ل وێ ده‌ڤه‌رێ.. دژه پارتى ئێكه‌مه، نه‌ك خوه‌دى پرۆژه..
کارزان فەقێ
ژ وان پارتێن مه‌زن یێن كوردستانێ، تا نها شه‌ره‌كێ دژوارێ بانگه‌شێ دهێته دیتن و هه‌ر حزبه‌ك؛ حزبه‌كا دى تاوانبار دكه‌ت، لێ پارتى دیموكراتى كوردستانى ب فه‌رمى راگه‌هاندیه، دێ بانگه‌شه‌یه‌كا ئارام ژ لایێ وانڤه هێته كرن بێى كو ببیته جهێ بێزارییا خه‌لكێ كوردستانێ.
ته‌ماشه‌ى مه‌دیا و سۆشیال مه‌دیا هه‌ر پارته‌كا سیاسى بكه، سه‌ر بنێ و ئه‌زمانێ وان، تاونباركرنا حزبا به‌رامبه‌رى خوه‌یه ب وێ یه‌كێ كو هه‌ڤال و هه‌ڤپه‌یمانێ پارتى دیموكراتى كوردستانه، بزاڤا گۆران د مه‌دیا خوه‌دا روویێ ئێكه‌تى ره‌شكر كو د حكومه‌تێ ل گه‌ل پارتى پشكداره و د هه‌مان ده‌م دا دووسالێن حكومرانییا خوه ل گه‌ل پارتى ژبیر دكه‌ت.
نه‌وه‌ى نوێ د كه‌نالێ خوه‌یێ فه‌رمى دا ئێكه‌تى و گۆران ب وێ یه‌كێ تاوانبار دكه‌ت كو ل گه‌ل پارتى رێكه‌فتینه ژبۆى كو دژاتییا نه‌وه‌ى نوێ بكه‌ن، و د راستى دا ب ڤان رێكێن ب ڤى ره‌نگى دخوازیت خوه بینن د ناڤ ناڤان دا.
هه‌ڤپه‌یمانییا دكتۆر به‌رهه‌م سالحى هه‌موو پارتێن سیاسى ب وێ یه‌كێ تاوانبار دكه‌ت كو ل گه‌ل پارتى پشكدارى حكومه‌تێ بووینه و د هه‌مان ده‌م دا دكتۆر به‌رهه‌م بخوه 25 سالێن حكومرانیا كوردستانێ ل گه‌ل ئێكه‌تى پشكدار بوویه و دوو سالان ژى سه‌رۆكێ جڤاتا وه‌زیرێن هه‌رێمێن بوویه، به‌رى كابینه‌یا به‌رهه‌مى حكومه‌تا هه‌رێمێ هیچ دیناره‌ك ده‌یندار نه‌بوویه، لێ به‌رهه‌م ساله‌ح حكومه‌تا هه‌رێمێ ل بن سێ ملیار دۆلارێن ده‌یندارى هێلا و پاشان ل ده‌ڤ ئێك ژ به‌رپرسێن ئێكه‌تیێ گۆتبوو، وی ئه‌و پاره ژ بۆ سه‌ركرده‌كێ دیارێ ئێكه‌تیا نشتیمانى بریه، ژ ڤێ یه‌كێ خرابتر ژى ئه‌و تلێ گومانێ بۆ هه‌موو پارتێن سیاسى ئاراسته دكه‌ت و د راستى هه‌موو ئه‌و كه‌سێن چووینه ناڤا هه‌ڤپه‌یمانییا وى پێشتر دناڤ پارتا خوه چه‌پ و راست د حكومه‌تێ دا خوارینه و پشتى فه‌شه‌ل ئیناین ژنوو په‌نایێ بۆ هه‌ڤپه‌یمانییا به‌رهه‌م برینه. (گوتاره‌كا دى دێ ل سه‌ر وان دوو سالێن خێر و به‌ركه‌تێ پتر ئاخڤم)
باشه، كه‌واته بۆچى پارتى ژ بۆ نه‌یارێن خوه خێر و به‌ره‌كه‌ته؟ چونكى هه‌موو ئه‌و پارتێن سیاسى ل سنوره‌كى خرڤه‌بووینه‌و خه‌لكێ وى سنورێ وه‌ها بریارێ ل سه‌ر سیاسى و سیاسه‌تڤانان دده‌ن، هه‌ر پارته‌ك و كه‌سه‌كێ پتر جڤین و قه‌سێن نه‌خوه‌ش ل هه‌مبه‌رى پارتى بكه‌ت، ئه‌و دێ پتر بیته جهێ باوه‌ریا وان و دێ پتر ده‌نگان ئینیت، له‌ورا ته‌ماشه‌ى چارساڵێن بوورى بكه، ژبلى پارتى هه‌موو حزبێن دى ب هه‌موو ره‌نگان بزاڤا ره‌شكرن و ژناڤبرنا ڤێ كابینه‌یا حكومه‌تا هه‌رێمێ دكرن، لێ حكومه‌ت و سه‌رۆكێ وێ ب بهێزى مان و پارتێن دن ژى مانه ده‌ست ڤالا، چونكى مه‌عقول چییه تو بخوه ب هه‌موو هێز و حه‌زا خوه ژ عه‌بادى و به‌غدایێ بخوازى مووچه‌یێ خه‌لكێ كوردستانێ نه‌هنێرێت و ل داویێ ژى حكومه‌تا هه‌رێمێ پێ تاوانبار بكه‌ى!! كه‌واته بینه پێش چاڤێن خوه ئه‌گه‌ر پارتى نه‌با، حزبێن ل ده‌مێ بانگه‌شه‌ى دا بۆ خه‌لكێ خوه چ بێژن؟ كه‌واته ده‌مێ چاڤپێكه‌فتنه‌كا ته‌له‌فزیۆنێ ئێك ده‌مژمێر ناخێ خوه‌یێ ره‌ش و ل هه‌مبه‌ر پارتى نیشان دده‌ى و هه‌تا دوو ده‌نگان پێ خرڤه دكه‌ى، هه‌ر چ نه‌بیت، پشتى به‌رنامه‌ى و دوور ژ كامێرێ، بێژه: سوپاس پارتى..
