پشتی خیانەتا شازدێ ئکتۆبەرا سالا ٢٠١٧ یا گرۆپێ ھێرۆیا ئیبراھیم ئەحمەدی یێن دناڤ ئێکەتیا نشتیمانیا کوردستانێ ، ژبلی کۆ بوویە ئەگەرێ داگیرکرنا پشکەکا زۆرا ئاخا کوردستانێ و شەھید و بریندار بوونا ژمارەکا زۆرا پێشمەرگەھی و وەلاتیان ، ب سەدار ھزار وەلاتی ئاوارە و دەربدەر بوون و مالێن وان ھاتنە وێرانکرن و تالانکرن ژلایێ گرۆپێن حەشدا شیعی . لسەر ئاستێ سیاسی ژی پەیوەندیێن ھەرێما کوردستانێ دگەل جیھانێ بەرەڤ لاوازیێ چوون . لدەسپێکێ زۆر بۆچوون وەسا دچۆن کۆ حکومەتا ھەرێما کوردستانێ نەشێت سەنگا ھەرێما کوردستانێ نەشێت ئاستێ پەیوەندیێن خۆ بۆ بەری راپرسیا سەرخۆبوونا کوردستانێ و خیانەتا ١٦ ئکتۆبەرێ بزڤرینیت ، کۆ ئەڤە ئێک بۆ ل ھیڤی و ئارمانجێن وی گرۆپێ خیانەتکار . چونکی چاڤێن وان خیانەتکار و دیڤەلانکێن داگیرکەرا ب وان سەرکەفتنێن سیاسی و دبلۆماسی و ئاڤەدانی و ئێمناھیا کوردستانێ رانەدبوون ئەوێن لسەر دەستێ پارتی دیموکراتی کوردستان و سەرۆک مەسعود بارزانی و نێچیرڤان بارزانی سەرۆکێ حکومەتا ھەرێما کوردستانێ بدەستڤە ھاتین ، براستی ھەتا رۆژا ئەو خیانەت ھاتیە کرن ، ئاستێ دبلۆماسیەتا ھەرێما کوردستانێ ل چارچوڤێ ھەرێمان دەرچوبوو بەردەڤ ئاستێ پەیوەندیێن دناڤبەرا وەلاتان دا .
لێ ھەمی بۆچوون و خەوێن خائین و نەحەزا یێن ب مرنا دبلۆماسیەتا نیڤ دەولەتی و ھەرێمایەتیا ھەرێما کوردستانێ ددیتن بەرۆڤاژی کرن و لسەر دەستێ رێزدار نێچیرڤان بارزانی سەرۆکێ حکومەتا ھەرێما کوردستانێ لدەمێ کورت دا و لسەر ئاستێ وەلاتێن زلھێزێن جیاھانێ و ھەرێمێ و سازیێن نیڤ دەولەتی ھاتە پێشوازیکرن .
ژوان سەرەدانان پێشوازیکرنا قەداسەتا پاپایێ فاتیکانێ فرانسیس ل ١٢/١/٢٠١٨ کۆ مەزنترین کەسایەتیێ ئایینێ مەسیحی یی جیھانێ و خودان پێگەھەکا ھەری بلندە لسەر ئاستێ جیھانێ و کۆمبوونێن دناڤبەرا ھەردوو ئالیان ، دیسان دڤێ سەرەدانێ دا چەندین کۆمبوونێن دیتر ھاتینە کرن مینا دگەل وەزیرێ دەرڤە یێ فاتیکانێ .
ھەر وەسا سەرەدان و کۆمبوونا سەرۆکێ حکومەتا ھەرێما کوردستانێ بۆ وەلاتێ ئیرانێ ل ٢٠ / ١/٢٠١٨ .
سەرەدانێن ڤێ دووماھیێ ژی بۆ وەلاتێن تورکیا و ھولەندا و لسەر ئاستێ کەسایەتیێ، ئێکێ ھاتیە پێشوازیکرن ل ٩ و ١٠ /٧/٢٠١٨ .ژبلی وان چالاکیێن خۆرتکرن پەیوەندیێن ھەرێمیچ دگەل دەرڤە د رێکا پەیوەندیێن تەلەفونی یان یا پێشوازیا وی ل بالیۆز و قونسلێن وەلاتان و نوونەرێن سازیێن نیڤ دەولەتی .
رەنگە بۆ بەری شازدێ ئکتۆبەرێ ئەڤ چالاکیێن سیاسی گاڤەکا نۆرمال بن ، لێ بۆ پشتی وێ خیانەتێ دەسکەفتێن مەزنن . چونکی حکومەتا عیراقێ ھەمی گاڤ و ھەولێن خۆ مەزاختن بۆ گەماروودانێن ھەرێما کوردستانێ ژلایێ سیاسی و دبلۆماسی ، سەرەرای گەماروویێن ئابووری و بازرگانی .
رەنگە بۆ خەلکەکێ سادە و دوور ل سیاسەتێ خۆرتکرنا پەیوەندیێن دناڤبەرا ھەرێمێ و وەلاتێن جیھانێ دڤان کودانان دا نۆرمال و سادە بن ، لێ د بنەرەت دا گاڤ و دەسکەفتێن مەزن ، چونکی ھەرێما کوردستانێ کەفتبوو دکاودانەکێ دژوار و بەرتەنگ دا ، ژبەرکۆ ب ئۆکەیا ئێک ژ مەزنترین حزبێن کوردستان ( ئ . ن . ک ) حەشدا شەعبی و لەشکرێ داگیرکەرا ھاتە سەر ھەرێما کوردستانێ و دژی دەسکەفتێن نەتەوی و نشتیمانیێن ھەرێما کوردستانێ و گاڤێن سەرخۆبوونا کوردستانێ راوەستان . لێ سەرەرای ڤان گەماروویا و ھێرشێن لەشکری ، ھیڤیا دەولەتا عیراقێ بۆ ھەلوەشاندنا ئەنجامێن راپرسیا سەرخۆبوونا کوردستانێ نەھاتنە ھەلوەشاند ، چونگی پرۆسەیەکا یاسایی و دەستووری و دیموکراسی بۆ و مافەکێ سرۆشتیێ خەلکێ کوردستانێ بوو ، لسەر ئاستێ جیھانا دیموکراسی و سازیێن نیڤ دەولەتی ژی ئەڤ رەنگە راپرسیە مافەکێ سرۆشتیێ ملەتانە و دژی بنەمایێن وان نینە . ژلایەکێ دی خورتکرنەڤان پەیوەندیێن ھەرێما کوردستانێ دگەل وەلاتان ئاماژەنە کۆ ئەو پەیوەندیێن بەری ڤان روودانان لسەر بنەمایەکێ مۆکۆم و پاراستنا بەرژەوەندێن ھەردوو ئالیان لسەر دەستێ سەرۆکێ ھەرێما کوردستانێ ھاتینە ئاڤاکرن لسەر بنیاتەکێ مۆکۆم و ستراتیژی بوونە . ژلایەکێ دیتر کەسایەتیا رێزدار نێچیرڤان بارزانی سەرۆکێ حکومەتا ھەرێما وەک کەسایەتیەکێ سیاسی یێ مەزن و بلیمەت دیار دبیت ، نە تنێ لسەر ئاستێ ھەرێما کوردستانێ و عیراقێ بەلکی لسەر ئاستێ جیھانێ ، جھێ رێزگرتنێ و باوەریێ یە و پێگەھەکا تایبەت ھەیە . ئەگەر نە نەدشیا لدەمەکێ ھۆسا یێ کورت پێگەھێ سیاسی یێ ھەرێما کوردستانێ بھێز بکەتەڤە و وەلاتێن جیھانێ داخازیێن حکومەتا عیراقێ بۆ بڕینا پەیوەندیێن سیاسی و ئابووری دگەل ھەرێما کوردستانێ فەرامۆش بکەن .
ئەڤ دبلۆماسیەتا ھەرێما کوردستانێ یێن پشتی خیانەتا شازدێ ئکتۆبەرێ لسەر دەستێ سەرۆکێ حکومەتا ھەرێما کوردستانێ دەسکەفتێن مەزنن بۆ خەلکێ کوردستانێ ، چونکی بەردەوامی دا سەرکەفتنێن دبلۆماسیەتێن بەری وێ بۆ ناساندنا ھەرێما کوردستانێ و پشتەڤانیا دوزا سیاسی و ئابووری، نھو ھەرێما کوردستانێ بڤان چالاکیا مینا دەولەتەکا سەربخۆ لسەر ئاستێ جیھانێ بناڤ و دەنگ کەفتیە و باوەر ناکەم ھەرێمێن دیتر یێن جیھانێ بڤی رەنگی ھاتبنە نیاسین و پسیارێ ل خۆ بکەین ، ئەرێ ئەم چەند ھەرێم جیھانێ یێن مینا ھەرێما کوردستانێ دناسین ..! .
ئەڤەژی ھەمی ب سیاسەت و ستراتیژیا پارتی دیموکراتی کوردستانە .