عیراق وەکی دەولەت ئەڤرۆ د خراپترین ڕەوش دا ژلایێ سیاسی و ئابووری و ئێمناھی و جڤاکی و ..ھتد .
ژلایێ سیاسی کوورترین ناکۆکی دناڤبەرا حزب و ئالیێن سیاسی پەیدابوونە بتایبەت پشتی ھەلبژارتنێن بووری ئێن جڤاتا نوونەرێن عیراقا فیدرال ، ھەرچەندە عیراق ئێکە ل وەلاتێن ھەرە دەولەمەند ب نەفت و گاز و سامانێن سرۆشتی ، لێ نھو ئێکە ل قەردارترین وەلاتێن جیھانێ ، ژلایێ ئێمناھی ژی ئێکە ل وەلاتێن پڕ مەترسیدارترین وەلاتێن جیھانێ ، ژلایێ جڤاکی ژی جڤاکێ عیراقێ ب درێژاھیا دیرۆکا خۆ بڤی ڕەنگی پڕ ناکۆکی نەبوویە و نەھاتیە ھەلوەشاندن ، ژلایێ لەشکری ژی کەفتیە ددەستێ چەندین میلیشیایێن سەر حزب و وەلاتان . د زۆر بووارێن دیتر ژی دا ب ھەمان شێوەیە .
گەھشتیە وی ئاستی کۆ د شیانێن سیاسیێَن عیراقێ نینە ب ھێنە چارەسەرکرن ، ژبەر مایتێکرنێن وەلاتان ب تایبەت وەلاتێ ئیرانێ .
ژبووری دەربازبوونا عیراقێ دڤێ رەوشا دژوارا ھەمە لایەنی دا ، عیراقێ پێتڤی ب کەسایەتیەکێ سیاسی یێ بلیمەت ھەیە کۆ دەرچوویێ قوتابخانەیەکا نەتەوی و نشتیمانی بیت وەک قوتابخانا بارزانی نەمر . کۆ کلیلێن دەرگەھێن ھەمی ئاریشە و ناکۆکیان ددەستی دا ھەبیت و ب ساناھی ڤەبکەت .
ئەگەر بەراووردیەکێ دناڤبەرا ڕەوشا کوردستانێ ئەوا پشتی خیانەتا شازدێ ئکتۆبەرا سالا ٢٠١٧ بسەر ھەرێما کوردستانێ ھاتی و ڕەوشا نھو یا عیراقێ بکەین ،
ڕەوشا ھەرێما کوردستانێ لڤێ ڕەوشا نھو یا عیراقێ دژوارتر بوو ، لێ ژبەرکۆ ھەرێما کوردستانێ خودان پارتی دیموکراتی کوردستان و قوتابخانا رێبازا پیرۆزا بارزانی نەمرە و کەسایەتیێن بلیمەت لێ پەروەردە بوونە دشێت د ھەمی کاودانان دا ب ساناھی دەرگەھێن چارەسەریێ ڤەکەت و وان رەوشێن دژوار بەرۆڤاژی بکەت ، ھەر وەکی شیای ، پشتی رێکەفتنا خیانەتا ئەلجەزائیر ، ئۆمێدێ بزڤرینیت و شۆرەشا گۆلانێ بەرپا بکەت ،
یان پشتی ئەنفال و کیمیا بارانکرن و وێرانکرنا کوردستانێ یێن سالێن ١٩٨٨ ، سەرھەلدانا پیرۆزا سالا ١٩٩١ بخولقینیت و پەرلەمان و حکومەتا ھەرێما کوردستانێ بەرھەم بینیت .
پشتی خیانەتا شازدێ ئکتۆبەرێ و ھێرشێن لەشکرێ عیراقێ بۆ داگیرکرنا کوردستانێ و گەماروودانا وێ ، رێزدار نێچیرڤان بارزانی کۆ پەروەردەکارێ رێبازا پیرۆزا بارزانی نەمرە و مرۆڤێ بەرتەنگیایە ، شیا لدەمەکێ ھەرە زوودا وان ھەمی پیلانێن ناڤخۆیی و دەرڤە بھەلوەشینیت و ھەرێما کوردستانێ نە تنێ ل مرنێ رزگار بکەت ، بەلکی ژ ھەمی لایەکی بھێز و خورت کر .
ژلایێ سیاسی ، پەیوەندی دگەل عیراقێ و جیھانێ موکۆم کرن و پشتەڤانیا سیاسی دابین کرن ،
ژلایێ ئابووری ، ھەمی گەماروو شکاندن و ڕەوشا ئابووری یا ھەرێما کوردستانێ ب شیانێن سنووردار ، بەرەڤ گەشەکرنێ برن .
ژلایێ جڤاکی ، گاڤێن خیانەتکار و رێ نیشاندەرێن وان پاشڤەبرن ، بۆ دوو ئیدارەیی و زاراڤە گیرێ .
ژلایێ ئێمناھیێ ژی ، ھەرێما کوردستانێ وەکی ئێمناھیترین دەڤەر دناڤ ڤولکانەکا مەزنا ئاگرین دا نیشا جیھانێ دا و نمۆنێ ئێمناھیێ یە ل دەڤەرێ .
ئەڤ گاڤێن نێچیرڤان بارزانی سەرۆکێ حکومەتا ھەرێما کوردستانێ ، ئۆمێدەکا مەزن بۆ خەلکێ کوردستانێ زڤراندی یە و باوەری ب پاشەرۆژا خۆ ھەیە و بەرەڤ گاڤێن مەزنتر دچیت .
ئەگەر عیراقێ بڤێت دڤێ رەوشا دژوار دا دەرباز ببیت پێتڤی یە مفای ل ئەزمۆن و سەربوورا ھەرێما کوردستانێ و کەسایەتیا نێچیرڤان بارزانی وەربگریت ، نەخاسمە پشتی گەماروودانا ئیرانێ ژلایێ ئەمریکا و ب پالپشتیا ژمارەکا وەلاتان ، چونکی دڤان سالان دا وەلاتێ ئیرانێ ، کلیلا چارەسەرکرنا ئاریشێن ناڤخۆ یێن ناڤ مالا شیعی یێن عیراقێ بوو کۆ دەسھەلاتا عیراقێ ددەستی دایە و ئەڤرۆ کوورترین ناکۆکیی دناڤبەرا واندا پەیدا بوونە و ئیران دڤێ رەوشا خۆدا دێ مژوولی چارەکرنا ئاریشێن خۆ بیت و ئەگەر رەوشا عیراقێ بڤی ڕەنگی بەردەوام بیت دوور نیە لدەمەکێ نێزیک ، ڤۆلکانا عیراقێ ب پەقیت و ب چ تیمین ھەوا ھاتنێ و ئاگر ڤەمراندنێ نەھێنە ڤەمراندن . ئەگەگر نێچیرڤان بارزانیەک لێ ھەلنەکەڤیت ...! ، ئەز باوەر ناکەم ئەڤ سیاسیێن عەرەبێن عیراقێ ، کەسایەتیێن بڤی ڕەنگی لێ ھەلکەڤن ، چونکی چ قوتابخانێن پەروەردەیی یێن نشتیمانی و نەتەوەی یێن مینا پارتی و رێبازا پیرۆزا بارزانی نەمر نیە .