رەنخنەگرتن ل سەرانسەرێ وەلاتێن جیھانێ دا د رەوشەک رێژەیی دایە دناڤبەرا رێک ژێ ھاتنە گرتن و گوە لێگرتن و رەتکرن و وەرگرتن و مفاوەرگرتنێ . د دونیا دیمورکراسی دا وەک پشکەک ژ دیموکراسی و مافێ مروڤ رێک ھاتیە دان خەلک ب ئازادی دەربرینی ژ ھزر و نەرینێن خوە بکەت بەرامبەر خەلک و حکومەتێ .ھەرێما کوردستانێ ھەر چەندە زور جاران رەخنە د چەندین بیاڤێن گشتی لێ دئێتە گرتن بەلێ ھەتا نھا کەشەکێ باش یێ رەخنیی د میدیای و جادێ دا ھاتیە دەستە بەرکرن و خەلک و پارتێن سیاسی و راگەھاندن ب ئازادی رەخنێ دگرن .
فەرە پرسەک بێتە بەرسڤ دان ئەرێ رەخنە واتا ئازادی و دیموکراسی ؟ ئەو تێگەھشتنە زور شاش دەمێ گەلەک خەلک تێگەھشتی ھەمی ئازادیا کەسی و پروسا دیموکراسی ب رەخنێ ڤە گرێدای . ژ بەرکو رەخنە پروسەیەکا بەردەوام و فەرە ھەبیت بو ھندێ ئازادی و دیموکراسی و مافێ مروڤ دەست بەر ببیت. نھا د کوردستانێ دا رەوشا رەخنێ و تێبینی چیە؟ حکومەتا ھەرێما کوردستانێ بو دەمێ بیست و حەفت سالە د چەندین رەوشێن نافخوی و ھەرێمیێن جودا جودا دەسەلاتدارە د ڤێ ھەرێمێ دا زورترین رەخنە ل سەر ھەنە ئەرێ یا رەوایە کریزێن ئاڤ و کارەب و خاندن و موچەی ھەبن....؟ ژ بلی دەھان کریزێن دیتر . فەرە رەخنە نەبیتە فاکتەرێ بەرھەم ئینانا شەش کریاران ,
ئێک : رەخنەگرتن کو مافەکێ سادەیە و کەس چو منەتان ب مروڤی ناکەت , بەلێ نابیت رەخنە ببیتە ئەگەرێ ھندێ رەشبینی ل دەف تاک و جڤاکی پەیدا ببیت .
دوو : رەخنەگرتن کو بویە پرسەک ھەمی جڤاک ژ خوەڤە کریە شروڤەکار و سیاسی و رەخنەگرێن رەوشێ نابیت توندوتیژیێ بەرھەم بینیت .
سێ : دەمێ زانایێن ئولی ل سەر مینبەر و میدیایێ و سوشیال میدیایێ دا ل گوتارێن خوە دا ئاراستەیێ ئایەت و فەرمودەیان بەرەف رەخنەگرتن ژ حکومەتێ دبەن , فەرە ل وێ چەندێ ھشیار بن نەرینێن توند تاکەکێ توندو تیژ و تیرورست بەرھەم دئینیت . ب ھزاران گەنجێن جیھانێ دەمێ پەیوەندی ب داعشێ ڤە کری ھەمی بەرھەمێ گوتارێن حەماسی و توندبو . مەلا و شێخ و زانا ئەرکێ وانە جڤاکی و حکومەتێ ژ خرابی و نەزانین و بەرەلایی و بێ دادیێ ھشیار بکەن . بەلێ بێ کو مەلا مزگەفتێ بو ئالیەک سیاسی بکار بینیتیان ببیتە کەسەک حزبی و توندرەو بەرێ خەلکی بدەتە تەکفیر و خروجێ . دەمێ گرێدانا کونگرێ ئێکەتیا زانایێن ئولێ ئیسلامێ سەروکێ حکومەتێ داخازا رەخنەگرتنەکا ل سەرخو و دیر ژ توندوتیژیێ و رەخنەیەکا بەرھەم دار ل زانایێن ئولی کر.
چار : رەخنە ب ھیچ ئاوای نابیت سنورێن ئاسایشا نەتەوەی ببریت و ببیتە فاکتەرەک بو دەست وەردانێت بیانی و تێکدانا پێکھاتا سیاسی و جڤاکی و ئاینی د وەلاتی دا . لێ یا دیار د رەخنەگرتنا ئەڤر و د کوردستانێ دا ھەی ھەمی سنور بەزاندینە .
پێنج : رەخنە گرتن پرسەک جودایە ژ تەشھیر و کرێتکرنا کەسی , بەرپرسەک گەندەل ھەبیت یان پلانەک بێ بەرھەم و نەسەرکەفتی ھەبیت رەخنە لێ دئێتەگرتن بەلێ تەشھیرکرن و ناڤ زراندن و کرێتکرنا کەسی و مالباتا وی کەسی ئەڤ چەندە ل رەخنێ دەردکەڤیت.
شەش : رەخنە نابیت بو مەرەما رەخنەگرتنێ بیت بەلکی بو ھندێ بیت رەوش باشتر بیت حکومەت ب پلانێن خوە دا بچیت و کارەک باشتر بێتەکرن و ئەوێ رەخنێ دگریت ئەو کەسە کو حکومەت ژ وی دروست بوی لەوما نابیت رەخنە بو ھندێ پێکھاتا سیاسی و جڤاکی و ئولی پتر ژێک ھەلوەشیێت .
ل داویێ دا کو فەرە ئاماژە ب ھندێ بکەین رەوشا سیاسی و جڤاکی و ئابوری و ئاینی و ساخەلەمی ...ھتد. ل کوردستانێ دا دەھان رەخنان ب خو ڤە دگریت و پێتڤیە بو راستڤەکرنا ڤێ رەوشێ رەخنەیەکا ب ویژدان و ب بنەما و ب ئەلتەرناتیفەک باشتر و ل سەر خو و دیر ژ توندوتیژیێ ڤە ھەبیت بو ھندێ دەست ژ ناڤ دەست پێکولا بدەست ڤە ئینانا ژیانەکا خوش و وەلاتەکێ سەربەخو بکەین. نابیت رەخنەگرتن بو مەرەما رەخنە و تێکدانێ بیت ھەروەسا فەرە رەنخنەگر بەرەدەوام کەسەکێ (رێژەیی) بیت . و باشی و خرابیان ب چاڤێ خو ببینیت و دەست خوشیێ ژ باشیان بکەت و دەستێ خو دانیتە سەر خرابی و شاشی و گەندەلیێ و داخازا باشکرنا رەوشێ بکەت . ئەز رەخنێ ژ وێ رەوشا خراب دگرم کو کوردستان ریبریێ ڤان کریزان کری و فەرە رەوش بێتە باشکرن و رەخنە مافەکێ نورمالە یێ ھەر تاکەکێ جڤاکی. ژ ئالیێ دیتر ڤە ژی ئەز دەست خوشیێ ژ ھەر کار و کریارەکا حکومەتا ھەرێما کوردستانێ دکەم ب ھیڤیا کارێن باشتر و جوانتر و ب بەرنامەتر.