ژێدەرێن دیرۆکی بیرا مە ل ھندێ دئینن بابۆکالێن مە، بەری دەە ھزار سالان، ھەر ژ چیایێن زاگرۆس و نەخاسمە دەڤەرێن نۆکە بناڤێ ئیلام دھێتە نیاسین و چیایێن زاگرۆس و بەختیاری و ھەتا سەر کەنداڤا پارسی و توخیبێن یەونانستانێ و رۆمێ، وەلاتەک مەزن ھەبی و ل پێشی سێ ھزار سالان بەری زایینێ ئەو وەلات بناڤێ عیلامیان ھاتە نیاسین، بەلێ ھێدی ھێدی گۆتی، لۆلۆیی، کاسی، میتانی، مانائی، ئۆرارتۆ، و میدی ژی بەرمایکێن شارستانیەتا کوردان پێک ئینا، و ئەڤ وەلاتێ بناڤێ ئیلامێ و دویڤدا یێن دیتر بینە بناغێ وەلاتێ مەزنێ ئاریاییان و شارستانیەتەک پێشکەفتی و ل رێزا سۆمەری و بابلییا بی، بەلێ ب مخابنیڤە کورد یێ بێ ئێقبالە و نەزان، وێ نزانیت، و ھندی شانازیێ ب سۆمەری و بابلیێن سامی دکەت، ھند ب یێ خۆ ناکەت، و ئەڤە کەلتوورەک سەیرە و تنێ دناڤ کوردان دا دھێتەدیتن.
بابۆکالێن مە ب خوین و ماندیبوونا خۆە، و لبن رێنمایێن زەردەشتێن خۆە ئەو وەلات ئاڤادکرن، و زەردەشت تنێ کەسەک و ناڤەک نینە، بەلکۆ وەکی گەلەک خەلک و نازناڤ و پاشاتی و زنجیرەکە ژ کەسێن بڤی ناڤی دھاتنە نیاسن و کارێ وان ئاراستەکرنا نەتەوەیێن ئاریایی بوویە، و پترتر ئاراستەک ئایینی بوویە، چونکی ئەو قۆناغ قۆناغا وەرارا ئاستێ ھزرییا مرۆڤی و قۆرتالبوون ژ خۆرافات و درەوا بوویە بەرەف بابەتێن ئایینی و رۆحی، یێن بۆ وێ قۆناغێ پێدڤی و بوویە یاسایێن برێڤەبرنا ژیانا مرۆڤان، و دۆماھیک زەردەشت ژی سپیتمانێ میدی بوویە، ل سالا (٦٦٠) ھەتا (٥٨٣) سالێن پێشی زایینێ ژیایە، د ژیێ (٧٢) سالیێ لسەردەستێ داگیرکەران شەھید دبیت.
وەلاتەکێ وەکی کوردستانێ، ئەو وەلاتێ زەنگینێ، ئاکنجیێن وێ مرۆڤێن رێنجبەر و شۆلکەر و کەد-حەلال، بۆ بنیاتنانا ئەڤرۆیا جیھانێ قۆربانی ب ژیانا خۆ دان و بۆ مە وەلاتەک مەزن بجە ھێلا، و دەمێ ئەو د گۆپیتکا خوەشیێ و تێرخواری، خەلکێ نان نەبی و بۆ پارییەکێ نانی ئێکدوو دخوارن، و کەلتوورێ وان ب ئەگەرێ برسێ و ھەژاریێ و نەداریێ ببیە تالانکرن و کۆشتن و رەڤاندن و فرۆتنا مرۆڤان، و نەخاسمە ژن و زارۆک، و بیابانێ زۆردار ھەمی بھایێن مرۆڤاتیێ ژ وان ستاندبین، تنێ ھاتنا ئیسلامێ لسەر دەستێ محمەدێ ئەمین(س) ئەو ھندەک کرنە مرۆڤ و لخۆ زڤڕاندن.
ئەو ئەمانەت ئەڤرۆ یا کەتیە سەر بەخت و ویژدانا مە. ھەر داگیرکەرەکی پشکەکا ژ مە ستاندی، و ل ئێک ژ پارچێن وێ سل بۆ سالێ بناڤێ ئایینی ھزاران گەنج بۆ چاڤترساندنا وی نەتەوەی و دەستبەردان ژ سۆزا خۆ بۆ وی وەلاتی، دھێنە سێدارەدان، بێی ھندێ کەس ھەبت پرسیارەکێ لێ بکەت و خەما وان ھلگرت. وەلاتێن تڕۆھاتێن دیمۆکراسی ھەر جار خۆ بناڤێ ھندێ ئەڤە بابەتەک نافخۆییە ژ چارەسەرکرنا وێ ڤەدزن. ل پارچەک دیتر سەدان سالە خەلکێ ماف نینە بێژت ئەز کوردم، چونکی مەزنترین تاوانە. مەلا سەعیدێ ھەمکی، یێ گۆندەکێ باکوری کوردستانێ یە و دەھا سالە ئاکنجیێ گۆندێ نەرمکێیە ل کوردستانا باشوور و ئەم وەکی گۆندییەکی خۆ ھژمار دکەین، ڤەدگێڕت وی دەمێ لسەردەمێ رژێمێن ئاتاتۆرکییا وی وەلاتی (جەندرمە) بی ( بێگۆمان ب زۆری)، رۆژەکێ مەزنێ وان ل جھێ جەندرما وان رێزدکەت و پرسیارا جھێ ژیار یان گۆندێن وان دکەت، و دەمێ دۆر دگەھتە وی، ئەو ژی ب بستەھی و ب شانازیڤە دبێژت ئەز کوردم و خەلکێ فلان گۆندی. دبێژت ھێدی من خوە نەدیت و تێر و پڕ ھاتمە قۆتان، چونکی من دان ب کوردبوونا خوە دا. ل پارچەکا دیتر، وەسا لبن ناڤێ وەلاتی کوردبوون یا ھاتیە ژبیرکرن و باشووری کوردستانێ ژی ب ھەمان دەرد و ژبلی وێ زۆردارییا ل سالێن بیستێ ھەتا نۆکە ب ھەمی تەرزا لێ دھێتەکرن، چ تشتەک نەمای پێ نەھاتیەکرن، چەندین جاران ئەنفال و تالان و کیمیابارانکرن و ...ھتد، کوردستانی تنێ پێپکێن راگرتنا دەستھەلات و ئێکپارچەییا ئاخا پیرۆزا (نیشتمانێ عەرەبییە)، نەک تشتەک دیتر. حەچکۆ ئەو نیشتیمان پیرۆزە بەلێ خوینا ھزاران شەھید و بریندار و رۆھندکێن دەیک و سێوی و بیژن ژن و کچ و زارۆک و مرۆڤێن ئەنفال و کێمیابارنکری و جینۆسایدکری و فرۆتی و کریتکریێ کورد نە پیرۆزە و بەر نیشتیمانی عەرەبی ناکەڤت.
بەلێ پا ھێشتا کورد نڤستییە و نەیار دیارە دێ کەنگی ش خەو رابت. بەری چەند رۆژان ئێکێ جامێرەکێ وەکی عەلی قەرەداغی ھند خەما وەلاتێ تورکیا ھلگرتبی دگۆت ئەمریکا یا ل پشت ھاتنا خوارێ یا بھایێ لیرێ تورکیایە. ھەکەر وەسا یان نەوسا، ھێشتان ھندەک ھند یێ د خەما پاراستنا ئێکپارچەییا جیھانا عەرەبی و ئیسلامی، تو دێ بێژی ئەم کوردستانی د ناڤ وێ جیھانێ، یێ ل شاما شەریف و چ جاران تاوانێن ١٦ ئۆکتۆبەر و رۆبۆتسکی و قامیشلۆ و عەفرین و کەرکوک و شنگال و حەلەبچە و پاوە و سەقز و شنۆ و نەغەدە و مھاباد و ...ھتد، لسەر دەستێ دەستھەلاتدارێن وان وەلاتان نەھاتینە روویدان و ھەمی پیلانێن ئەمریکا و رۆسیا و ئسرائیلێ بووینە، و ئیسرائیل، ئەجنە،و ھەر شەڤ دئێتە بەر خەونا ئێک ئێکێ مە کوردستانیان، و دبێژتە مە سۆباھی داخوازا دەولەتێ بکەن و ریفراندۆمێ بکەن و پارتێن سیاسی دەینن و ھەڕن ببنە پێشمەرگە و ھەڕن بچویکێن خوە بھێلن و ھەڕن ل سەنگەران ل سحێلا و پردێ و کەرکوک و قامیشلۆ و کۆبانێ و شنگالێ و ... ھتد، کۆم ببن ! ئەڤە کورد چەند بێگانەپەرستە، و حەز ژ خۆ ناکەت؟ کی د خەما کوردایە، لدەمەکی د یاسایا ھەرێما کوردستانێ، و د ئاخفتنێن سەرکردێن وەکی سەرۆک بارزانیدا ھەمی نەتەوە و ئۆل و ئایین و مرۆڤ تێدا برا و یەکسان و ھەڤپشکن، نەتەوەیێن برا بۆ قڕکرنا مە و ژپێخەمەت سەرەوەرییا خۆ، ئامادەنە ب ھزاران رێکخراوێن وەک داعشێ پەروەردە بکەن و ڤڕێبکەنە سەر گۆھێن کوردستانیان، و ئەم ژی بۆ وان خەما بخۆین و تاوانا پارە و ئاخ و سەروەرییا وان ھلگرین. مخابن بۆ کوردستانیان.
ئەم بۆ پاراستنا خۆ یێن نەچار بووین ھزاران قۆربانی و شەھید و ئەنفالان و برینداران پێشکش بکەین، و ئەو ئامادەنە ھەر جار بناڤێ داعشێ و ناڤێن دیتر مە وەک کافر ھژمار بکن و دویڤەلانکێن ئیسرائیل و ئەمریکا و ... ھتد، بدەنە نیاسین و ژبیرا خۆ ببەن، ئەو بخۆ ھەمی پێکڤە و تێکرا بندەستێن ڤان وەلاتانە و سەفارەتێن وان ب ئالایێ وانڤە دگەشت، و ئەو نە کافرن، و ھەکەر ئەم ژ نەچاری و ش زۆردارییا وان وەلاتێن بناڤ ئیسلامی ھندی سەرێ دەرزیکەکێ ل وان وەلاتان نێزیک بین، کافرین و کۆشتنا مە (واجبە)، و گرتنا ژن و زارۆکێن مە دروستە، و تالانکرنا تشتێ مە و ھەمی کەرەستێ نافمالێ، دروستە، ھەتاکۆ ھەکەر ئەو مرۆڤ مامۆستایەکێ ئایینی بیت ل مزگەفتەکا باژێڕێ عەفرینێ !
راستی سەیرە گاڤا ئەو تەنگاڤ دبن مە ب کافر و ئیسرائیلی ددەنە نیاسین و بڤێ چەندێ خەلکێ ژ شیشان و قرقیزستان و مالیزییا و ئەندونیسییا و پاکستان و ئەفغانستانێ و وەلاتێن عەرەبی و رۆژھەلاتا ناڤین د ھەوارا خۆ دئینن، دا وەلاتێ خۆ ش بندەستێ مە بیننە دەر، حەچکۆ ئەو خۆدان مال و ئەم داگیرکەر.
مخابنێ بۆ کوردێن خەمخۆرێن وان، و بۆ وان بخۆ، کو نەوێرن ل دیرۆکێ بزڤڕن و چەند بەرپەڕێن دیرۆکێ ھلبدن، دا راستییا بزانن، چونکی راستی تەحلن و دگەل بەرژەوەندیێن وان ناگۆنجن، و بھێزترین چەکێ وان تنێ ب کافرناساندنا مە و دارودەستێ ئیسرائیلێ زانینا مەیە، و ھەتا نۆکە کەس نەھاتە د دیرۆکێدا ببینت کا ئەڤە چییە ھەر کەسێ وان کەرب ژێڤە ببت بۆ ھندێ بشێن وی بشکێنن ڤیابا وی ب کافر و جۆھی بەنە نیاساندن. پێدڤییە سایکۆلۆژییا کویرتر د ڤی بابەتیدا بچیتە خوارێ دا ڕە و ڕیشالێن تیرۆرێ ل دەڤەرێ بھێـەھشککرن، ئارامییا دەروونی و جڤاکی بزڤریتە دەڤەرێ، و نەخاسمە وەکی چەند ھزار سالێن بابۆکالێن مە شانازییا مەزنترین شارستانیەتێن دەڤەرێ و جیھانێ ھەی، و رێز ل مرۆڤاتیێ دگرت و بەرێن بنیاتا وێ دادڕشتن و ب شان و ملێن خۆ خزمەتا ھەمیان دکر، بێی جیاوازی، وەک چەوا ئەڤرۆکە ژ وێ پارچا مەزن تنێ پیچۆکەک یا مای و تێدا مەلیۆنھا ئاوارە و دەربدەر، ب ئارامی و ئاسوودەیی و لبن سیبەرا پێشمەرگێ قەھەرمان و سەرۆکەکێ مرۆڤدۆستێ وەک بارزانی، بێی جۆداھییا نەتەوەیی و زمانی و ئایینی و ھزری، و سەرباری ھەمی نەداری و ئاریشێن نافخۆیی و گەفێن سەر ئاسایشا کوردستانێ، و ھەبوونا تیرۆرێ، وەک قەلایەکێ ھاتینە پاراستن، و ئەڤ ھەرێما یا بۆ مە ھەمیا بوویە منارەک دا دەنگێ ستەما ل کوردستانیان دھێتەکرن بگەھینینیە گۆھێن جیھانێ. کوردستان یا ل بەندا ڤان پارێزەرێن خەمخۆر بو کوردستانێ، ئەو دلسۆزێن بشێن بەری خەما دوژمنی بخۆن، خەما وەلات و نیشتیمانێ خۆ ھلگرن.
ژێدەر: خالید، شاخەوان ( ٢٠١٧ ). ڕاگەیاندنی دەوڵەت مافی ڕەوای گەلی کوردستانە، ڕۆژنامەی خەبات، ژمارە ( ٥٢١٢ ) لە ( ١٣/٢/٢٠١٧ )، ل. ( ٤).
*ئەڤ بابەتە ل رۆژا (٢٥/٦/٢٠١٨) ل رۆژناما ئەڤرۆ ھاتیەبەلاڤکرن.