ل بیرامنه به‌ریا سێ سالان سه‌رۆكێ لیستا پارتى ل په‌رله‌مانێ كوردستانێ د دیداره‌كا خوه‌یا تیله‌ڤزیۆنێ دا ل ل هه‌مبه‌ر په‌رله‌مانتاره‌كا گۆرانێ گۆت: د داوى كۆمبوونا جڤاتا نشتیمانیا گۆرانێ پلان هاتیه دارشتن كو ئه‌ندامێن گۆرانێ وه‌ها تێبگه‌هینن ئیدى ئاڤێ گه‌له‌ك ب رێژن و گلۆپا گه‌له‌ك هه‌لبكه‌ن ژ بۆى كو بێ ئاڤى و بێ كاره‌بی دناڤا هه‌رێما كوردستانێ پتر ببیت و ده‌نگێ نه‌رازیێ وه‌لاتیان ل هه‌مبه‌ری حكومه‌تێ زه‌قتر ببیت، وى ده‌مى ژبۆ گه‌له‌ك ژ خه‌لكێ هه‌رێمێ ئه‌ڤ گۆتنا ئۆمێد خۆشناو جهێ باوه‌ركرنێ نه‌بوو، ب تایبه‌ت بۆ كه‌سێن نه پارتى، لێ نها هیچ گومانه‌كا من ل سه‌ر ئاشكرا كرنا ناڤه‌رۆكا وێ كۆمبوونا جڤاتا نشتیمانیا گۆرانێ نه‌مایه، چونكى بۆرهان مه‌جیدێ سترانبێژێ بزاڤا گۆرانێ بخوه ئه‌و گۆتن پشت راستكر و گۆت: ب هلكرنا گلۆپێن زێده و رژتنا زێده‌یا ئاڤێ ئه‌ز دژاتییا حكومه‌تێ دكه‌م. ئه‌ڤێ گۆتنا وى دناڤ سۆشیال مه‌دیا دا گه‌له‌ك ده‌نگڤه‌دا، ره‌نگه ژبۆ پتریا خه‌لكێ كوردستانێ ئه‌ڤ كریارێن ئه‌ندام و ره‌وشه‌نبیرێن گۆرانێ به‌رگه‌كێ سیاسی هه‌بیت، لێ د بیاڤى په‌روه‌رده و هزركرنێ دا مه‌ترسیێن ڤێ سیاسه‌تێ و به‌رنامه‌یا ڤێ حزبێ گه‌له‌ك مه‌زنه، هزرا وێ یه‌كێ بكه حزبه‌ك شیابیت هزرا هونه‌رمه‌نده‌كى ب ڤى ره‌نگى تیرۆر بكه‌ت كو زێده‌مه‌زاختنت ئاڤێ و كاره‌بێ كریاره‌كه دژى حكومه‌تێ؛ نها ئاستێ ئه‌ندامێن ئاسایى و كه‌سێن ئومى و نه‌خانده‌ڤان دناڤا وێ حزبێ دا ب چ ئاوایه‌كى یه؟ ئه‌گه‌ر ل پێش تیڤیان ب ئاشكه‌را بهێته گۆتن كو زیان گه‌هاندن ب مال و سامانێ ملله‌ته‌كى تشته‌ك نۆرمال و جهێ ده‌ستخوه‌شیێ یه، نها دكۆمبوونێن ڤه‌شارتیێن وێ حزبێ ب چ ئاواى پلانێ بۆ ڤى ملله‌تى و دژى كارنامه‌یێن حكومه‌تێ دهێته دارشتن؟ پرسیارا جه‌وهه‌رى ئه‌ڤه‌یه، ئه‌ڤه چ ئه‌قلیه‌ته ب ڤى ره‌نگى بریارێ بده‌ت كو هلكرنا گه‌له‌ك گلۆپان و زێده رژتنا ئاڤێ كریاره‌كه ب دژى حكومه‌تێ دهێته كرن؟ تێناگه‌هم ئه‌ڤ میتۆدا بزاڤا گۆران كار پێ دكه‌ت ل كێڤه هاتیه كو هه‌رده‌ما ئه‌و شیان زیانێ ب ملله‌تى بگه‌هینن وى ده‌مى حكومه‌ت خه‌تاباره و ئه‌و ده‌سته‌لات دێ شكیێت؟ ئه‌ز نها ب درستى گه‌هشتم وێ باوه‌ریێ كو چما گۆران هه‌لبژارتن بۆ هه‌لبژارتنێ ئاستێ وێ یێ جه‌ماوه‌رى كێمتر دبیت، ل هه‌مبه‌ر دا پارتى د هلبژارتنان دا سه‌ركه‌فتنێن مه‌زنتر ب ده‌ست د ئیخیت. نها ل كوردستانێ مه حكومه‌ته‌ك هه‌یه و سه‌رۆكێ وێ حكومه‌تێ نێچیرڤان بارزانى یه، ئه‌گه‌ر كاره‌با نه‌بوو و ئاڤ كێمبوو؛ حكومه‌ت كێماسیان بۆ خوه ڤه‌دگه‌رینیت و نابێژیت فلان حزب كاره‌با و ئاڤا مه ددزیت، لێ سه‌یر ئه‌وه حزبه‌ك ژى هه‌یه ئه‌گه‌ر كاره‌با باش بیت و ئاڤ ژى مشه بیت، كێماسیان بۆ ئه‌ندام و هونه‌رمه‌ند و ره‌وشه‌نبیرێن خوه ڤه‌دگه‌رینیت چونكى وه‌كو پێدڤی نه‌شیانه گلوپان زێده هلكه‌ن و گه‌له‌ك ئاڤێ ب هه‌روه ببه‌ن له‌ورا خه‌لك بوویه خوه‌دى كاره‌ب و ئاڤێ. ته‌ماشه‌ى ڤێ جوداهیێ بكه‌ن، حزبه‌ك كارنامه‌یا وێ یا هه‌لبژارتنان دابینكرنا كاره‌با و ئاڤێ و خزمه‌تگۆزاریان بیت، حزبه‌ك دى هه‌بیت ب پێچه‌وانه‌ڤه هزر بكه‌ت و نه‌هێلانا ئه‌و كاره‌با و ئاڤا هه‌یی ژى به‌رنامه و پلانا وێ بیت!! بینن هزرا خوه هونه‌رمه‌ند بیت و سترانێن وى ده‌باره‌ى خه‌ما ئاخ و كوردستانێ بیت، لێ ب ئاشكه‌را بێژیت من زارۆكێن خوه وه‌ها په‌روه‌رده كرینه كو ب زۆر مه‌زاختنا ئاڤێ و كاره‌بێ دژاتیا حكومه‌تێ بكه‌ن! دڤێت په‌یاما هونه‌رێ وى به‌ره‌ڤ كیژان ئاستى بربیت؟ یان ئه‌و زارۆكێ وه‌ها هاتیه په‌روه‌رده‌كرن، ده‌ما ل ژێر په‌روه‌رده‌یا بورهانێ سترانبێژ ئه‌و زارۆك مه‌زن دبن، مه‌ترسیێن وان ل سه‌ر جڤاكى چه‌ند مه‌زنه؟ ب هه‌موو باوه‌ریان ئه‌ز دبێژم، گۆران و ئه‌ندامێن گۆرانێ ناهێلن خه‌لكێ كوردستانێ ب گشتى و ئه‌ندامێن پارتى ب تایبه‌تى ژ حكومه‌ت و حزبا خوه تووره ببن، چونكى ده‌ما ئه‌ز حزبه‌كێ دبینم ب ناڤێ حزبا مه‌ده‌نى هاتیه گۆره‌پانا سیاسى و د ناڤه‌رۆكدا هه‌موو تشته ب تنێ مه‌ده‌نى نینه، بێ دوو دلى دزانم ئه‌و تیرۆرا فكریا وان ل هه‌مبه‌ر حكومه‌تێ ل سنورێ سلێمانیێ كرى دێ حكومه‌تێ بهێزتر كه‌ت نه‌ك دێ ژناڤ به‌ت، هه‌ر ئه‌ڤه ژى وه‌كریه بزاڤا گۆران به‌ره‌ڤ داویێ بچیت، چونكى ل ره‌خه‌كى ناكوكیێن ناڤخوه ل سه‌ر پاره و دابه‌شكرنا داهاتێ كۆمپانیێن وان و تاپۆكرنا گرتێ زه‌رگه‌ته هه‌یه، ل ره‌خه‌كێ دى بیرمه‌ندێن وان گه‌له‌ك ئاڤێ و كاره‌بێ ب هه‌روه دبه‌ن ژبۆى كو خه‌لكێ كوردستانێ بێ ئاڤ و كاره‌با بن، ئه‌ڤێ ژى ژبیر بكه‌ن، گۆران ل ئالییه‌كێ دبێژیت: شه‌رمزاریه مرۆڤ مالێ حزبان بخۆت، لێ ئه‌و ب نهێنى مه‌هانه 25 ده‌فته‌رێن دۆلارى ژ ئێكه‌تیێ وه‌ردگرن، ته‌ماشه‌ى ڤێ هزركرنێ بكه‌ن: بۆ كارزانه‌كێ وه‌كى من شه‌رمزاریه ل هه‌مبه‌ر ڤێ گۆتارا خوه 25 هزار دیناران ژ ده‌زگه‌هه‌كێ وه‌شانێ وه‌ربگرم، لێ ژ بۆ گۆڕان نۆرماله بێى كو چ گۆتاران ژى بنڤێسیت مه‌هانه 25 ده‌فته‌رێن دۆلارى ب نهێنى ژ ئێكه‌تیێ وه‌ربگریت. نها ژى باش دزانم بزاڤا گۆران باوه‌رى و پشته‌ڤانى ژ بۆ حكومه‌تا هه‌رێمێ زێده‌تر كریه، چونكى هه‌رده‌ما گازنده‌یێن خه‌لكى كوردستانێ ل هه‌مبه‌ر حكومه‌تێ زێده دبن، ژ نشكه‌كێ ڤه بورهان مه‌جیدێن گۆرانێ ئاشكه‌را دبن و باوه‌ریا من و خه‌لكى ب چاكسازیێن حكومه‌تێ زێده‌تر دكه‌ن، بورهان مه‌جیدێ هونه‌رمه‌ندێ گۆرانێ ئه‌ز گه‌هاندم وێ باوه‌ریێ كو كێم ئاڤى و كێم كاره‌بایا هه‌رێمێ سووچێن حكومه‌تێ نینن، به‌لكو حكومه‌ت شیایه ل گۆره‌ى پێدڤیێن خه‌لكی كاره‌با و ئاڤێ به‌رهه‌م بینن، لێ گۆران و ئه‌ندامێن وێ ب پلان و به‌رنامه زێده‌تر ژ پێدڤیێن خوه ئاڤێ و كاره‌بێ د مه‌زێخن، له‌ورا مه ئاریشه‌یا كێم ئاڤى و كێم كاره‌با نشتیمانى هه‌یه، بێگومان ئه‌ڤه نه ب گۆتنا من، به‌لكو ل دووڤ گۆتنا ره‌وشه‌نبیر و هونه‌رمه‌ندێن بزاڤا گۆرانێ بخوه.
کارزان فەقێ
