بەشێ دوویێ
ژبەر ڤان رەفتار و سەرەدەری و سیاسەتا پەکەکێ جڤاکێ باکۆرێ کوردستانێ ژلایێ سیاسی ھاتیە دابەشکرن و تاگرێن حکومەت و حزبێن تورکی بەرەڤ زێدەبوونێ دچن ، بدەستڤەئینانا ژمارەکا زۆرا دەنگێن باکۆرێ کوردستانێ ژلایێ حزبێن تورکی بتایبەت ( داد و گەشەپێدان ) د ھەلبژاردنان دا بەلگەیە لسەر ڤێ چەندێ ، نە مەسەلە ئەوە کوردێن باکۆر ھەستا نەتەوی و نشتیمانی نیە و لایەنگرێن دەسھەلاتێ و حزبێن تورکی نە ، بەلکی چ ئەلتەرناتیڤ نینە و نەچارن ل ھەلبژارتنان دا باشترین خراب ھەلبژێرن .
لەوما گرنگە جڤاکێ کوردێن باکۆ نەخاسمە چینا سیاسی و رەوشەنبیر ئاڤریێ ل رەوشا خۆ یا سیاسی بدەن ، بۆ پێکئینانا رێکخستنەکا سیاسی یا سەرتاسەری لسەر بنەمایێ نەتەوایەتیێ و ئاشتیێ و دیموکراسیێ . بۆ ڤێ مەبەستێ پێتڤی یە مفای ل ئەزمۆنا سیاسی و بزاڤا رزگاریخوازیا باشوورێ کوردستانێ وەربگرن . نەخاسمە سیاسەت و پرنسیپێن پارتی دیموکراتی کوردستان کو ب درێژاھیا زێدەتر ل حەفتێ سالایە سەرکێشیا بزاڤا سیاسی یا باشوورێ کوردستانێ دکەت و دڤان سالان دا تووشی چەندین ئەڤرازی و نشیڤیا بوویە ، لێ شیایە بسەرفیرازی لێ دەرباز ببیت و خۆ دگەل سەردەمی گۆنجاندی یە . د شۆرەشێن چەکداری دا ئەوێن لسەر ھاتینە سەپاندن ، لسەر بنەمایێ دیموکارسیێ و مرۆڤایەتیێ و رێزگرتنێ بوویە و چ جارا پەنا نەبریە بەر توند و تیژیێ و رەفتارەکا وەسا کۆ جڤاکێن نیڤ دەولەتی و رێکخراوێن پاراستنا مافێن مرۆڤا و مللەتا رەخنێ لێ بگرن , بەرۆڤاژی رەفتار و سەرەدەریێن رژێمێن شەر لسەر سەپاندی یان یێن پەکەکێ . لایێ دبلۆماسی ژی شیایە ھەتا رادەیەکێ باش پەیوەندیا دگەل وەلات و سازیێن نیڤ دەولەتی مۆکۆم بکەت و پشتەڤانیا وان دابین بکەت . ژلایێ دیموکراسیێ ژی پارتی ھەردەم نە تنێ دەلیڤە بۆ حزبێن دیتر خۆشکریە بۆ پشکداریکرن دشۆرەش و بزاڤا سیاسی دا بەلکێ ھاریکار و پشتەڤان ژی بوویە و دەست ل ھندەک مافێن خۆ بەردایە بۆ ئێکرێزیا بزاڤا رزگاریخوازیا کوردستانی و پێک ئینانا بەرەیەکێ نشتیمانی کۆ د خزمەتا کورد و کوردستانێ دا بیت . مینا پێک ئینانا بەرەیێ کوردستانی .دەربارەی بەشێن دیترێن کوردستانێ ژی ، چ جارا نەبوویە فاکتەرێ ئاڵوزکرنا رەوشا وان و مایتێکرن د کارو بارێن وان دا ، بۆ نمۆنە لدەمێ ئاوارەبوونێ بۆ وەلاتێ ئیرانێ یا تورکیا . لسەردەمێ پشتی سەرھەلداناپیرۆزا سالا ١٩٩١ ێ ژی دیسان پارتی ب رێبەرایەتیا سەرۆک مەسعوود بارزانی ب لێزانین و بەرژەوەند پارێزیا خەلکێ کوردستانێ و نەسەرھەلدانا ھزرا تۆلڤەکرنێ و توند و تیژیێ ، ب لێبوورینەکا گشتی و لاپەرەیەکێ نوو سەرپەرشتیا سەرھەلدانێ کر و ب ئێک رێزی دەسکەفتێن وێ پاراستن و پێشڤەبرن تاکۆ پێکئینا پەرلەمان و حکومەتا ھەرێما ھەرێما کوردستانێ و ب شیانێن سنووردار رەوشا ئابووری و جڤاکی پێشڤەبر و لسەر ئاستێ سیاسی و دبلۆماسی ژی دەسکەفتێن ھەرە مەزن بدەستڤەئینان .
ژلایێ یاسایی و دەستووری ژی پشتی ژناڤچوونا رژێما بەعسا ل عیراقێ دیسان داکۆکی پاراستن و دەستووریکرنا مافێن خەلکێ کوردستانێ کر و د دەستوورێ ھەردەمیێ عیراقێ دا ھاتنە چەسپاندن و بوویە بەلگەنامەیەکا فەرمیا نیڤ دەولەتی . ئەڤەژی دەسکەفتەکێ ھەرە مەزنە بۆ کوردا ب گشتی نەخاسمە باشوورێ کوردستانێ و بڤێ سیاسەتا حەکیمانە و ھەڤسەنگی ئەڤرۆ ھەرێما کوردستانێ بوویە سەنگ و سەنتەرەکێ مەزن ل دەڤەرێ ژلایێ سیاسی و ئێمناھی و ئابووری بۆ جیھانێ و گرنگیەکا ھەرە مەزن پێ دھاتە دان . پشتی روودانێن شازدێ ئکتووبەرا سالا ٢٠١٧ و ھەولێن رژێما عیراقێ یێن لەشکری و ئابووری ب پالپشتیا ھندەک ل خیانەتکارێن کورد و وەلاتێ ئیرانێ بۆ ژناڤبرنا قەوارێ سیاسی یێ ھەرێمێ یان لاوازکرنا وێ دیسان ب بەھانەیا ئەنجامدانا راپرسیا سەرخۆبوونا رێزدار نێچیرڤان بارزانی سەرۆکێ حکومەتا ھەرێما کوردستانێ ، ب کارئینانا سیاسەتەکا بەرژەوەند پارێز و حەکیمانە شیا وەلاتێن دەور و بەر و جیھانێ و پشکەکا خەلکێ ھەرێما کوردستانێ ژی حیبەتی بکەت ، دەمێ شیای ھەرێما کوردستانێ لڤێ پیلانێ رزگار بکەت و ھێز و سەنگا ھەرێمێ لسەر ئاستێ دەڤەرێ و جیھانێ زۆترین دەم بزڤرینیت .
ئەگەر باکۆرێ کوردستانێ ژی خودان ئەڤ رەنگە کەسایەتی و پارتیە بان ئەڤرۆ رەوشا وان ژی ل رەوشا باشوورێ کوردستانێ کێمتر نەدبوو و نھو ژی ئەگەر گاڤێن باش و پراکتیکی بۆ ڤێ چەندێ بھاڤێژن ئەز باوەرم لدەمەکێ کورت دا رەوشا سیاسی و ئابووری جڤاکی ل باکۆرێ کوردستانێ دێ بەرەڤ قوناغێن ئەرێنی و بدەستڤەئینانا دەسکەفتێن نەتەوی و نشتیمانی چیت برەنگەکێ ئاشتیانە و پشتەڤانا نیڤ دەولەتی ژی دێ ھەبیت .