كوردستان ل هه‌مبه‌ر ئه‌زموونه‌كا دى یه ژ بۆى كو بۆ جیهانێ دیار بكه‌ت، ژ هه‌موو روویه‌كیڤه ئیراق و كوردستان دوورى هه‌ڤن و چ جاران نكارن دناڤا سنوره‌كێ ل گه‌ل هه‌ڤ بژین، ژ به‌ركو هیچ وه‌كهه‌ڤییه‌ك دناڤبه‌را ئه‌زموونا ئێمناهى و سیاسى یا هه‌ولێر و به‌غدایێ دا ناهێته دیتن، ره‌نگه جوداهیا بیر و بۆچوونێن سیاسى وه‌كربیت بێ باوره‌ى و زیزبوونه‌ك دناڤبه‌را خه‌لكێ كوردستانێ و حكومه‌تێ دروست ببیت، لێ د هه‌مان ده‌م دا ئه‌گه‌ر كه‌سه‌كێ بیانى یێ ده‌رڤه‌ى ئیراقێ و كوردستانێ بریارێ ل سه‌ر پێشكه‌فتن و ئاڤه‌دانیا دناڤبه‌را ئیراقێ و كوردستانێ بده‌ت، بێ دوو دلى دێ هه‌رێما كوردستانێ هه‌لبژێریت، میناكێن ڤێ گۆتنا من ژى گه‌له‌كن و ل هه‌ر جهه‌كێ ڤێ دنێ ده‌ما ناڤێ كوردستانێ دهێت دۆسته‌كێ كوردان هه‌یه ده‌ستێ خوه بلند بكه‌ت و خوه ب دیده‌ڤانێ باشی و قه‌نجى یا كوردان بدانیت و باس ل وێ پێشكه‌فتنێ بكه‌ت ئه‌وا كو پشتى كه‌تنا حكومه‌تا به‌عس ل هه‌رێما كوردستانێ هاتیه كرن، ئه‌گه‌ر سۆز و دۆستینیا گه‌له‌ك وه‌لاتان بۆ دیرۆك و شۆره‌شێن كوردى ڤه‌گه‌ریت، لێ ئه‌م دكارین به‌راوردیا قۆناغا پشتى شكه‌ستنا سه‌دامێ دكتاتۆر بكه‌ین، واته ل ڤان 15 سالێن بۆرى دناڤخوه‌یا هه‌رێما كوردستانێ چ گهۆرین چێبوویه؟ و د هه‌مان ده‌م دا ئیراقێ و باژارێن وێ به‌ره‌ڤ كیڤه چوویه و ل ئاستێ ناڤده‌وله‌تى ب كیژان تایبه‌تمه‌ندیا خوه ناڤدار بوویه. كوردستان، ئه‌و هه‌رێما ئارام دناڤ جه‌رگێ رۆژهه‌لاتا ناڤین، یان بچووكتر باس بكه‌ین، ئه‌و سێ پارێزگه‌هێن ئارام دناڤ جه‌هه‌نه‌ما وێ ئیراقێ دا كو شه‌ڤه‌كا وێ بێ په‌قین كوشتن ده‌رباز نابیت، كوردستان ئه‌و هه‌رێما خوه‌دان حكومه‌ته‌كێ سه‌ره‌راى شاشی و كێماسیان؛ شیایه ئاستێ ئاڤه‌دانكرنێ ب به‌راوردى ل گه‌ل پارێزگه‌هێن دى یێن ئیراقێ بگه‌هینیته بلندترین ئاست، هیچ پارێزگه‌هه‌كا ئیراقێ نه‌شیایه پشتى ژناڤچوونا حكومه‌تا به‌عس پێشكه‌فتنێ بخوه‌ڤه ببینیت و سه‌رنجا گه‌شتیار و وه‌لاتێن جیهانێ بخوه رابكێشیت، لێ د هه‌مان ده‌م دا رۆژ بۆ رۆژێ كوردستان پێشكه‌فتن بخوه ڤه دیت لێ ژ ده‌مێ هاتنا داعشێ و برینا بۆدجه‌یا هه‌رێمێ ژ ئالیێ به‌غدایێ ڤه ئه‌و پێشكه‌فتن به‌ره‌ڤ لاوازى چوو و ده‌نگێ نه‌رازیێ وه‌لاتییان ل هه‌مبه‌ر ده‌سته‌لاتى بلند بوو، هه‌لبه‌ت ئه‌ڤ ژى مافه‌كێ ئاسایی یێ فه‌رمانبه‌رانه كو ل گۆرى ده‌واما خوه یا فه‌رمى پاره‌یێ خوها ئه‌نیا خوه وه‌ربگرن. كه‌واته سالانه ئیراقێ ل سه‌رێ لیستا وه‌لاتێن گه‌نده‌لێن كوردستانێ، به‌غدا ب نه‌ئارامترین پایته‌ختێن جیهخانێ دهێته ناڤكرن، خه‌لكێ ئیراقێ ب دلته‌نگترین مرۆڤێ سه‌ر روویێ ئه‌ردى هایتنه دانان، تێناگه‌هم ژ بۆ سیاسه‌تڤانێن ئۆپۆزسیۆنێن كوردستانێ كیژان عه‌ده‌ت و نه‌ریتا ئیراقێ هه‌ژى هندێ یه كو ئه‌و ل گه‌ل به‌غدا ببنه دۆست و دژى حكومه‌تا هه‌رێمێ شیره‌تان پێشكێشی حكومه‌تا ئیراقێ بكه‌ن؟ ل ڤێرێ كوردستان و ئیراق به‌ره‌ف قۆناغه‌كا دى دچن، ب تایبه‌ت پشتى ریفراندۆما سه‌رخوه‌بوونا كوردستانێ و هه‌لبژراتنێن پرى ئالۆزى و سه‌خته‌كاریێن ئیراقێ، ئیدى كورد دكارن ل ئیلونا ئه‌ڤ ساله جاردن ژ بۆ جیهانێ بده‌ن دیاركرن كو نه كه‌لتور و نه‌سیاسه‌ت و نه‌ژى ئه‌قلیه‌تا ده‌سته‌لاتدارییا به‌غدا و هه‌ولێرێ وه‌كو هه‌ڤ نینن و ب زه‌حمه‌ته هه‌تا سه‌رێ ل گه‌ل هه‌ڤ بقه‌تینن، هێشتا ئه‌م نه‌گه‌هشتینه وى ده‌مى ژى، سیاسه‌تڤانێن عه‌ره‌ب بخوه باس ل پرۆژه‌یێ (جۆ بایدن)ـى دكه‌ن كو تاكه چاره‌یێ ئیراقێ دابه‌شبوونا وێ یه ژ بۆ سێ پارچێن كورد و شیعى و سنوننى. چونكى پێلا خوه‌نیشاندانان ل پارێزگه‌هێن ئیراقێ كورسیكا حه‌یده‌ر عه‌بادى سه‌رۆكوه‌زیرێ ئیراقێ لاو له‌قاندینه و هه‌ر رۆژه و ب بریار و گه‌فه‌كێ ل شاشه‌یان ده‌ردكه‌ڤیت، لێ ئه‌گه‌ر هه‌رێما كوردستانێ شیا ل هه‌مبه‌ر چاڤدێر و وه‌لاتێن ناڤده‌وله‌تى هه‌لبژارتنه‌كا شه‌فاف و بێ ئاریشه بكه‌ت، وى ده‌مى جاردن ب دیده‌ڤانیا جیهانێ دێ روویێ ده‌سته‌لاتدارێن ئیراقێ ل هه‌مبه‌ر كوردان ره‌ش بیته‌ڤه و دۆست و ئالیگرێن كوردان ل هه‌موو ناڤه‌ندێن ده‌سته‌لاتێ دێ بنه خوه‌دى كارته‌كێ ژ بۆ پشته‌ڤانیا كوردستانێ ل هه‌مبه‌ر هه‌موو وان گه‌ف و دۆرپێچێن كور پێشتر ژ ئالیێ به‌غدایێ ڤه ل كوردان دهاتنه كرن، له‌ورا حكومه‌تا هه‌رێمێ و سه‌رۆكێ وێ گه‌له‌ك رژدن كو هه‌لبژارتنێن په‌رله‌مانێ كوردستانێ دده‌مێ ده‌ستنیشانكرى دا ل ئیلونا ئه‌ڤ ساله بهێته كرن، ب سه‌ر كه‌فتنا وێ هه‌لبژارتنێ ژى جاردن مه‌سه‌له‌یا سه‌رنه‌كه‌فتن و سه‌خته‌كاریێن هه‌لبژارتنێن ئیراقێ نوو دبیته‌ڤه و وه‌لاتێن جیهانێ ل سه‌ر ئه‌زموونا خراب و فاشلا 100 سالا ده‌وله‌تا ئیراقێ و ئه‌زموونا سه‌ركه‌فتى یا 27 سالێن كوردستانێ دێ ئاخڤنه‌ڤه، ئیدى ئیراقا خوه‌دان مووچه و پر ئالۆزى ژ بۆ وان پیرۆز و هه‌رێما پر ئێمناهى ژى ژبۆ مه پیرۆز.
کارزان فەقێ
