تایبەت کرنا دوو گوتاران بو پرسا بوچی گەنج دبیتە تیرورست ڤەدگەرێت بو ھەبونا ڤالاتیەکێ ل راگەھاندن و تورێن جڤاکی و پێکولێن نڤیسەر و روشنبیر و خاندەڤانان ل سەر ڤێ پرسێ و درێژیا بابەتی , ھەروەسا وێ مەترسیا مەزن ئەوا ریبریێ کوردستانێ دبیت رێکا کریارێن تیرورستی ھەرچەندە چو ئەنجامەک نابیت و نەبیە دیاردە و ب ئانەھیا خودێ نابیت ئەڤ چەند کریارە ژی بمینن. بەری ل سەر بەردەوامیا بابەتی بچین دێ دوو خالا گرنگ بەحس کەین کو فەرە بزانین ئەرێ گەنجێ و جڤاکێ کورد ل دیروکێ دا چاوا بویە؟ و ئەڤ ھەشت سالێن دەڤەر پێدا دەرباز دبیت چ فاکتەرەک ھەبویە سەرەرایێ ھەمی کێشەیان تیرورێ نەشیا رێزێن کوردستانیان ببریت؟
(١) بدرێژاھیا دیروکێ گەلەک ڤەکولەر و گەروک و روژھەلاتناسان ل سەر کوردستانێ نڤیسیە و تایبەت پرسا پێکڤەژیانێ و ھەبونا چەند ئول و مەزھەب و نەتەوەێن جودا . ئێک دێر ژی نیە ل سەر ھندێ کو کوردستان ب درێژاھیا دیروکێ ببیتە جھێ شەرێ ئولی و مەزھەبی و نەتەوەی دناڤبەر بسلمان و جوھی و کریستیان و ئێزدیان, یان شیعە و سوننە و کاسولیک و پروتستانتا یان ناڤبەرا کورد و عەرەب و تورکمانان.دەھان چێروکێن ڤیانێ ناڤبەرا ڤان پێکھاتێن جودایێن ئولی و نەتەوەی ھەبوینە و بوینە داستان و ھاتینە نڤێسین و ھەمی پێکھاتە ب خوشی پێکڤەژیاینە.
پشتی ھاتنا ھەر ئولەکێ جوداھی دکەڤنە ناڤبەرا ئالیگرێن وێ, ئیسلامێ ژی مەزھەبێن جودا لێ چوینە و ھەر ئێک دیف کوپیەک جودا دچیت لێ وەکی نێچیرڤان بارزانی گوتی کوردان ژی بار ل ڤێ چەندێ ھەبویە و ئەو کوپی و مەزھەب و ھزرا کورد ل سەر چوی ناڤ ئیسلامێ دا ل گوپیتکا مروڤاتیێ بویە و ئول بو بەختەوەریا مروڤاتیێ ھاتیە نە ب بەروڤاژی. ب راستی ژی دیروک دیدەڤانێ مروڤاتیا کوردان و مانەڤا پەیوەندیێن موکمێن کوردستانیان ب ڤی ئاوایێ ھەیی باشترین گروڤەیە کو ئەو ئسیلاما راست کو کورد سەر چوی بەرێ گەنجی دایە پاراستن و ڤیانا وەلاتی و خزمەتا مروڤاتیێ و دیرکریە ژ رەتکرنا بەرامبەر.
(٢) کوردستان وەک ئارام ترین دەڤەرا روژھەلاتا ناڤینە و ھەشت سالێن شەرێن مەزن ل دەڤەرێ دەربازبون و ھەتا نھا ژی ئاریشە ل دەڤەرێ دا بەردەوامن ل تونس بگرە ھەتا ئەفغانستان و سەرانسەرێ جیھانێ کەفتیە گومانەک مەزن ل سەر ھەبونا تیرورستێن داعش ل وەلاتێن وان دا , سوپاس بو خودێ کوردستان ب ئارامی مایەڤە و پێشمەرگە ل شەرێ مان و نەمانێ بون دگەل دەولەتا تیرورستی و شیا بسەرکەڤیت و خەلکێ کوردستانێ دگەل ھێزێن ئەمنی رولەک بەرچاڤ دیت ل پاراستنا کوردستانێ و وەکی سەروکێ حکومەتێ گوتی کوردستان ب ئێمناھیا خو یا ھەیی بیە جھەک ئارام بو ھەمی ئول و مەزھەبان و پتر ژ دووملیون ئاواران قەستا کوردستانێ کر .
زور گرنگە تاکێ کوردستانی تایبەتی گەنج کو سەرکردە و ستین و ئاڤاکەر و پارێزەرێن پاشەروژا کوردستانێ باش بزانن ئەڤ ئێمناھیا ھەی ب وەرگرتنا ئسلامێ وەکی خو و دیرکەفتنە ژ ھزرا توندرەوی و تەکفیرێ بەرھەم ھاتیە و سەرەرایێ خو گوری کرنا ھزران ژ قەھرەمانێن ڤی گەلی و پلانێن حکومەتێ یێن بەردەوام بو پاراستنا کوردستانێ.
نھا بوچی گەنج دبیتە تیرورست ؟
- راگەھاندنا بێ سانسور ل کەنالێن نافخوی و جیھانی و ھەبونا ب ھزاران کەنالێن جودا جودا و سەدان کەنالێن داعشی کو توندرەوی و شەر و خرابیێ و تێکدانێ و نەھێلانا توڤێ پێکڤەژیانێ بلاڤ دکەن , وەکریە کو پشکەک ژ گەنجێن کوردستانی ببنە موریدێن ڤان کەنالان و ھزرێن تیرورستی وەربگرن و ل سەر وەلاتێ خو بجە بینن.لێرە دا فەرە حکومەتا ھەرێما کوردستانێ رولێ خوە بگێریت ژ ڤی بیاڤی دا و سنورەکێ بو ڤێ بەرەلایێ دانیت و کار ل گەل وان کەنال و زانایێن ئولی بکەت و رولەکێ بەرچاڤ بدەتێ کو کار بکەن دژاتیا ھزرا داعشێ و نمونێن وەکی وان بکەن ل جڤاکی دا .
- تورێن جڤاکی مەترسیدارترین و مەزنترین دەرگەھێ وەرگرتنا ھزرێن تیرورستی یە و زورەک ژ گەنجان دناڤ ڤان پەیجێن مەترسیدار و داعشی دگەرێن و ھەمان ھزر وەردگرن و ھەتا چەندین پەیج ھەنە ب کوردی ھەمان ھزرا داعشێ بلاڤدکەن !!.
- پێکول کرن بو لێدانا ئیسلامێ دکوردستانێ دا و ژ ئالیێ ھندەک کەنال و کەساتیێن سیاسی و ئەکادیمی و ھندەک حزبێن کوردستانی ڤە , مەترسیەک مەزن ھەیە و ھەر وەکی وێ مەترسیێ یە کو تەکفیریەک گەنجی پالدەتە ناڤ داعشێ . لەوما فەرە ھەمی ئالیەک د سەری دا حکومەتا ھەرێما کوردستانێ کار بکەت بو پاراستنا ئیسلاما راست و دروست و نەھێلیت چو کارەک بێتە کرن کو ھەستێ (٩٥%) خەلکێ بسلمانێ کوردستانێ بێتە بریندارکرن ب لێدوانێن دژی بنەمایێن ئیسلامێ و ل مەزنە کەنالێن کوردستانی . ب دیتنا من ئەڤ چەندە ژی ھەستێ توندرەویێ دەف زورەک ژ گەنجان پەیدا دکەت.
- نەبونا ھشیاریا جڤاکی , فەرە دایک و باب ھشیاری زاروکێن خوە بن تایبەت ل ژیێ سنێلە (مراھق) یێ دا و بزانن کیڤە دچن و ھەڤالێن کی نە و چ دخینن و چ وەردگرن و قەستا کیڤەدکەن و چو ھزر دسەری دایە و کار ل سەر زارویێن خوە بکەن تایبەت کوران و ل پێلا ھزرێن توندرەو بپارێزیت تایبەت ل ڤێ قوناغا مەترسیدار کو روژھەلات تێدا دەرباز دبیت.
- نەبونا پەروەردەیەکا ساخلەم ل مال و مزگەفت و قوتابخانە و زانکویان و ب راستی ھەمی سازیێن تایبەت مەند ل ھەبونا حالەتێن ھەبونا تیرورستی د ناڤ جڤاکی دا بەرپرسن فەرە پێکولەک باش بێتەکرن کو ئیدی تاکەک ساخلەم بێتە ئاڤاکرن .