پۆستی سەرۆکی هەرێم ئەو مەرجەعەیە کە لە ئێستادا و بۆ بەرگری کردن لە دەستکەوتەکان و وەڵامدانەوەی خێرای پێلانگێڕی دوژمنان و بڕیاردان و راهی کردنی پرسە نەتەوەیی و نیشتیمانیەکان، پێویستییەکی مێژوویی و نەتەوەیی خەباتی ئەم قۆناغەی ئێستای خەڵکی کوردستانە، لە دوای رووخانی رژێمی بەعس و گۆڕانکاریەکانی ناو عێراق و بەرگری کردن لە دەستکەوتەکان و لە شەڕی داعش و پووچەڵ کردنەوەی ئەفسانەی ئەو رێکخراوە تیرۆریستیە نێودەوڵەتیە، بوونی سەرۆکی هەرێم هەموو ئەو راستییە مێژووییانەی سەرەوەی بۆ دۆست و دوژمن پشتڕاست کردەوە، ئەوەش وایکرد دوژمنان و داگیرکارانی کوردستان و دژبەرانی سەربەخۆیی بۆ نەهێشتنی پۆستی سەرۆکی هەرێم کارنامەیەکی هاوبەشی پیلانگێڕی بگرنەبەر, لەوەشدا هەر یەک لە داگیرکاران و دژبەرانی سەربەخۆیی مەبەست و ئامانجی تایبەت بە خۆیان هەبوو.
داگیرکارانی کوردستان باش لەوە گەیشتبوون کە بوونی ئەو پۆستە وەک مەرجەع بۆ خەباتی رزگاریخوازی کورد و بە تایبەتیش کە لە دەست کەسێکی ئەمین و کوردپەروەری وەک سەرۆک بارزانی دابێ، کورد دەگەیەنێتە کەناری ئارامی و سەربەخۆیی و کۆتاییش بە سیاسەتی داگیرخوازی ئەوانیش دێنێ.
هەرچی دژبەرانی سەربەخۆییش بوون، بوونی ئەو پۆستەیان لەبەردەم گەیشتن بە خواستە حزبیەکانی خۆیان بە بەربەست دەزانی، چونکە ئەوان دەیانزانی لە ئاوی لێڵدا نەبێ ناتوانن ماسی بگرن، جا بۆ ئەوەی ئەو بەربەستە نەهێڵن و ئاوەکە بە شێوەیک لێڵ بکەن کە بتوانن ماسی تێدا بگرن، ئامادەی نانەوەی هەموو جۆرە فەوزایەکی سیاسی و تەنانەت خیانەتیش بوون، بۆ ئەو مەستە و گەیشتن بەو خواستەش پەرلەمانیان لە دەزگایەکی یاسا دانانەوە کردە چەقەخانەی حزبی و مەیدانی تەراتێن و جلیتبازی سیاسی.
ئەو کەس و دەستە و گرووپانەی لە قۆناغی رزگاری نیشتمانی و لەناو گێژاوی پێلانگێڕیەکانی داگیرکارانی کوردستان، دەیانویست بەرگی فەوزای سیاسی بەبەر دیموکراتی و ئازادی بیروڕادا بکەن دوو ئامانجیان هەبوو، یەکەمیان ئیرهابی فکری و تۆمەت هەڵبەستن و جنێوفرۆشی بکەنە بەشێک لە ئازادی بیروڕا، تا لەو پەنایەڕا بتوانن کۆنەقینی سیاسی خۆیان بڕێژن، بۆ ئەو مەبەستەش چەند جنێوفرۆش و دەمشڕێکی کاڵفامیان هێنانە پێش, دوومیشان خیانەت و وڵاتفرۆشیان کردە یەکێک لە بنەما سەرەکیەکانی دیموکراتی، بۆ ئەو مەبەستەش ئەو دەستە و گرووپانەی دڵیان بۆ خیانەت و وڵاتفرۆشی لێی دەدا، بەرگی عێراقچێتیان بەسەر خۆیان هەڵکێشا و کەوتنە سووکایەتی کردن بە بەها پیرۆزەکان و خێر و خۆشی خەڵکی کوردستانیان لە عێراقی یەکپارچەدا کۆ دەکردەوە، حەشدی شەعبی دوژمن بە کوردیان بە یاسایی دەکرد و پێشمەرگەی پارێزەی کوردستانیشیان بە میلیشیا و ئەنفالچی برا عەرەبەکانیان ناو دەبرد.