وەکی یا دیار د ڤان ھەلبژارتنان دا ھەڤرکی پتر یا ھەی دناڤبەرا پارتێن سیاسی یێن ھەرێما کوردستانێ ئەوژی ژ بەر چەندین ئەگەران وەکو ھاتنا ھندەک پارتێن نوو و شەرکرن و ترسا ھندەک پارتان ژ دەستدانا دەنگێن خوە و ب تایبەتی پشتی روودانێن ١٦ێ ئۆکتۆبەرێ و ئاشکرابوونا روویێ وان یێ راستەقینە بۆ ھەموو وەلاتیان و ھندەک پارتێن ئیسلامی ژی باش ژ خوە دترسن، ژ بەرکو چنەمایە ھەموو درەو و سەحرێن وان دێ بۆ ھەموو وەلاتیان ئاشکرا بن و ئێدی ئەو نەشێن نانێ خوە ب ئافکێ بخون ئانکو ئێدی ئیسلام ژی نەشێت وان رزگار بکەت و وەلاتی نوکە باش دزانن کو ئەو لایەنژی ئایینێ ئیسلامێ بۆ مەرەمێن خوە یێن تایبەت بکار دئینن.
پرسیار لڤێرە ئەوە کا بۆچی پارتی دێ ھەرمینیت ئێکەم ل سەرانسەری ھەرێما کوردستانێ جێگرێ پارتی دیموکراتی نێچیرڤان بارزانی ئەڤە ب ئاشکرایی دیارکر کو پارتی دێ ھەرمینت ئێکەم، ژبەرکو پارتی ئانکو گەلێ کوردستانێ و پارتی ھێزا خوە ژ گەلێ خوە وەردگریت و پارتی یا بھێزە و ھەردێ بھێزی مینیت و پارتی لژێر سەرپەرشتیا ئێک سەرکردە کار دکەت.
ھەروەسا دیار دبیت کو پارتی ھەر یا ئێکگرتییە و دێ ھەر ئێکگرتی مینیت و ئەڤ چەندەژی دبیتە ئەگەر کو ھەموو خەونێن وان پارتان بن ئاخ بکەت ئەوێن ھەردەم بزاڤێ دکەن پارتی دابەش بکەن ب سەر چەند بالەکان و بەردەوام ب رێکا چەندین سایت و رۆژناما و کەنالێن راگەھاندنێ ڤان نووچەیێن بێ بنەما و نەراست بەلاڤ دکەن، بەلێ نێچیرڤان بارزانی د بانگەشەیا ھەلبژارتنان دا ب ئاشکرایی دیارکر کو پارتی ھەر دێ مینیت ئێکەم پارتا ئێکێ ل ھەرێمێ.
ھەروەسا پشتی دانانا بەرێ بنیاتی بۆ قونسولخانەیا ئەمریکا ل ھەولێرا یایتەخت پتر ھیڤی و ئومێد دانە وەلاتیێن ھەرێما کوردستانێ و باش دیار بوو کو ئەمریکا دوستا چەند رۆژەکان نینە بەلکو دێ بۆ ھەتا ھەتایێ مینیت دوست و ھەڤال بۆ ھەرێمێ و ب تایبەتی بۆ پارتی دیموکراتی کوردستان ھەروەسا نابیت بھێتە ژبیرکرن کو گەل و حکومەتا ھەرێما کوردستانێ باوەرییەکا ب ھێز ب وان بنەمایێن کو ئەمریکا و جیھانا پێشکەفتی ل سەر ھاتین ئاڤاکرن، مینا دیمۆکراسی، مافێن مرۆڤان ب گشتی و پاراستنا مافێن تاک و پێکھاتەیان ھەیە و پەیوەندیێن گەلێ کورد و ئەمریکا دیرۆکی نە، واشنتۆنێ ب ھەڤپشکی رۆلەکێ دۆستانە و بەرچاڤ د سەرھلدانا ١٩٩١ێ، ئێخستنا رژێما بەعس و تا شەرێ دژی داعشێ ژی ل گەل ھەرێما کوردستانێ ھەبوو و بێ گومان پارتی روولەکێ بەرچاڤ ھەبوویە د ئاڤاکرنا پەیوەندیێن بھێز دگەل ئەمریکا و ب تایبەتی سەرۆکێ حکومەتێ نێچیرڤان بارزانی.
بێ گومان پارتی خودان پەیوەندیێن بھێزە دگەل ژمارەکا زێدە یا وەلاتێن جیھانێ و پارتێن سیاسی یێن جیھانێ و پارتی ھەموو ھێزا خوە ژ گەلێ کوردستانێ وەردگریت و ھەر ژ بەرھندێ ژی پارتی د ھەموو ھەڤرکی و قوناغێن سەخت و دژوار دا جھێ باوەرییا وەلاتیان بوویە ھەر ژبەرھندێ پارتی بوویە ھێزا ئێکەم و ژمارە ئێک.