ئێک ژ بنەمایێن هه‌رێما کوردستانێ پێكڤه ژیانه
به‌ده‌ل گابێركى
ئەگەر ئەم بەراوردییەکێ بکەین دناڤبەرا عیراقێ و ھەرێما کوردستانێ دا جوداھیەکا مەزن ھەیە وەکو دوراتیا ئەرد و ئەسمانی، ژ بەرکو ل عیراقێ ھێشتا خودانێن عەقلیەتەکا ژەنگینە و شەرێ ئایینی و نەتەوایەتی یێ گەرم و گورە ھێشتا بەرێ شیعەیان یێ ل رێتنا خوینا سوننەیان و ئاگرێ کەرب و کینەکا زێدە چنەمایە جارەکا دیتر عیراقا نوو دناڤ پێلێن دەریایەکا دیتر یا خوینێ دا بەرزەببیت.
بەروڤاژی ڤێ چەندێ ھەرێما کوردستانێ بوویە سەرنجا ھەموو جیھانێ بۆ پێکڤەژیانێ و بۆ سەرئێخستنا ئەڤی بابەتی کو ئێدی کورد و تورکمان و عەرەب و شیعە و سونە ئێک و دوو نەکوژن و ببنە برا و پێکڤە ب خوەشی بژین ل ھەرێما کوردستانێ بۆ نموونە سەرۆکێ حکومەتا ھەرێما کوردستانێ نێچیرڤان بارزانی ھەردەم گوتیە فەلسەفا حکومەتا ھەرێما کوردستانێ خورتکرنا پێکڤەژیانا ھەموو ئایین و نەتەوایە و نابیت ئەڤ فەلسەفە بھێتەتێکدان.
دیسان حکومەتا ھەرێما کوردستانێ ناڤا کەرتێ پەروەردێ دناڤا پەرتووکان دا چەندین بابەت ل سەر پێکڤەژیانێ بەلاڤکرینە و گرنگییەکا مەزن دایە پێکڤەژیانێ و دیسان ھەر قوتابیەک یێ ئازادە ب ئایینێ خوە بخوینیت و زمانێ خوە بۆ نموونە ئەڤرۆکە عەرەبەک ل ھەرێما کوردستانێ ناھێتەنەچارکرن ب کوردی بخوینیت یان مەسیحییەک بەلکو ئەو دشێن ب زمانێ خوە یێ دایک بخوینن بۆ ڤێ چەندێژی حکومەتا ھەرێما کوردستانێ قوتابخانە ئاڤاکرینە و دیسان پەرتووکژی بۆ قوتابیان دابینکرینە و یا گرنگه پتر مامۆستا و بسپۆرێن په‌روه‌ردێ كار بكه‌ن بۆ نه‌هێلانا هزرا تیرۆرى...
دیسان نابیت رێك ل وان كه‌سێن تێكده‌ر بهێته ڤه‌كرن بۆ هندێ بگه‌هنه حه‌زێن خوه یێ بێ بنه‌ما، ئه‌وژى تێكدانه و وێرانكرن و خوون رێشتن یا گرنگه هه‌موو وه‌لاتیێن كورد ب هه‌موو هێزا خوه كار بكه‌ن بۆ شه‌رمزاركرنا وان كه‌سان یێن هزرا تیرۆرێ هه‌ى بۆ هندێ ببنه لێبووك دناڤ جڤاكى دا و ئێدى نه‌شێن سه‌رێ خوه بلند بكه‌ن.
ل دوماهیكێ یا گرنگه مامۆستا ب رێكا قوتابیێن خوه كار بكه‌ن بۆ نه‌هێلانا هزرا تیرۆرێ و كاربكه‌ن بۆ هندێ پتر ئاشتى و پێكڤه‌ژیان ل هه‌رێما كوردستانێ هه‌بیت، ژبه‌ركو ب تنێ پێكڤه‌ژیان و ئارامى و ئاشتى هێڤێنێ ژیانه‌كا خوه‌ش و به‌خته‌وه‌رن.
