نێزیکی بیست رۆژایە خەلکێ باشوور و ناڤەراستا عیراقێ دەست ب خۆ نیشاندانێن جەماوەری کریە دژی حکومەتا عیراقێ ، ھەرچەدە ل دەسپێکێ درۆشمێن سەرەکیێن خۆنیشاندەران داخازیێن کار و پرۆژێن خزمەتگۆزایبوون ، لێ ھێدی ھێدی درۆشمێن سیاسی ژی دژی دەسھەلاتێ بلند دبن . ھەرچەندە پێتڤی بۆ ئەڤ خۆنیشاندانە بەری نەە دەە سالا ھاتبانە کرن ، ب تایبەت ل پارێزگەھێن باشوور نەخاسمە بەسرا کۆ ب پایتەختێ ئابووریێ عیراقێ جھێتە نیاسین و ھەتا نھو چەپەلترین و بێ خزمەتترین باژارێ عیراقێ یە و خەلکێ وێ ژی برسیترین خەلکێ عیراقێ یە ..! چونکی بەسرا ژێدەرێ پرانیا داھاتێ عیراقێ یە . لێ حکومەتێن ئێک لدیڤ ئێکێن عیراقێ ، ژبەر دزی و گەندەلیەکا بێ سنوور یا ئیداری و دارایی ، لجھێ خزمەتکرنا خەلکی و خورتکرنا ژێرخانا ئابووری بکەن ، خەلکێ ڤان پارێزگەھان ل سادەترین خزمەت وەک ئاڤ و کەھرەب بێ بەھر کرنە .
سەرەرای مەزاختنا ب سەدان ملیون دوولارێن ئەمریکی ل پرۆژێن ڤان ھەردوو کەرتان . ژبەر راست و ڕەوایا داخازیێن خۆ نیشاندەرا ، پرانیا حزبێن عیراقێ یێن دەسھەلاتدار و نە دەسھەلات دگەل داخازیێن خەلکی دانە ، ئەڤەژی بخۆ دانپێدانە ب فەشەلا حکومەتێن ئێک لدیف ئێکێن عیراقێ .
ھەرچەندە ھەر زوو سەرۆک وەزیرێن عیراقێ ژ ترستا گۆرینا درۆشمێن خەلکی ل داخازیێن پرۆژێن خزمەتگۆزاری بۆ درۆشمێن سیاسی و رازیکرنا خەلکی ، بریارا مەزاختنا چەندین ترلیۆن دینارێن عیراقی دا بۆ کارێن خزمەتگۆزاری ، لێ نەشیا جادا عەرەبی و خۆ نیشاندەرا رازی و بێ دەنگ بکەن ، چونکی خەلکی باوەری ب سۆز و بریارێن وان نەمایە و بێ ھیڤی بوویە ، ئەوێن ڤان پازدە سالا نەشیای خزمەتا خەلکی بکەن و سادەترین پێتڤی دابین بکەن ، نەشێن لداھاتی ژی دا خزمەتا خەلکی بکەن وھێدی ھێدی درۆشمێن سیاسی یێن دھێنە بلندکرن .
ئەڤ بریارێن بلەزێن حکومەتا عیراقێ بۆ رازیکرنا خەلکی ، نیشانێ بەڵاڤبوونا ترسا جەماوەرێ عیراقێ یە د دلێ دەسھەلاتێ دا و دبیت ببیتە سەرھەلدانەکا جەماوەری یا مینا سالا ١٩٩١ . ژلایێ سیاسی ژی عیراق د رەوشەکا تایبەت دایە ، چونکی پشتی بوورینا دوو مەھان ل ھەلبژارتنا ھێشتا ئەنجامێن فەرمی نەھاتیە راگەھاندن ، لەوما ناکۆکیێن دناڤبەرا حزب و قەوارێن سیاسی یێن عیراقێ زێدەتر بوونە و حکومەت ژی حکومەتەکا کار ڤرێکەرە .
برەنگەکێ گشتی ئەڤ خۆ نیشاندانێن جەماوەری یێن عیراقێ روویێ فەشەل و شکەست خواریا حکومەتێن عیراقێ نیشا جیھانێ ددەن و دیار دبێن حزبێن دەسھەلاتدارێن شیعە یێن عیراقێ کار بۆ خزمەتێ و پێشکەفتنێ و ئاڤەدانیێ ناکەن ، بەلکی ژبوی خزمەتا مەزھەبیەتێ و بەرژەوەندێن حزبی و تایبەت ل دەسھەلاتێ نە .
ئەگەر حکومەتێن عیراقێ یێن پشتی رژێما بەعس ڤان پازدە سالا نیازا خزمەتکرنێ و ڤەژاندنا ئابووری ھەبا دشیا عیراقێ بکەن پێشکەفتیترین جوانترین و وەلات . چونکی عیراق ئێکە ژ وەلاتێن ھەرە زەنگین ژلایێ سامانێن سرۆشتی و ئاڤ و عەردەکێ ھەرە بکێرھاتی و دەستێ کاری . ئەڤ داھاتێ ڤان سالا بدەست کەفتی دشیان دا بوو چەند وەلاتەکا ب باشترین شێوە برێڤە ببەن . لێ ھێشتا برسیترین وەلاتە و چ گرنگی ب کەرتێن پیشەسازی و چاندنێ و بازرگانیێ و گەشت گەشتیاری و...ھتد نەدایە . ھێشتا کارەبێ کۆ سادەترین و پێتڤیترین پێتڤیا خەلکی یە ل وەلاتێن جیران دکرن . زۆر وەلات ھەبوونە پشتی پازدە سالا ل سەرخۆبوونێ بووینە وەلاتێن نمۆنە لسەر ئاستێ جیھانێ ، مینا کووریا باشوور و کرواتیا و وەلاتێن کەنداڤێ عەرەبی ....
لێ دڤان سالاندا پرانیا کارێن حکومەتا عیراقێ لسەر بەلاڤبوون و بھێزکرنا ھزرا شیعەگەریێ و دروستکرنا دووبەرەکیێ دناڤبەرا مەزھەب و نەتەوێن وەلاتی و بەردەوامیدان ب تەعریبکرنا کوردستانێ بوویە نەک دابینکرنا پێتڤیێن وەلاتیا و ئاڤەدانی و پێشڤەچوونێ . ھەرچەندە ئەڤ شەرمزاریا حکومەتا عیراقێ بۆ عیراقیان تشتەکێ نامۆ نیە ، لێ ڤان خۆ نیشاندانا ئەڤ شەرمزاری و فەشەلا وان ژلایێ سیاسی و ئیداری و ئابووری نیشا جیھانێ دا و چارەسەری ب ساناھی نابیت .