پشتی بھارا عەرەبی، نھا تۆرێن جڤاکی پتر ژ دەزگەھەکێ راگەھاندنێ رۆلێ خوە دبنینیت، چوونکی ئەو روودانێن د بھارا عەرەبی و پشتێ وێ چێبوویەن بوونە ئەگەر خەلک ژ بۆ بلاڤکرنا چالاکی و ستۆریێن خوە یێن رۆژانە پتر پەنایێ ببەنە بەر تۆرێن جڤاکی یێن وەکو فێسبۆک و ئنستاگرام و تویتەر.. ھتد. ل کوردستانێ ژی ھەروەسا بوویە ئالاڤەکێ گرنگێ پەیوەندیان دناڤبەرا خەلکی دا، لێ ئەگەر تەماشە بکەین تۆرێن جڤاکی ل ھەرێما کوردستانێ پتر د بیاڤێ بانگەشە و پرۆپاگەندەیێن سیاسی دھێـتە بکارئینان، ھەتا گەھشتیە وی رادەی حزبێن سیاسی پێگەھێ خوە جەمارەی ل سەر پیڤەرێ لایک و کۆمینتێن پەیجێن خوەیێن فەرمی مقیاس دکەن. بۆ نزیکبوونا ژ خەلکی ژی، دەمەکە پرسیار و بەرسڤێن دناڤبەرا وەلاتییان و نێچیرڤان بارزانی سەرۆکێ حکومەتا ھەرێمێ و جێگرێ سەرۆکێ پارتی دیموکراتی کوردستانێ دناڤا تۆرێن جڤاکی گەلەک دھێتە دیتن، پتریا ئەو پۆستێن کو من دیتین و د پەیجێ فەرمی یێ نێچیرڤان بارزانی دا بەلاڤبووینە، تارادەیەکێ دوورن ژ سیاسەتێ، چونکی خەلک ھەموو چالاکیێن سیاسی یێن سەرۆکێ حکومەتێ د تیڤیان دا دبینیت، لێ ئەوێ گرنگە ئەو پرسیاریێن سادەیێن کو ژ زارێ زارۆکەک، یان سنێلەیەک یان ژنەکا دانعەمر دھێتە کرن، دەربارەی ژیانا تایبەت یا سەرۆکێ حکومەتێ یە، دەما زارۆکەک دخوازیت نھێنیا گرێدانا بۆینباغێ سەرۆکێ حکومەتێ بزانیت، ئەڤە بخوە وێ یەکێ دگەھێنیت کو سەرۆکێ حکومەتێ دخوازیت پتر خوە نزێکی خەلکێ خوە بکەت، یان دەما ژنەکا دانعەمر پسیارا خوارنێ ژ بارزانیێ سەرۆک وەزیر دکەت، ئەڤە بخوە ئاماژەیەکە کو ئەم دکارین تۆرێن جڤاکی نە ب تنێ ژ بۆ تاوانبارکرنا ھەڤدوو و شەرێ ئاخفتنان و پەیڤێن کرێت بکاربینین، سەرەرای ڤان پرسیارێن سادە، گەلەک وەلاتیان پرسیارا رەوشا نھایا ھەرێمێ و رەوشا سییاسی و چارکرنا قەیرانا دارایی و پرسا ئێکگرتنا ھێزێن پێشمەرگەی ژ سەرۆکێ حکومەتێ کریە و بەرسڤێن وی ژی ژ پەیجێ وی یێ فەرمی بەلاڤ بووینە. ئەڤ روویێ تۆرێن جڤاکی بۆ من تشتەکێ نوویە و جوانە ژی، چونکی ھەتا نھا من گرنژینێن بەرپرسان و بەرسڤا پرسیارێن نۆرمال و رۆژانە ژ زارێ چ بەرپرسێن کورد نەدیتبوو، یا من دیتبوو چ بوو؟ شکاندنا ھەڤدوو، تاوانبارکرنا ھەڤدوو، کێمکرنا سمعەتا پارتەکا سیاسی، ھێرشکرنا سەر پیرۆزیێن مللەتەکی، و گەلەک لایەنێن دی یێن نێگەتێڤ. ھیچ دەمەکی پەیجێ بەرپرسەکێ گۆرانێ یان ئێکەتی نابینی کو پۆستەک دناڤدا نەبیت دژی پارتی و سەرۆکێ حکومەتا ھەرێمێ، لەورا ئەگەر تا نھا ھەموو ئەو حزبێن دژە پارتی تۆرێن جڤاکی یێن خوە ژ بۆ دژاتیکرنا حکومەتێ بکارئینابیت، لێ سەر‌ۆکێ حکومەتێ د وی ئاستی دا چ پۆست نەکرن، بەلکو ب کریار نیشاندا کو ئەو دخوازیت رەوشا ئابووری و دەروونی یا خەلکێ کوردستانێ بەرەف باشیێ ببەت، بەلگە ل سەر ڤێ گۆتنێ ژی ئەوە دەما بارزانیێ سەرۆک وەزیر د خەما خەلکێ خوە دا وەلات وەلات دگەریا ژبۆی کو دۆرپێچا سەر کوردستانێ بشکێنیت و بەغدایێ نەچار بکەت ھندەک ژ مافێن خەلکێ ھەرێمێ رەوانە بکەت، وی دەمی شاندێن حزبێن سلێمانی ل رێکا بەغدایێ سرا گرتبوون ژ بۆی کو شیرتا ل عەبادی بکەن سەرەدەریێ ل گەل حکومەتا ھەرێمێ نەکەت و ھیچ کوژمەکێ پارەی رەوانەکی کوردستانێ نەکەت، لێ نھا ئەم ھەموو دزانیت بزاڤێن کی ب سەر کەفت، ئەگەر بۆ ڤێ یەکێ دانپێدانێ ب شکەستنا خوە ژی نەکەن، باوەری دانا خەلکێ ھەرێمێ ب پارتی د ھەلبژارتنێن ١٢ی گولانێ بخوە ئاماژەیەکە ژ بۆ سەرکەفتنا بزاڤێن سەرۆکێ حکومەتێ.