ئافرەتێک لە گوندێکی دوور لە گوندەکەی خۆیان شوو دەکات، دوای ماوەیەک دوو کەسی گوند رێیان دەکەوێتە ئەو گوندەی ئافرەتەکە شووی لێ کردووە، ئەوانیش بڕیار دەدەن سەردانی ئافرەتەکە بکەن و نان و چایەکیش لای ئەو بخۆن، کاێک ئافرەکە ئەو دوو کەسەی گوندەکەیا دەبینێ زۆر خۆشحاڵ دەبێ و بە گەرمی بەخێرهاتنیان دەکات، دوای خزمەت و حەسانەوە ئافرەتەکە دەڵێ: یاخوا بەخێر بێن، ئێ توخوا پێمبڵێن خەڵکی گوند چۆنن؟ کێ مردووە کێ ماوە؟
ئەوانیش دەڵێن: شوکر بۆ خوا کەس نەمردووە و خەڵکی گوندی زۆر باشن و (حەمەد)ی براشت بۆتە موختار، بە بیستنی ئەو هەواڵە ئافرەتەکە دەست دەکات بە گریان و لەخۆدان، پیاوەکانیش دەڵێن: بۆ دەگری؟ لەباتی ئەوەی پێت خۆش بێ کە حەمەدی برات بۆتە موختار، ئافرەتەکە دەڵێ: حەمەدی برام هی موختاری نییە، ئەگەر پیاو لە گوندیدا مابان حەمەدی برام نەدەبوو بە موختار، بۆیە دەزانم پیاو لە گوندیدا نەماون.
کاتێ ناوی سەرۆکی لیستەکانم خوێندەوە و دوو سەرۆک لیستم دیتن کە حزبەکەیان بەردەوام باسی چاکسازی و قوتی خەڵک دەکەن، لەوە گەیشتم کە ئەو دوو حزبە تووشی قەیرانی بێ پیاوی بوون، ئەگەرنا ئەو دوو کەسە هی ئەوە نین ببنە سەرۆکی لیست.