نێچیرڤان بارزانى هه‌موو ده‌رگه‌هێن گرتى ڤه‌كرن
به‌ده‌ل گابێركى
وه‌كى یا دیار كو ئه‌مریكا بهێزترین ده‌وله‌ته ل سه‌ر ئاستێ هه‌موو جیهانێ و سه‌ركێشا هه‌موو جیهانێ یه د هه‌موو بیاڤان دا بگره هێزا ئابۆرى و سیاسى و سه‌ربازى و چه‌ندین بیاڤێن دیتر.
بۆ هه‌رێما كوردستانێ ده‌وله‌ته‌كا وه‌كو یا ئه‌مریكا پشته‌ڤانیا وێ بكه‌ت گه‌له‌ك یا گرنگه وه‌كو ئاڤێ و هه‌ناسێ یه بۆ مرۆڤه‌كى و یا گرنگه هه‌رێما كوردستانێ رۆژ بۆ رۆژێ ڤان په‌یوه‌ندییان ب پارێزیت و بهێز بێخیت، ژ به‌ركو هه‌بوونا په‌یوه‌ندیێن بهێز دگه‌ل ئه‌مریكا ئانكو هه‌بوونا هه‌رێمه‌كا بهێزه و پاراستیه..
دیسان خالا گرنكتر ئه‌وه كو ل رۆژا 6-7-2018ێ ئه‌مریكا ب ئاماده‌بوونا نیچیرڤان بارزانی سەرۆکوەزیرێ ھەرێما کوردستانێ و دۆگلاس سیلیمان بالیوزێ ئەمریکا ل بەرێ بنیاتێ کونسولخانەیا نوو یا ئەمریکا ل ھەولێرێ دانا كو دبیته مه‌زنترین كونسولخانه ل سه‌ر ئاستێ هه‌موو جیهانێ ب پێنگاڤه‌كا مه‌زن و دیرۆكى دهێته هه‌ژمارتن، ژبه‌ركو ده‌مێ ئه‌مریكا كونسولخانه‌كا مه‌زن ب ڤى ره‌نگى ل پایته‌ختێ هه‌رێما كوردستانێ دانیت رامانا وێ ئه‌وه كو ئه‌مریكا ل به‌ره بۆ هه‌تا هه‌تا ل هه‌رێما كوردستانێ ب مینیت و ئه‌ڤ چه‌نده‌ژى به‌لگه‌یه ل سه‌ر مانا هه‌رێما كوردستانێ وه‌كو هه‌رێمه‌كا ئارام و ئاڤه‌دان و بێ گومان كه‌س نه‌شێت رولێ سه‌رۆكێ حكومه‌تێ پیش چاڤ نه‌كه‌ت د درستكرنا ڤان په‌یوه‌ندیێن بهێز دگه‌ل ئه‌مریكا.
بێ گومان دۆگلاس سیلیمان بالیوزێ ئەمریکا ل ئیراقێ ل دەمێ دانانا بەرێ بنیاتێ کونسلخانەیا ئەمریکا ل ھەولێرێ دیاكر ئەمریکا و ھەرێمێ پەیوەندیێن بھێز ھەنە و گۆت ژی، د داھاتی دا دێ چەندین کارێن نوو و جیاواز ل ھەرێما کوردستانێ ئەنجامدەین ئه‌ڤه‌ژى وێ چه‌ندێ دگه‌هینیت كو ئه‌مریكا چه‌ندین ئارمانجێن دیتر ل هه‌رێمێ هه‌نه.
دیسان نێچیرڤان بارزانى دیاركربوو كو دروستکرنا ڤی پرۆژێ مەزن، نیشانا پشتەڤانیەکا مەزنە و خوەشحالییا خوە ب پێشڤەچوونا پەیوەندیێن ھەولێر و واشنتۆنێ نیشان دا و کونسولخانەیا نوو یا ئەمریکا ل ھەولێرێ، دێ ل سەر رووبەرێ دو سەد ھزار مەتران ھێتە ئاڤاکرن و کوژمێ شەشسەد ملیۆن دۆلاران بۆ ھاتییە تەرخان کرن و چاڤەرێیە د دەمێ چار سالان دا ب دوماھی بھێت.
ل دوماهیكێ یا گرنگه پشته‌ڤانیه‌كا ته‌مام ل بزاڤێن سه‌رۆكێ حكومه‌تێ نێچیرڤان بارزانى بهێته‌كرن، ژبه‌ركو هه‌ر ئه‌و بوو ده‌مێ پشتى روودانێن 16ى ئوكتۆبه‌رێ هه‌موو ده‌رگه‌هێن گرتى هه‌مبه‌رى هه‌رێما كوردستانێ ڤه بكه‌ت.
