ئایدیۆلۆژییا نە تنێ بیردۆزەکا سیاسی، بەلکۆ جۆرکێ ھزرکرنێیە. ل سالێت نۆتان و ل تەنگاڤییا ھنگی، دەمێ پێشمەرگەی ب خوینا خۆ ل دەڤەرا بەھدینان لدژی ئایدیۆلۆژییەکا چەپا تووندھاژۆ بەڕەڤانی ژ ئاخا کوردستانێ دکر و ھزاران شەھید و بریندار و پەککەفتی ددان و زارۆکێت وان سێڤی و ژنێت وان دبوونە بیژن، ھندەک ئەکتەرێن نڤستی وەک دۆنکیشۆتێ ئایدیۆلۆژیخواز و توندھاژۆیێن ئایینی بۆ چەند فلسەکا، و ب پارە و پشتەڤانییا سپۆنسەرێت تیرۆرێ وەکی سعۆدی و ئیرانێ، خۆ د کەلھا دا ئاسێ دکرن و بەرۆڤاژێ بنەمایێن مرۆڤاتیێ و ئیسلاما پیرۆز و کەساتییا مەحەمەدێ ئەمین(س)، تنێ ژ کەربێت خۆ، ئەو پێشمەرگە بکافر ددا زانین و خوین و مالێ وان حەلال دکر. پشتی ئەو گەندەلکارێت ئۆلی ب گەندەلییا سیاسی ھاتین کڕین، لبەرچاڤ و دناڤ خەلکێدا بۆ وان شەھیدا رۆندکێت تیمساحی دباراندن.
سەیرە ھەمیشە گازندە دھێتەکرن بۆچی گەندەلی ھەیە و ئێک ش وان گەندەلییا ئەوە چەند خەلکێ ئەفراز و کوردستانا باکوور ل ھەرێما کوردستانێ مووچەی وەردگرن. ئەز نزانم راستی بۆ ڤێ گۆتنێ ھەیە و یان نینە، بەلێ ئەز وێ چەندێ باش دزانم ب سەدان ش خەلکێ وێ دەڤەرێ ب دەھا سالا پێشمەرگاتییا کری و شەھید و بریندار بووینە. بەلێ ڤان لایەنێن ڤێ پرۆپاگندێ بەلاڤدکەن، ھەمی جارا ئەڤ گۆتنکە بۆ خوە کرینە پێخوارن، و ئەو ش ھندێ سل و عاجزن کوردەک ش پارێ کوردستانێ پارییەک بەربکەڤت، بەلێ لنک وان دا ئاسایی بت ھەکەر سەد جاران ھند پارە ش ئاخا کوردستانێ بۆ ئیرانییەکێ تێکدەر، شیشانییەکێ سەربڕ، ئەفغانییەکێ برسی و بێ باوەر، عەرەبەکێ ئەنفالکەر ھاتبایە تەرخانکرن و نابت کەس بئاخڤت. ب سەدان گەنجێن کوردستانێ، بناڤێن پیرۆزێن یەزادنێ مێھربان و پێغەمبەران ھاتنە خاپاندن و ژ دەیبابێن وان ھاتنە ڤاژێلەکرن و بۆ ئەفغانستان و شیشان و سعۆدی و ... ھاتنە ھنارتن بۆ دیتنا خوول و مەشقێن راھینان و تیرۆریستی، و گەلەک ش وان دانە تەلافتن. ھندی وێنێ گەنجەکێ وەکی "مەتین" ی ل زاخۆ دھێتە بەرچاڤێن من کڕێن ش دلێ من تێت. ھاتە خاپاندن و ھەتا دناڤ تیرۆریستێن داعشێ دا خۆ دا تەلافتن، یاش ویڤە ھەما دێ بەھشتێ ب ھندێ مسۆگەر کت. مخابن ئەڤە بسەرێ گەنجێت مە بێت.
****
بەلێ ! تووندھاژۆیی ھزرەکە چ جاران ش مێشکێ ڤان مرۆڤا ناھێتەدەرکرن. ھیچ تشتەک وان ناگھۆڕت. ھەر رەفتارەک دیتر بکن تنێ "کەڤلێ مھێ" یە، گۆرگەکێ تێدا ھاتیەنخامتن. شێخ زانایێ تیرۆریست ل ھەڤلێرێ بزاڤ دکرن بگەھتە پۆستەک مەزن دا د دەلیڤەکیدا ھەمی بەرپرسێن کوردستانێ ب پەقینەکێ ش ناڤ ببت. چونکی ھزرا وی دناڤ ھیچ پارتەکێ نەدھاتەگھۆڕین. ئەوێ ھەر رۆژ ژ چەقەکی بچت یێ دی، و ئەو چەق ژی بۆ مالێ دنیایێ و دوروویاتیێ و روویمەتی بت، بۆ کەسێ نابت مال. نەخاسمە ئەو چەق چەقێ تیرۆر و تووندھاژۆیێ و دژی کورد و پێشمەرگەی و مرۆڤاتی و دیمۆکراسیەتێ بت.
باشە خەلک چەند یێ سادەیە وان رۆژێت تەنگاڤی ژبیر بکت؟؟!! بۆ نڤێسینا دستورێ داھاتوویێ کوردستانێ ئەم پێدڤی ب مرۆڤێن دلسۆز و ساف و سادە و میانەرۆ و علمانی(سکۆلاریزم) و ئازادیخواز و دیمۆکراسی و مرۆڤدۆست و باوەردار ب ئازادییا ھزری و ئاینی و نەتەوێت دیترین، نەک یێت دەمارگیر و " سیماھم فی وجوھھم"، و تنێ بۆ پارە و پایەی خۆ ژ ھەر ئازادیخوازییەکێ بشۆت و ئێخسیر و زیندانیێ ئایدیۆلۆژییا خۆ یا تووندھاژۆ بت. مە ئەڤ کەسێت خۆدان دوروویاتی و سپۆنسەرییا ھزرا گەندەلیێ نەڤێن بریارێ لسەر ژیانا مە و زارۆکێت مە بدن.
*مامۆستایێ ئەکادیمی و پرۆفیسۆرێ ە. /زانینگەھا زاخۆ