ئەزموونی هەرێمی كوردستان كە بۆتە جێی ئومێدی هەموو كوردان لەسەر هەموولایەكە پارێزگاری لە دەسكەوتەكانی بكەن و وەك هەنگاوێك بەرەو دامەزراندنی كیانێكی نەتەوەیی لێیبڕوانن، ئەمەش ئەركی هەموو كوردستانێیكی دڵسۆزو وڵاتپارێزە، لەبەرئەوەی چارەنووسی هەر هەموو لایەكمان بەندە بەو ئەزموونەوە بۆیە دژایەتیكردنی ئەو ئەزموونە شەڕكردنە لەگەڵ دواڕۆژی خۆمان، مەترسییەكی مەزنیشە بۆ سەر ئاسایش و دواڕۆژی گەلی كوردستان، لە تەواوی جیهاندا دەسەڵاتێك نییە لەلایەن گەلەكەیەوە تێبینی لەسەر نەبێت، لەسەر هەموو لایەكە كەوا بەشێوازێكی سەردەمییانە سەرنج و تێبینی و رەخنەكانیان بۆ باشتركردنی ئیدارەكردنی وڵات بخەنەڕوو.وەك رابردوو تا ئێستاش ناحەزان هەمیشە لە هەوڵی ئەوەدان پێگەی كوردستان لاواز بكەن و بەردەوام گرفتی جۆراوجۆری بۆ دروست دەكەن، واتە بەردەوام لە رەوشێكی ناسك و هەستیار داین لەبەرئەوەی تا ئێستا قۆناخی رزگاری نیشتمانیمان نەبڕیوە، سەرەرای ئەنجامدانی هەڵبژاردن بەڵام ئاماژەكان و دەستێوەردانەكانی وڵاتانی ئیقلیمیی عێراق بەو هەڵسو كەوتانەی ئێستای بەرەو تاكڕەوی و دكتاتۆرییەت هەنگاو دەنێت و وەكو رژێمەكانی پێشووی عێراق هەركاتێ بەهێز بێتەوە دژی كورد دەوەستێتەوە، لەم رووەوەش ئێمەی كورد ئەزموونێكی تاڵمان لەگەڵ رژێمە یەك لەدوای یەكەكانی ئێراقدا هەیە، هەركاتێ ئێراق بێهێزو توانا بووبێت پەنای بۆ كورد هێناوەو دیالۆگی لەگەڵدا كردووە، كە هێزو توانای پەیدا كردبێتەوە دژی كورد وەستاوەتەوە، ئەگەر سەیر بكەین لەڕابردوودا تەواوی دەسەڵاتەكانی ئێراق لەسەرەتای گرتنە دەستی جڵەوی دەسەڵات جۆرە نەرمییەكیان نواندووەو پاشان كە دەسەڵاتەكەیان بەرەو بەهێزی رۆیشتووە دژی گەلی كوردستان وەستاونەتەوە، ئێمە كە لە رەوشێكی وادابین دەبێ بە وریاییەوە مامەڵە لەگەڵ واقیعی خۆماندا بكەین و هەموو لایەكمان یەكدەنگ و یەكهەڵوێست بین بۆ زیاتر بەرەو پێشبردنی ئەزموونەكەمان و یەكدەستیش بین بۆ بەرەنگاربوونەوەی مەترسییەكان، بۆیە بۆچارەسەركردنی گرفتە ناوخۆییەكانمان نابێ پەنا بۆ كاردانەوە ببەین، بەڵكو دەبێ لەرێی رەخنەوە گرفتەكان بخەینە روو و چارەسەریشیان بۆ بدۆزینەوە. بزاڤی رزگاریخوازی كوردستان بەدریژایی مێژوو رووبەرووی پیلانگێری و خیانەتی گەورە بۆتەوە یەكێك لەو پیلان و خیانەتكارییە ،پیلانگێری و خیانەتە مێژوویەکەی ١٦ی ئوکتۆبەر ھەرێمی کوردستان دووچاری رەوشێکی نەخوازراو بۆوە ئەوەی گرنگە ئەوەیە نابێ ھیچ كاتێ‌ بە رەشبینیەوە سەیری ئایندەمان بکەین و دەستەوەستان بین ،گەر چی لە دوای ئەم خیانەتەیە کەلێنێکی گەورە دروست بوو بەڵام لەگەل ئەمەشدا دەبێ دلنیابین کە ئاسۆیەکی رووناکمان لە بەردەم دایەو بە ئیرادەوە ھەنگاو بۆ پێشەوە دەنێن کەلای ھەمووانیش روون و ئاشکرایە کە ئەمە یەکەم جار نیە گەلی کوردستان دووچاری ئەم دۆخە دەبێت بەڵکو بەدرێژایی مێژوو بزوتنەوەی رزگاریخوازی گەلی کوردستان بەم شێوەیە گوزەری کردوە و ھەرواز ونشێوی بینیوە ھەر چەندە ئەمەی ئەم جارەیان سەرکێشی و شکستی عسکەری و سیاسی نەبوو بەڵکو خیانەت وپیلانێک بوو بە پالپشتی دەستێکی ناوەخۆی کوردستان لەگەل ئەمەشدا سوپاس بۆ خوای گەورە و قارەمانیەتی ھێزی پێشمەرگەی کوردستان نەیان توانی ئیرادەی گەلی کوردستان بشکێنن بەڵکو لەماوەی رابردوودا پێشمەرگە وخەڵکی کوردستان خۆراگرانە توانیان دەستکەوتەکان بپارێزن ورێگەیان نەدا خەونی دوژمنان بێتە دی کەئەمەش وای کرد کلیلی سەرکەوتن نزیک ببێتەوە چونکە لە 25/9/2017 رابردوو دوایی سەد ساڵ لە خەبات وتێکۆشان توانرا گەورەترین دەسکەوتی مێژوویی تۆمار بکرێت و ریفراندۆم ئەنجام درا و دەنگی زۆرینەی کوردستانیانی بەدەست ھێنا کەئەمەش بووە سەنەدێکی نەتەوەیی لەبەرامبەر ھەموو جیھان کە زوو یا درەنگ بەرھەمەکەی سەربەخۆیی کوردستان دێتە دی وھیچ ھێزو لایەنێکیش ناتوانێت رێگری لە بەدیھێنانی ئەم ئامانجە گەورەیە بگرێت، چونكە ئیرادەی بەهێزی گەلی كورد و ویستی سەربەخۆیخوازی زاڵە بە سەر هەموو پیلانگێرییەكدا .. لە بیستەكانی سەدەی ڕابردوو، بەغدا بوو بە پایتەختی ئەو وڵاتە عەرەبییەی كە بە پێكەوە لكاندنی هەردوو ویلایەتی عوسمانی، بەغدا و بەسڕە، بەفیتی ئینگلیز دروستكرا. پاشان ویلایەتی موسڵیشیان بە زۆر پێوە لكاند و خەونی دروستكردنی دەوڵەتی كوردییان لەو ویلایەتە، لە بێشكەدا تاساند. لە ماوەی ئەم سەد ساڵەدا هەرچی بەغدا لە دەستی هاتبێت، كردوویەتی، بۆ ئەوەی كورد لە بۆتەی عێراقی عەرەبیدا بتوێنێتەوە و ناسنامە كوردستانییەكەی كاڵبكاتەوە. چونكە هەمیشە مەترسیی ئەوەی هەبووە كوردی بەلەنگاز بۆ مافی خۆی وەدەنگبێت و هاوار بە نەمانی داگیركاری بكات.بەغدا هەر بە تەنیا لەسەر ئاستی ناوەخۆیی دژی مافەكانی نەتەوەی كورد نەوەستاوەتەوە، بەڵكو لەسەر ئاستی هەرێمی و نێودەوڵەتیش هەمیشە هاوپەیمانێكی دەستلەسەرسنگ بووە بۆ هەر ڕێككەوتنێك لە دژی بزاوتی كوردی. بەڵگەش پەیمانی سەنتۆیە كە بە پەیمانی بەغدا ناسراوە لە مێژوودا و مەرامێكی سەرەكی پشتی پشكداریی عێراق لەو پەیمانە، ڕێگری بووە لە دروستبوونی قەوارەیەكی سیاسیی كوردی.بەغدایەك لە ماوەی سەد ساڵی ڕابردوودا هەر نەخشەی بەعەرەبكردنی كوردستانی كێشاوە و هەر كوردی لەسەر خاكی خۆی دەركردووە و عەرەبی لە شوێن نیشتەجێكردووە. بەغدایەك كە لەو سەد ساڵەدا هەزاران لاوی كوردی تێدا خراوەتە بەندیخانە و سێدارە و شكەنجە نەبێت چی دییان پێڕەوانەبینراوە. بەغدایەك كە هەر لەوێوە ڕەشەبای مەرگی ئەنفال و كیمیا و باهۆزی وێرانی و كوشتن بەرەو چیاكان هەڵیكردووە. هەمان بەغدایە كە 13 ساڵە كورد لەوێ نەیتوانیوە هیچكام لە داخوازییە ڕەوایە بەدی بێنێت ئەرێ دەبێت چاوەڕێی ئەوە لەو بەغدایە بكەین مل بۆ مافەكانی كورد كەچ بكات و پشت بكاتە ئەو مێژووەی كە ستەمكاران بۆیان نەخشاند و نەیانهێشت دادستان بێت .كێشەی كورد كێشەی خاك و نەتەوەیە. پێوەگرێدانی مافە نەتەوەییەكان بە جێبەجێكردنی دەستوور و قایمكردنی پێگەی كورد لە بەغدا، جگە لە كات بەفیڕۆدان و خۆخەڵەتاندن شتێكی دیكەی لێ چاوەڕێ ناكرێت و دەرەنجامگەلێكیشمان لێی چنیوتەوە، كە كەس لەسەر ئەوە ئێرەییمان پێنابات. كێشەی كورد هەرگیز لە بەغدا بە چارەسەر ناگات، بەڵكو دەبێت لەسەر خاكی كەركووكی كوردان، یان هەر بستە خاكێكی دیكەی باشوور، ئەو پرسە یەكلایی بكرێتەوە.گەر دەسەڵاتدارانی بەغدا بە رێگەی دەستوور پرسی خاكی كوردستان بە تایبەت كەركووك و ناوچەكە كوردستانییەكان چارەسەر نەكەن ئەوا بە دڵنییاییەوە ئارٍامی و سەقامگێری نایەتەدی . لەسەر ئێمەی كورد پێویستە بۆ گەیشتن بە ئامانجەكانمان گوتاری سیاسیمان یەكبخەین و بە بیرو ستراتیژێكی نەتەوەییانە هەڵسوكەوت لەگەڵ ئەم بارودۆخە هەستیارە بكەین،بۆ پاراستنی دەستكەوتەكان و بەرەو بەدیهێنانی ئامانجەگەورەكەمان ..