ل رۆژا بیست و چارێ حزیرانا ٢٠١٨ گەڕەکا دی یا ھەلبژاردنێن سەرۆکاتیێ و پەرلەمانی ل وەلاتێ تورکیا برێڤە چوون . بریار بوو ئەڤ ھەلبژاردنە ل (٣) چریا دوویێ یا سالا٢٠١٩ بھێنە ئەنجامدان ، لێ سەرۆک کۆمارێ تورکیا ل ١٨ نیسانا ئەڤ سالە بریارا دا ھەلبژاردنێن بەروەخت بھێنە ئەنجامدان بوون و پشتی ڤان ھەلبژاردنان سیستەمێ وەلاتی ل پەرلەمانی بۆ سەرۆکایەتێ دێ ھێتە گۆڕین .کورد ژی پشکەکا بەرفرەە و کاریگەرن د جڤاکێ تورکیادا و ب تەخمینی ٢٠% جڤاکێ تورکیا پێک دئینن و لسەر (٢١ ) پارێزگەھان ھاتینە دابەشکرن و ژمارا وان دەوروبەرێ بیست ملیون کەسایە و باکۆرێ کوردستانێ ٣٢% ل عەردێ تورکیا .
لدیڤ ڤان ئامارا پێتڤی یە کوردێن باکۆر ژلایێ سیاسی روولەکێ بەرچاڤتر و کاریگەتر دناڤ دەولەتا تورکیادا ھەبیت ، لێ ئەنجامێن ڤان ھەلبژاردنان دیار دکەن ، روولێ کوردان لدیڤ حەز و ئاست و رێژا وان نیە . چونکی پارتیا گەلێن دیموکراتخواز ( H.D.P) ھەرچەندە پارتیەکا کوردستانی نیە لێ سەرکرێن وێ و پرانیا کادرێن وێ کوردن و ب پارتیەکا کوردی دھێتە ھژمارکرن ، دڤان ھەلبژاردنان دا (١١%) یا دەنگان بدەستڤە ئینا و ژمارا کۆرسیێن خۆ ل ( ٥٩ بۆ ٦٦ ) زێدەکرن ، لێ بەرامبەر سەنگا کوردان ھەر کێمە . ئەڤە جھێ پسیارێ یە ، گەلۆ چما دناڤ بیست ملیون کوردان دا پارتیا کوردی کێمترل شەش ملیون دەنگان بینیت ..؟! ، ژلایەکێ دی حزبێن دیتر یێن تورکی مینا ( داد و گەشەپێدان ) کۆ رکەبەرترین حزبا تورکی یە بەرامبەر ھەدەپێ و ب دۆژمن ھژمار دکەن ، ل ھندەک پارێزگەھێن باکۆرێ کوردستانێ پرانیا دەنگان ببەن .
رەنگە کێمبوونا دەنگ و سەنگا کوردی ل دەسھەلاتا تورکیا دا ڤەبگەرێت بۆ نەبوونا حزبێن کوردستانی ل باکۆرێ کوردستانێ کو دگەل جڤاکێ کوردستانێ بگونجیت و نەھەلگرتنا درۆشم و بەرنامێن کوردستانی بۆ خزمەتا نەتەوا کورد و ئازادی و رزگاریا کوردستانێ . ژلایەکێ دی پاشڤەکێشانا ( پ . ک . ک ) ل درۆشمێن خۆ یێن بریقەدار و ل خۆ مەزنتر دەمێ داخازا ئازادیا کوردستانا مەزن دکر و خەلک پێ سەردا دبر , ئەڤرۆ گۆرەپانا خۆ یا سیاسی و لەشکری ڤالا کریە و حزبێن دیڤەلانکی ل ھەرچار پارچێن کوردستانێ دروست کریە و بوویە ئاستەنگ و بارگرانی لسەر وان .
ژلایەکێ دی (ھەدەیە ) کۆ ب نوونەرایەتیا (پ . ک . ک ) دھێتە ھژمارکرن , دیسان چ بەنامێن نەتەوی و نشتیمانی نینە بەلکی خۆ ب پارتیەکا تورکی دناسیت و داخازا دیموکراسیەتێ و وەکی ھەڤیێ دکەت . بڤی رەنگی ژی ل کە و کرکارا بوویە . نە کوردێن نەتەوی وێ حزبێ ب حزبەکا کوردی دناسن ، نە تورک ب حزبەکا تورکی دناسن ..! .
دبیت رەفتار و سەرەدەریێن توندێن سالێن بووری یێن پارتیا کارکەرێن کوردستانێ بەرامبەر خەلکێ باکۆرێ کوردستانێ . ل گەڤ لێکرنێ و چەکدارکرنا بزۆری یا گەنجا و ستاندن باجێ ب تەعدایی و کۆشتنا خەلکەکێ ھەلگرێ نە دگەل دیتن و سیاسەتا وان ، کاریگەری لسەر ( ھەدەپێ ) ھەبیت ، چونکی میراتگرا وایە . رەنگە خەلکەک ب شکاندنا بەربەرستا ١٠% ژلایێ ھەدەبێ ب سەرکەفتن ھژمار بکەت و ئەز وەکی کوردەک پێ دلخۆش بووم ، لێ لدیف دیتنا من ھەدەپێ و حزبێن ھەڤپەیمانێن وێ دڤان ھەلبژارتناندا شکەستن ئینایە و پێتڤی بوو خۆ دگەل جڤاکێ کوردستانی تێکەل کربا داکۆ رێژا وان نێزیکی سەدێ بیست ببا ، ئاردۆگان و حزبا وی سەرەرای ڤێ دژایەتیا کوردا و وێرانکرنا ھژمارەکا گۆند و باژێرکێن کوردستانێ لڤان سالێن دووماھیێ و داگیرکرنا عەفرینێ و لێدانا پەکەکێ ل باشوورێ کوردستانێ و گەفەێن بەردەوام ، شیا ژبلی دەنکێن تورکا رێژەکا زۆرا دەنگێن کوردان ببدەت ..؟ ئەگەر خودان حزب و کەسایەتیەکێ خودان ستارتیژیەت نەبیت . ھەچەندە بەرامبەر ھەلبژاردنێن بووری ریژەیەکا بەرچاڤا کورسیێن پەرلەمانی لدەست دانە ، لێ بۆ ڤان کاودانێن تورکیا بۆ وی سەرکەفتنەکا مەزنە ، ھەر پارتیەکا دیترا تورکیا ئەگەر وەک ئەردۆگانی و حزبا وی سەرەدەری دگەل خەلکێ خۆ و سیاسەتا ناڤخۆیی و دەرڤە کردا ، دا تۆشی شکەستنەکا ھەرە مەزن بیت .
پێتڤی یە کوردێن باکۆر ب خەلک و حزبێن سیاسی ڤە ستراتیژیەتەکا نەتەوی و نشتیمانی دابرێژن بۆ قۆناغێن داھاتی و دەستا ل سیاسەتا سەپاندنا ئێک حزب و ئێک ئایدیولۆژی بەردەن و ب رەنگەکێ دیموکراستی و ئاشتیانە ، دوور ل چەکداریێ بچنە دناڤ پرۆستا سیاسی یا تورکیا دا و مفا ل ئەزمۆنا ھەرێما کوردستانێ وەربگرن ب تایبەت پارتی دیموکراتی کوردستان کۆ شیایە کۆ دگەل سەردەمی و قوناغا و خەلکێ خۆ بگۆنجینیت و خزمەتا دۆزا سیاسی یا کوردستانێ بکەت بۆ بدەستڤەئنانا دەسکەفتێن مەزنتر .
ب خەباتا مەدەنی و دیموکراسی و ئاشتیانە حزبێن باکۆرێ کوردستانێ دێ شێن . زێدەتر خزمەتا گەل و وەلاتی بکەنبۆ بدەستڤەئینانا ئارمانجێن نەتەوی و نشتیمانی و رازیکرنا خەلکێ خو .