وەکی یا دیار کو ئێکگرتن ب تنێ دەرمانە بۆ ھەموو دەردێن کوردان و ب درێژاھییا مێژوویێ کورد نەشیانە وەکو ئێک تیم کاربکەن و ھەردەم بووینە جھێ مەندەھۆشیێ بۆ ھەموو مللەتێن جیھانێ، ژ بەرکو کورد پترن ژ ٤٠ ملیون ھێشتا بن دەستن و نەبووینە وەلاتەکێ سەربخوە ئەڤ چەندەژی ھەموو بۆ پەرتەوازەیا ناڤ مالا کوردی دزڤریت و ئێکنەگرتنا وان.
لڤێرە ھەژی ئاماژە پێدانێ یە کو جێگرێ سەرۆکێ پارتی دیمۆکراتی کوردستان دیارکر کو پارتی دگەل حکومەتا ھەڤپشکیێ یە و داخواز ژ ئالیێن سیاسیێن کوردستانێ کر، دەست ب گۆتوبێژن پکێئینانا کارنامەیەکا ھەڤپشک بۆ بەغدایێ بکەن بۆ ھندێ ب ھەڤپشکی بچنە بەغدا ھەر ئێک ل دویڤ خوە و بێ بەرنامە بچیت و ئەگەر ھوسا بیت دێ کورد ل بەغدا ب سەنگەکا کێم ھێنە دیتن و چ تشتان ب دەست خوە ڤە نائینن و ئەگەر ب ھەڤپشکی بچن و گوتارەکا ئێکگرتی ھەبیت دێ پتر شێن مافێن ھەرێمێ پارێزن.
دیسان بارزانی دیارکر کو یا گرنگە ئالیێن کوردستانی یەک رێز بن و ناکۆکیێن د ناڤبەرا خوە دا ل ئالییەکی دانن و گۆتوبێژێن پێکئینانا کارنامەیەکا ھەڤپشک دەست پێ بکەن ڤێ چەندێ ژی دێ پتر مفا بۆ پێگەھێ ھەرێما کوردستانێ ھەبیت و نابیت پارتێن سیاسی ب پەرتەوازی بەرەڤ بەغدا بچن و ئەگەر ھوسان چوون ب پشت راستیڤە دێ بنە پاریەکێ باش بۆ بەغدا، ژ بەرکو چوونا بەغدا نەبەس وەرگرتنا پۆستانە و مفایێن دارایی یا گرنگە ھەموو پارتێن کوردی ھزرێ ل خوەشکرنا ژیانا وەلاتیان بکەن و جارەکا دیتر وەلاتیێن ھەرێمێ توشی قەیرانان نەبن یێن ڤان چار سالێن بۆری توشی بووینێ.
یا گرنگە حکومەتا نوو یا عیراقێ ل سەر بنیاتێ ھەفپشکیێ و دیموکراسیێ و پاراستنا مافێن ھەموو عیراقییان بھێتە پێکئینان و ھەرێما کوردستانێ ژی ھەڤپشکیەکا کارا دگەل وێ حکومەتێ ھەبیت و دەستۆرێ عیراقێ بھێتە بجھـ ئینانان.
ل دوماھیکێ یا گرنگە باش بزانین کو تاکە رێک کو کورد بگەھنە مافێن خوە ل بەغدا ئێک رێزییا وانە ل بەغدا و ھەردەم نێچیرڤان بارزانی دوپاتی ل ھندێ کرییە و دیارکرییە کو ئەگەر کورد ل بەغدا ئێکگرتی نەبن چ تشتان ب دەست خوەڤە نائینن، ھەر ژ بەرھندێ یا پێدڤییە ھەموو پارتێن سیاسی لاپەرەکێ نوو ڤەکەن بۆ ھندێ ھەموو مافێن دەستۆری یێن ھەرێما کوردستانێ بھێنە بجھـ ئینان.