گەلی كورد هیچ كات متمانەی بە عێراقی شۆڤێنی ،مەزهەبی و میلیشاییی نەبووە و نابێ..
رێبوار حەمەلاو شوانی
دەیان ساڵە ڕۆژهه‌ڵاتی ناوەرٍاست وه‌ك ناوچه‌یه‌كی ده‌وڵه‌مه‌ندی بە نەوت و وزه له لایه‌ك و، بازاڕێكی فراوانی ساغبوونه‌وه‌ی كاڵاكانی وڵاتانی خاوه‌ن به‌رژه‌وه‌ندیی له لایه‌كی تره‌وه، بووه به ناوچه‌یه‌كی گه‌رمی ململانێی جیهانی و بلۆكبه‌ندی میحوه‌ری، له‌كاتیكدا هه‌ندێك جار ده‌نگێك له سه‌روه‌رانی جیهانه‌وه به‌ر گوێمان ده‌كه‌وێت و ده‌ڵێت، جیهانی پێویستی به جۆریك له هاوسه‌نگی هه‌یه، ئه‌وا به دڵنیایییه‌وه به ته‌نها چاودێریكردنی كوره ئه‌تۆمییه‌كانی ئێران، نابێته زامنی ئه‌و هاوسه‌نگییه جیهانییه، به‌ڵكو ده‌بـێت كۆمه‌ڵگای نێوده‌وڵه‌تی بۆ هاوسه‌نگكردنی ڕۆژهه‌ڵاتی ناوین، هەژموونگەرایی ئێران ڕابگرن و، ئه‌كته‌ره‌كانی شانۆی سیاسیی ئیرانی له ناوچه‌كه‌دا له چه‌ك و جبه‌خانه دابماڵن وهه‌رچی زووه تێك و پێك بشكێنن و، ئه‌وسا زلهێزه‌كان له‌سه‌ر دیزاینێكی نوێ بۆ ڕۆژهه‌ڵاتی ناوه‌ڕاست، به ره‌چاوكردنی ئیراده‌ی گه‌لانی ناوچه‌كه بسازێن، چونكه شكی تێدا نییه، بەدڵنییاییەوە جاریكی تر عێراق و سووریا له یه‌ك چوارچێوه‌ی جیۆگرافیدا نوێنه‌رایه‌تی و سه‌ركردایه‌تی بكرێن. ێكه‌وه‌ژیانی ئایینی و ئیتنی و مه‌زهه‌بی، له‌عێراقدا، به‌به‌رده‌وامی تووشی ئاریشه و پێكدادان بووه، زۆربه‌ی كات هه‌وڵی سڕینه‌وه‌ی كورد و تورك و ئایین و نه‌ته‌وه جیاوازه‌كانی دیكه دراوه، به‌تایبه‌ت جوله‌كه و كاكه‌یی و ئێزدیی و مه‌سیحی، هه‌روه‌ها ململانێیه‌كانی نێوان سوننه و شیعه هه‌میشه به توندوتیژ و سڕینه‌وه‌ی یه‌كتر بووه.عێراق له ئێستادا ناتوانێت جارێكی دیكه ته‌پڵی پێكه‌وه‌ژیانی مه‌زهه‌بی و ئایینی و نه‌ته‌وه‌یی لێبداته‌وه، چونكه له مێژوودا هه‌وڵدانی بۆ سڕینه‌وه‌ی یه‌كتر له‌نێوان پێكهاته ئایینی و نه‌ته‌وه‌كاندا به به‌رده‌وامی بوونی هه‌بووه، به ڕێگای جیا جیای سیاسی و كولتووری، به‌ڵام دواجار پێكهاته‌كان به قه‌باره‌ی جیاواز ماونه‌ته‌وه، هوشیاری سیاسی و كولتووریی ئه‌وانه‌ی كه ئیداره‌ی ده‌سه‌ڵاتی سیاسی له عێراق ده‌ده‌ن له ئاستێكی زۆر لاوازدایه و، ده‌ستتێوه‌ردانه ده‌ره‌‌كی و هه‌رێمیایه‌تییه‌كانیش ده‌رفه‌تی پێكه‌وه‌بوونی به‌رته‌سك كردووه‌ته‌وه.یه‌كێك له خاڵه جه‌وهه‌رییه‌كانی هه‌رێمی كوردستان بریتییه له بوون و قبووڵكردنی فره كولتووریی و ئایینی، لێره پێچه‌وانه‌ی به‌غدا كێبڕكێیه ناوخۆییه‌كانی لایه‌نه سیاسییه‌كان زۆر گه‌رمه، به‌ڵام ئه‌مه نه‌گوازراوه‌ته‌وه بۆ ناو كێبركێ و یه‌كترسڕینه‌وه‌ی پێكهاته نه‌ته‌وه‌یی و ئایینیه جیاوازه‌كان، لێره هه‌موویان به جیاوازیی ئایینی و نه‌ته‌وه‌یی ده‌تواننن پێكه‌وه بژین و سه‌ره‌ڕایی جیاوازیی و تێبینییه‌كانیش پرۆسه‌ی پێكه‌وه‌بوون له گه‌شه‌كردندایه، به‌ڵام ئه‌مه له عێراقدا پێچه‌وانه‌یه و ڕه‌نگدانه‌وه‌یه‌یكی واقعیشی پێوه دیاره.سه‌ركرده میللیه‌كان ئه‌و كه‌سایه‌تییه گه‌لسالار و مرۆڤدۆستانه‌ن كه زاده‌ی واقیعی مێژووی گه‌ل و ئیراده‌ی گه‌ل و، له‌ناو ویژدانی گه‌لیشدا به به‌رده‌وامی ته‌فاعول ده‌كه‌ن، بۆیه به‌ره‌نجامی ڕای گشتین و ده‌شتوانن ڕای گشتی بۆ پرسه چاره‌نووسسازه‌كان فۆرمه‌له بكه‌ن، ئاخر مێژوو ته‌نها ئه‌و سه‌ركردانه درووست ده‌كات، كه خه‌بات و مقاوه‌مه‌تی جوامێرانه ده‌بێته پانۆرامای ژیانیان، بۆیه ئه‌مانیش توانای دروستكردن و خوڵقاندنی مێژوویان هه‌یه، لێره‌وه ئه‌گه‌ر به تـێڕامانیكی ویژدانی سه‌رنجی په‌نجا ساڵی ڕابردووی بزاڤی ڕزگاریخوازی نه‌ته‌وه‌ییمان بده‌ین، ئه‌و ڕاستییه به‌رجه‌سته ده‌بێت كه سه‌رۆك مه‌سعوود بارزانی یه‌كێكه له‌و سه‌ركرده مه‌یدانیانه‌ی كه گه‌واهی مێژوو، ناسنامه‌ی سه‌رۆكی میــللی پێ ده‌به‌خشێت. بە دڵنییاییەوە كاروانی سه‌ربه‌خۆیی له ڕێگایه و، سه‌ختیی زۆری بڕیوه و كه‌می ماوه، قۆناغه‌كه‌ش سه‌ربڵندی بۆ رێبوارانی به‌ره‌ی گه‌ل تۆمار ده‌كات و، نه‌فره‌تیش له نه‌یاران ده‌كات و، به دوژمنانیش ده‌ڵێت ئه‌و خوێنه‌ی ئیوه لێمان ده‌ڕێژن بۆ ئه‌وه‌ی له‌ناومان به‌رن، هه‌مان ئه‌و خوێنه‌یه كه ئێمه ده‌یبه‌خشین بۆ ئه‌وه‌ی هه‌بین، چونكە بوون بە خاوەن كیانی سەربەخۆیی ئاواتی لە مێژینەی گەلی كورد و گشت شەهیدانی كورد و كوردستان و سەرۆك بارزانیی ئاڵاهەڵگرە و پێشەنگی ئەو كاروانەیە
