پارڤەکرنا کوردستانێ ل سەر دەولەتێن دەڤەرێ ژ ئالیێ دەولەتێن سەردەستێن جیھانێ و دیف بەرژەوەندیا خوە و دەولەتێن ئیقلیمی , کەشەک زەحمەت خولقاندیە دناڤبەرا ھەر چوار پارچێن کوردستانێ دا . ھەبونا رژێمێن سیاسیێن جودا و مەزھەبێن شیعە و سوننە و نەتەوێن تورک و عەرەب و فارس , بو دەمێ زێدەتر ژ چەرخەکێ رەنگ ڤەدەنەک نەرێنی ل گەلێ کورد ژی کریە د ھەمی بیاڤەکێ ژیانێ دا. ھەردەم ئەڤ دەولەتێن داگیرکەر ژی ئێک ھەلویست بوینە ل دژی پرسا کورد و داوی جار ژی مە ل پشتی ریفراندوما سەربەخویێ دا دیت ب چ ئاوا تورک و عەرەب و عەجەما ھەمی پرسگرێکێن خوەیێن سیاسی و ئابوری و سنوری و مەزھەبی ل دیواری دان و بونە ئێک دەنگ و دەست بو ھندێ کورد ب مافێن خوە نەگەھیت . ڤێ رەوشا کو کوردستان پێ کوت و بەندکری ھەتا نھا ژی سەردەستێن دونیایێ و ئیقلیمی ب ھەمی شیان بەرەڤانیێ ژێ دکەن. د چوار وەلاتێن جودا دا و پرانیا تشتان تێدا گەل وەلاتێ دیترجودا , وی دەمی ل سەر گەلێ کورد ژی فەرزدکەت د ھەر پارچەکا کوردستانێ دا دیتنەک تایبەت بو رەوشێ ھەبیت و یا نھا کوردستانا باشور پێ دا دەرباز دبیت باکور و روژھەلات و روژئاڤا پێ نەگەھشتینە و ئەڤ چەندە دبیتە ئەگەرێ ھندێ کو رەوشا ھەرێما کوردستانێ ل بەرچاڤ بێتە وەرگرتن.
تورکیا دەولەتەکە ل سەر میراتێ خیلافەتا ئوسمانی ھاتیە ئاڤاکرن و نھا ژی سەردارێن تورکیا خوەدیێ ھەمان دیتنن بو رەوشا دەڤەرێ !! لێ نە ئەو دەم و نە ئەو میتود ل بەردەستن . بەلێ ژ ئالیێ نەتەوەپەرێسیێ ڤە تورکیا نوی ل سالا ١٩٢٣ وەرە ھەتا نھا بەردەوام ل دروستکرنا دوژمنان گەریانە و ھندەک جاران دوژمنێن وەھمی بو پاراستنا دەولەتا خوە دروستکرنە.
ھێرش و توپبارانا بەردەوام یا ھێزێن تورک بو سەر ھەرێما کوردستانێ ھیجەتەک ھەیە ئەو ژی ھەبونا پەکەکێ یە ل ھەرێمێ دا و ئەنجامدانا چالاکیێن سەربازیە دژی تورکیا و ڤەگەریان بو ڤان جھان تایبەت قەندیل . لێرەدا ئەزمونێ حوکمداریا کوردستانێ ب ھەمی کێم و کورتیێن خوە ڤە لێ شیایە ل ئاستێ نەتەوەی دا کوردان ب جیھانێ بدەتە نیاسین و بویە مالا مەزن بو ھەمی کوردەکێ و ڤێ چەندێ سەر ئێشە بو تورکیا و ئیرانێ دروستکریە و چو ھیجەتەک ل دەستی دا نینە کو بشێن ئەزمونێ کوردستانێ پێخنە مەترسیێدا ژ بلی ھیجەتا ھەبونا ھێزێن پەکەکێ .
ئەگەر ھەلویستێ حکومەتا ھەرێما کوردستانێ بخوینن کو زور جاران ژ ئالیێ پەکەکێ و ئالیگرێن وێ ڤە ل ھەرێما کوردستانێ ریبریێ رەخنا دبیت , دیار دبیت کو حکومەتا ھەرێما کوردستانێ وەک خوەدیێ بەرپرسیاریێن سیاسی و یاسایی و دەستوری دڤێت ببیتە باشترین ھەفسی بو وەلاتێن دەوروبەر . ھەروەسا حکومەتا ھەرێمێ نونەرێ گەلەکێ بن دەست و خوەدیی کێشەیەکا نەتەوەی پێتڤی ب پەیوەندیێن دبلوماسیە ل گەل دەولەتێن جیھانی و ب تێکچونا ڤێ ھەرێمێ ئەو دەرگەە ژی نامینیت کو دەنگێ کوردان ب جیھانی بگەھیت. ژ ئالیێ دیتر ڤە خەکێ ھەرێمێ پێتڤی ب قوتێ روژانەیە و پرانیا بەرھەمان و بازرگانیا نەفت و گازا ھەرێمێ ل گەل تورکیایە و ئەڤ چەندە ژی پێتڤی ب ھەبونا پەیوەندی و ھەفسیەتا باش ھەیە بو ھندێ پێگەھێ سیاسی و ئابوری یێ ھەرێما کوردستانێ ل عیراق و جیھانێ دا یێ بھێز بیت.
دەمێ نێچیرڤان بارزانی سەروک وەزیرێن حکومەتا ھەرێما کوردستانێ دبێژیتە پەکەکێ خەتایێت وەنە کو تورکیا بویە ئەگەرێ تێکدانا رەوشا ھەرێمێ تایبەت دەڤەرێن سنوری و گەفا ھێرشکرنێ دکەت بو سەر قەندیل , زور کەس ب تاگریا تورکیایێ خەتابار دکەن . بدیتنا من باشترین ھەلویستێ نەتەوەیی یە سەروکێ حکومەتێ گرتیە بەر ژ بەرکو ب مانەڤا ھەرێمێ ب ئارامی ل بەرژەوەندیا ھەمی کوردەکێ یە و تورکێن فاشیست ئەڤ چەندە نەڤێت ھەروەسا ئەو رولێ کورد نھا ل دەڤەرێ دبینن ب مانەڤا ھەرێمەکا بھێز ڤەگرێدایە . ژ بلی ھندی حکومەتا ھەرێما کوردستانێ چەندین جاران پێکولا ھندێ کریە کو ببیتە فاکتەرێ چارەسەریێ ل باکورێ کوردستانێ , و فەرە بژاردەیا سیاسی ببیتە ستراتیجا پەکەکێ و رێکێ ب ھێزێن سیاسیێن باکور بدەت پرسگرێکا نەتەوەی پێش ببەن و رێزێ ل سەروەریا حکومەتا ھەرێما کوردستانێ بگریت و نەبیتە باشترین ھیجەت بدەستێن تورکیا ڤە بو ھێرشکرن و مەترسی ئێخستنە سەر خەلکێ کوردستانێ .