ل بیرامنە، ل دەمێ دانانا بەرێ بنیاتا تونێلا گەلێ زاخۆ ل ٢٠ی نیسانا سالا ٢٠١٣ نێچیرڤان بارزانی سەرۆکێ حکومەتا ھەرێمێ گۆتارا خوە ب زانیارییەکا دیرۆکێ ل دۆر گەلیێ زاخۆ دەست پێکر و وەھا گۆت: (دوو ھزار و چار سەد سالان بەری نھا زەینەفون و دەھـ ھزار لەشکەرێ یۆنانی د ڤێ گەلیێ دا پاشڤەزڤرین، وی دەمی زەینەفون ئەڤ گەلیە بۆ خۆ رزگارکرنێ بکار دئینا، لێ ئەڤرۆ ئەم دێ بۆ کورتکرنا رێکێ و کێمکرنا روودان و ئاسانکرنا رێکا بازرگانی تونێلەلکێ لێ ڤەکەین، ھنگی بۆ شەری بکار دھات، ئەڤرۆ ئەم دێ بۆ ئاشتی و پێکڤە ژیانێ ب کارئینین)، ئەو زەینەفونێ یۆنانی بوو د دیرۆکێ دا ب ئەندازیارێ شەری و سەرکەفتنێ ھاتیە ناڤکرن. لێ نیچیرڤان بارزانی کو من د مانشێتا گوتارا خوە دا ب زەینەفونێ دووێ ناڤکریە، ئەو تونێل ژ بۆ خزمەتا خەلکێ ھەرێمێ بکارئینا، نھا تونێلا گەلیێ زاخۆ ب دوماھی ھاتیە، ئێکەمین تونێلە ل سنورێ پارێزگەھا دھۆکێ دھێتە دروستکرن، کو ١٧٠ ملیار دینار بۆ ھاتبوونە تەرخان و کرن و بۆ دەمێ پێنچ سالان کار تێدا ھاتە کرن، ھەرچەندە ھێشتا رێورەسمێن ڤەکرنا تونێلێ ب دروستی نەھاتیە دانان، لێ تۆنێل ل ھەمبەر خەلکی ڤەکریە، لێ خوەزی سەرۆکێ جڤاتا وەزیران ژبۆ نموونەیا زەینەفوونی؛ حکومەتا ژناڤچوویا ئیراقێ و تۆببارانکرنا وێ دەڤەرێ کربا نموونە، چونکی پشتی شکەستنا حزبا بەعس و پێکئینانا حکومەتا نوویا ئیراقێ ب پشکداریا کوردان، کورد شیان ب بودجەیەکا کێم جوداھییا پێشکەفتن و ئاڤەدانکرنێ دناڤبەرا پارێزگەھێن ئیراقێ و ھەرسێ پارێزگەھێن ھەرێمێ نیشا جیھانێ ھەموویێ بدەن، ئێک ژ وان دەستکەفتان ژی تونێلا گەلێ زاخۆیە کو دێ بیتە فاکتەرەکێ بھێز یێ گەشەکرنا ئابوری ژبۆ خەلکێ کوردستانێ و ئیراقێ بگشتی و خەلکێ پارێزگەھا دھۆکێ ب تایبەتی، چونکی ئەو تونێل ل سەر رێکا دەرگەھێ سنوری یێ ناڤدەولەتی یێ ئیبراھیم خەلیلە و ھەرێما کوردستانێ و ئیراقێ ب تورکیا و جیھانێ ھەموویێ ڤە گرێ ددەت، تۆنێلا گەلیێ زاخۆ ل دووڤ ھەموو پیڤەر و ستانداردێن تۆنێلێن جیھانی ھاتیە دروستکرن، ھەموو پیدڤیێن شوفێرێ و مەرجێن سلامەتیێ ب رێژەیا ١٠٠% دناڤدایە، سیستەمێ ئاگر ڤەمراندنێ دناڤدایە و ژ بۆ ھەر روودانەکا نەخواستی مفا ژێ دھێتە وەرگرتن، سیستەمێ گھۆرینا ھەوای ل دووڤی مەرجێن ساخلەمی و ستانداردێن جیھانی ھاتیە دروستکرن، رۆناھیا ناڤا تۆنێلێ وەھا ھاتیە درووستکرن کو شەڤ و رۆژ دناڤا تۆنێلێ دا ھیچ جوداھییەک نینە، کارەبا ناڤا تۆنێلێ بۆ دەمێ ٢٤ ساتانە و بۆ ھیچ دەمەکی و کارەبا وێ ناھێتە برین، سیستەمێ یۆ پی ئێس بۆ ھاتیە دانان و ھەردەما کارەبا لێ بھێتە برین، ب رەنگەکێ ئۆتۆماتیک، کارەبا دابینکری یا پاتریێ دێ بۆ ھێتە بەردان، بۆ پاراستنا ئێمناھیا ناڤا تۆنێلێ، ھەموو کوژی و قولاچکێن ناڤا تونێلێ ب کامیرەیا چاڤدێریێ ھاتیە کۆنترۆلکرن، نەھـ کریدۆرێن ھەوارھاتنێ دناڤا تونێلێ دا ھاتیە دروسکرن کو ٦ ژوان بۆ مرۆڤایە و ٣ ژوان ژی بۆ ترۆمبێلانە، ئەڤە ھەموو بەلگەیێ وێ یەکێنە ھەرێما کوردستانێ دناڤا ئیراقەکا نە ئارام دژیت، لێ ژلایێ ئاڤاکرنێ و پێشکەفتنێ ھیچ وەک یەکییەک ل گەل ئیراقێ نینە و باشتر مفا ژ وەلاتێن پێشکەفتی و خوەدان سەربوور وەرگرتیە، بچوکترین نموونە بۆ ڤێ یەکێ ژی ئەوە ھەرێم بوویە پەناگەھێ گەشتیارێن عەرەبێن پارێزگەھێن دی یێن ئیراقێ و سالانە ب چەندین ملیۆن دۆلارێن خوە ژ بۆ گەشتکرنێ ل ھەرێما کوردستانێ د مەزێخن، لێ ھیچ ئامارەکێ ئیراقێ نینە و کو بێژیت دوو خێزانێن ھەرێما کوردستانێ ژ بۆ دەمێن خوە و گەشتکرنێ سەرەردانا فلان پارێزگەھا ئیراقێ کریە. جارێ ئەو ئارامیا ل ھەرێمێ ژی ھەی پێدڤی باسکرنێ نینە
کارزان فەقێ
