ناھێتە ڤەشارتن ڤایرۆسا گەندەلیێ ھەمی جھەکێ بەرفرەە د ھەمی بووارێن کارگێریا ھەرێما کوردستانێ گرتیە ، خەلک و حکومەت و ئۆپۆزسیۆن ل ھەرێما کوردستانێ داپێدانێ بۆ ھەبوونا ڤێ ڤایرۆسێ دکەن ، ھەمی ژی دگەل رێکخراو و سازیێن دیتر ل بەرفرەھبوونا ڤێ ڤایرۆسا کوشندە بەرپرسن ، ھەر ئێک لدویف سەنگا خۆ .
ل سالێن بۆری سەرۆکێ ھەرێما کوردستانێ و سەرۆکێ حکومەتا ھەرێما کوردستانێ چەندین جارا ھەولێن کۆشتنا ڤێ ڤایرۆسێ دانە ، لێ وەکی پێتڤی د سەرکەفتی نەبوونە . ھژمارەکا حزبێن کوردستانێ بتایبەت ئەوێن بەری نھو ئۆپۆزسیۆن وەک ( گۆڕان و گۆمەلا ئیسلامی ) ب تایبەت گۆڕان ، نیشا خەلکێ ھەرێمێ ددا کۆ حزبەکا چاکساز خازن و رێبەریا پرۆزا چاکسازی ل ھەرێما کوردستانێ دکەن و ھەردەم پارتی دیموکراتی کوردستان وەک حزبا دەسھەلاتدار گۆنەھبار دکر ب گەندەلێ و ئەگەرێ سەرنەکەفتنا پرۆژە و بریارێن چاکسازیێ .
نھو پشتی پارتی دیموکراتی کوردستان ب رژدی ھاتیە دناڤ پرسا گەندەلیێ و پرۆژەکێ ھەمەلایەنە بۆ بنبڕکرنا ڤێ پرسێ گەھاندی یە پەرلەمانێ کوردستانێ . پرانیا حزبێن دیتر یێن کوردستانی چ ئەوێن دناڤ حکومەتێ دا یان ئەوێن لدەرڤەی حکومەتێ دژبەریا ڤی پرۆژێ چاکسازیێ دکەن و رێگریێ لھەمبەر دەربازبوونا وی دگرن ل پەرلەمانێ کوردستانێ ، بتایبەت بزاڤا گۆڕان و پشکەکا ئێکەتیا نشتیمانی و ھندەک حزبێن دیتر .
ئەڤ دژبەریا وان بۆ رێگریکرن ل گەندەلی و نەدادوریا ل کوردستانێ ھەر ، دیار دکەن نە ئەڤ حزبە چاکسازخان ، نەژی دڤێن دادوەری بەرپا ببیت . بەلکی حزبێن گەندەلکارن و پشکەکا مەزنن ل وێ گەندەلی و نە عەدالەتیا ساڵێن بۆری . ژلایەکێ دیتر ڤێ پرسێ دکەنە پرسەکا سیاسی و موزایدا سیاسی لسەر دکەن ، ژبەکۆ ژلایێ پارتی دیموکراتی کوردستان و سەرۆکێ حکومەتا ھەرێما کوردستانێ رێزدار نێچیرڤان بارزانی ھاتیە ئاراستەکرن و داکۆکیێ لسەر دەربازبوونا وێ دکەن ل پەرلەمانێ کوردستانێ ، سەرگرتنا ڤی پرۆژەی ب دەسکەفت و سەروەریەکا مەزن بۆ پارتی و حکومەتا ھەرێما کوردستانێ دێ ھێتە تۆمارکرن ، بێ کۆ مفایێن ھەرە مەزن بۆ بەرژەوەندا گشتی یا خەلکێ کوردستانێ و ئابوورێ ھەرێمێ لبەرچاڤ بگرن . ئەگەر پارتی یا پشکدار ل گەندەلیێ ، زەرەرمەند ترین حزبە لسەر بجە ئینانا ڤی پرۆژەی چونکی دەسھەلاتدارە . لێ دیارە ھەمی پرۆپاکندێن وان یێن سالێن بووری ب تاوانبارکرنا پارتی ب گەندەلیەکا خەیالی بۆ سەردابرنا خەلکی بوونە و راکێشانا سرنجا خەلکی بۆ لای حزبا خۆ . لێ ئەڤ دژبەریا وان دیاردکەت مەزنترین گەندەلکار ئەو حزب و لایەنن ئەوێن دژی ب یاساکرنا گاڤێن چاکسایێ و بنبڕکرنا گەندەلیێ و چەسپاندنا یاسایێ و زڤراندنا دادوەریا جڤاکی رادوەستن ، نەک پارتی و حکومەتا ھەرێما کوردستانێ .
ئەگەر راستە دژی گەندەلیێ نە و کەسانێن پاک و بژوینن ، بلا کەرەمکەن بۆ خزمەتا بەرژەوەندا گشتی پشتەڤانیا پارتی بکەن بۆ تێپەربوونا پرۆژێ چاکسایێ ل پەرلەمانێ کوردستانێ .
پێتڤی یە پارتی دیموکراتی کوردستانی و حکومەتا ھەرێما کوردستانێ داکۆکیێن جدی تر بکەت بۆ تێپەراندنا ڤێ یاسایا چاکسایێ ل دەمەکێ زۆری . ئەگەر ئەو لایەن بەردەوام بوون لسەر رێگریکرنێ ، پێتڤی یە ، حکومەتا ھەرێما کوردستانێ لسەر بنەمایێن وی رەشنڤیسێ یاسایا چاکسایێ ، بریارێن ئێکلاکەر بدەست بۆ بنپرکرنا گەندەلیێ و سەروەریا یاسایێ ، چونکی خەلکێ کوردستانێ دڤێت چاکسازی بێنە کرن و پشتەڤانیا چاکسازخازایە .
دیارە وان حزبان دڤێت دەمی بکوژن ، لسەر دەمێ ڤێ کابینا حکومەتا ھەرێما کوردستانێ چاکسازی نەھێنە کرن ھەتا کۆ ھەلبژاردنێن پەرلەمانێ کوردستانێ بھێنە کرن . ئەز باوەرم پشتی ھەلبژاردنان ژی ئەڤ حزبە دێ بەردەوام بن لسەر دژبەریاھەر پرۆژەکێ د بەرژەوەدیا گشتی دا بیت ، ئەگەر پارتی پێشکێش بکەت ، ئانکۆ دژی پارتی نە ..! . ھەر وەکی لڤان سالێن بووری دژبەریا پارتی کریە بۆ پرسێن نەتەوی و نشتیمانی و بووینە ھاریکار و پشتەڤانێن حکومەتا عیراقێ و وەلاتێن ھەرێمی بۆ درۆستکرنا ئاستەنگا لھەمبەر پارتی و حکومەتا ھەرێما کوردستانێ ، وەک بڕینا مۆچە و بۆدجێ ھەرێمێ و شەرعیەت دانا حەشدا شەعبی و داگیرکرنا پشکەکا زۆرا ئاخا کوردستانێ ل شازدێ ئکتۆبەرا سالا ٢٠١٧ و دژبەریا پرۆسا راپرسیا سەرخۆبوونا ھەرێما کوردستانێ و گۆنەھبارکرنا پارتی ب سەختەکاریان ل ھەلبژاردنێن جڤاتا نوونەرێن عیراقێ یێن (١٢ / ٦ / ٢٠١٨) و ل داھاتی ژی دا دێ لسەر ڤی ھەلویستێ خۆ یێن دوور ل بەرژەوەند پارێزیا نەتەوی و نشتیمانی و جڤاکی دێ بەردەوام بن .