ و وه‌لاتێن ئیقلیمى، بزاڤێن حكومه‌تا هه‌رێمێ شیا پلانێن حزبێن هه‌رێمێ ژى ژناڤ ببه‌ت، حزبێن دژه حكومه‌تێ ژبۆ شیره‌تكرنا عه‌بادى و مه‌زنكرنا دۆرپێچان ل سه‌ر هه‌رێمێ؛ سهرنهكهفتن و سه‌رۆكێ حكومه‌تێ هه‌موو ئه‌و دۆرپێچ و سزا ب داوى ئینان. حزبێن هه‌رێمێ د پرۆژه‌یێ حكومه‌تا رزگاریا نشتیمانى و هه‌لوه‌شاندنا كابینه‌یا نها یا نێچیرڤان بارزانى هه‌ر دیسان سهرنهكهفتن و حكومه‌ت ب بهێزى ماڤه و گه‌له‌ك ژ ئاریشه‌یێن ل گه‌ل به‌غدا چاره‌سه‌ركرن، مژارێ گازنده‌یێن حزبێن دژى پارتى ئه‌وبوو كو هه‌ر دوو هه‌یڤان ئێك مووچه دهێته دان، حكومه‌ت ب بزاڤێن خوه شیا سه‌ره‌راى دانا مووچه‌ی مه‌هانه، رێژه‌یا پاشكه‌فتا مووچه‌ى ژى كێمكر و ئه‌گه‌ر حزبێن دى پرۆژه‌یێ چاكسازى د مووچه‌یێ خانه‌نشینان ل په‌رله‌مانێ كوردستانێ په‌سه‌ند كربا، نها مه‌هانه بێى پاشه‌كه‌فت دا مووچه‌یێ ته‌مام یێ فه‌مانبه‌ران هێته دابه‌شكرن، لێ ژبه‌ر كو ترسا حزبێن دژه پارتى ئه‌وه كو ب په‌سه‌ندكرنا وى پرۆژه‌ى دێ ره‌وشا ئابووریا وه‌لاتییان به‌ره‌ف باشیێ چیت و ئه‌و ئیدى ده‌نگێ نه‌رازیێ وه‌لاتییان نابهیسن، سه‌یر و ئه‌نتیكه ل ڤێرێ ئه‌وه، ئێك ژ ئه‌وه‌لیاتێن هه‌موو حزبێن كوردستانێ دژاتیكرنا حكومه‌تێ یه، ژ ڤێ سه‌یرتر ژى ئه‌وه، وه‌سا هزردكه‌ن ئه‌گه‌ر هه‌رێما كوردستانێ بێ ئاریشه بیت و ره‌وشا وه‌لاتیان باش بیت، ئیدى ئه‌ڤه د به‌رژه‌وه‌ندیا وان دا نینه، له‌ورا ب زه‌حمه‌ت ئه‌م ئاخفتنا خێرێ ژ هنده‌ك پارتێن سیاسى دبهیسین، لێ كورد دبێژن (گرنگ ئه‌وه عاقیبه‌ت خێربیت)، ئه‌گه‌ر حكومه‌تا هه‌رێمێ چار سالێن نه‌خوه‌ش و پر ئاریشه و قه‌یران ژى ده‌رباز كربیت، عاقیبه‌ت و دووماهیا وێ خێربوویه، به‌روڤاژى مه عاقیبه‌ت و هێزا هه‌موو حزبێن دى یێن دژه پارتى و دژه حكومه‌تێ ل هه‌لبژارتنێن بۆرى یێن په‌رله‌مانێ ئیراقێ دیتن. نها ژى سه‌ره‌راى باشتركرنا ره‌وشا دارایى یا مووچه‌خۆر و وه‌لاتییان، ئاماژه‌یێن ب دووماهى هاتنا قه‌یرانێ ژى هه‌نه. ل ڤێرێ گرنگه باس ل داوى داخویانێن بریكارێ بۆرى یێ وه‌زاره‌تا دارایی یا ئیراقێ بكه‌ین، كو دبێژیت: بلا مووچه‌خۆر پشت راستبن كو ئیدى مه‌هانه د ده‌مێ خوه دا حكومه‌تا هه‌رێمێ دێ مووچه‌ى دابین كه‌ت، هه‌روه‌سا ب ئه‌لكترنى كرنا ده‌سته‌یا وه‌به‌رهێنانێ دێ وه‌كه‌ت هژماره‌كا زۆر یا كۆمپانیێن بیانى قه‌ستا هه‌رێما كوردستانێ بكه‌ن و جارده‌ن پرۆژه‌یێن خزمه‌تگۆزارى ژى دێ ده‌ست پێ كه‌نه‌ڤه، ل گۆرى پێشبێنین بریكارێ به‌رێ یێ وه‌زاره‌تا دارایی یا ئیراقێ، به‌غدا دێ به‌رده‌وام بیت ل سه‌ر هنارتنا 317 ملیار دینارێن ئیراقى ، هه‌روه‌سا بهایێ په‌ترۆلێ بلندبوویه و رێژه‌یا هنارده‌كرنا په‌ترۆلا هه‌رێمێ ژى به‌ر ب زێده‌بوونێ یه. كه‌واته ئه‌گه‌ر بێ متمانه‌یى دناڤبه‌را خه‌لك حكومه‌تێ ژى هه‌بیت، گه‌له‌ك جاران پێدڤیه ئه‌م دیده‌ڤانى و لێدوانێن شاره‌زایێن ئابوورى ب گرنگ وه‌ربگرین.
کارزان فەقێ
