دیارە ھەتا ھندەک مرۆڤ و سەرکردە د ھزرا ئاڤاکرن و گھۆڕین و پێشڤەبرنا نەتەوە و خەلک و جڤاکا خۆ و ئاسوودەکرنا و پاراستنا وانە ژ نەیاران و داگیرکەران، و ھەتاکۆ بۆ ڤێ چەندێ گازندا ژی دئیننە سەر خۆ، ھندەکێن دیتر ل ڤێ جیھانێ تنێ بۆ ڤەمراندنا حەزێن نەجوان و کەرب و کین و ڕکێن خۆ و تێرکرنا وان، دەست بۆ تشتەکی و کارەکێ نەشرین و کرێت دبەن، ھەتاکۆ ھەکەر ب بھایێ ژناڤچۆنا ھزاران مرۆڤ و ژن و زارۆکان ژی بیت. ئەوان گۆە ل ھندێ نینە کا دێ ب ڤان کریاران چ بسەر کێ ئێت.
ژ جۆرێ ئێکەمێ وان سەرکردێن دلسۆز بۆ خەلکێ خۆ سەرۆک بارزانییە کۆ لڤان چەند سالێن دۆماھیکێ ھەمی ھەولێن خۆ دان بۆ دروستکرنا کەشتیەکا ئارام بۆ ھەمی ئاکنجیێن کوردستانێ و بۆ ڤێ مەبەستێ خۆ ل سینگێ ھەمێ جیھانێ دا و ڤیا وان تێبگەھینیتن ھەمی کوردستانی و بێ جیاوازیێن باوەر و ئایین و نەتەوە و نەژادی، و ب حنێرا پێشمەرگێ قەھرەمان ھەژی ژیانەکا ئارامترە ژ ئەڤا نۆکە، دا لبن ھێدی ژ گەندەلکار و داگیرکەر و تیرۆر و دەمارگیر و ھەمی نەخۆشی و پیسەمرۆڤان و ھۆڤەنەتەوە و وەلاتان دویر بیت، و ھەتا مرۆڤ گۆتارێن پەرتووکا چەند بەرگییا ( مەسعود بارزانی: پێشمەرگەیەک لە پێگەی سەرۆکی ھەرێمدا ) نەخوینت د کەساتییا وی و حەز و ڤیانا وی بۆ ڤێ مەبەستێ ناگەھیت، و نزانیت د ڤی ئاستی و قۆناغا ژیانێدا چ فەلسەفە و بنەما و نھێنی و ئاراستە و جیھانبینییەک بۆ ژیانێ ب گشتی و سیاسەت و دەستھەلات و رێڤەبرنا کوردستانێ د ھزرێدایە.
دیارە نموونە ژی بۆ جۆرێ دووھەم گەلەکن و یێن ژ ھەمییا نویتر ئەو سەربازێن خۆپەرێستێن جۆھینە یێن لڤی ماوەی ھزاران گەنج و زارۆک کۆشتین، تنێ چونکی یێن بووینە پێتڕانکێن بازرگانێن سیاسی ل جیھانا ئیسلامی و وەلاتێن تێر و تژی یێن عەرەب و خەلیجی، و یارییان ب ھەست و سۆز و دلسۆزییا وێ خەلکێ سادە دکەن و بەرێ وان ددەنە ئاقارێ مرنێ تنێ بۆ مەزنکرنا ئاریشا و نەک بۆ مەبەستەک دیتر. دیارە سەربازێن جۆھی ژی ژ ھندێ زۆردارترن دلۆڤانیێ ب وان ببن. ئەو ئاریشا دیرۆکییا دشێتن گەلەک ب سانەھی چارەسەر ببیت، و خۆدێ جۆھی و فەلەستینی و عەرەب ژی باش دزانن نە فەلەستینی عەرەبن بەلکۆ نەتەوەکن جیاواز و سەر ب نەژادێ سامی و پاشمایێن فینیقیانە،نە ئەو و نە جۆھی خەلکێ رەسەنێ فەلەستینا نۆکە نینن و ھەر دوو مێھڤان و بەلکۆ داگیرکەرنٍ، و ئەڤ حنێرا ب ھەڤدۆ دکەن و مە ھەمیا د ئاگرێ خۆ دا دسۆژن. نموونەک دیتر ژی بۆمبارانکرنا کێمیایی یا خەلکێ بێ تاوانێ سووریایێ ژ ئالیێ رژێما ئەسەدیڤە، و ب پشتەڤانیا ئیران و رۆسیایێ و ژناڤبرنا ھزاران کەس و زارۆک و ژنکێن کۆ ھەتاکۆ ھەکەر بمیننە ساخ ژی ھەتا دۆماھییا ژیانێ د ئێش و ئازارێن دەروونی و جڤاکی و نەساخیێن سایکۆلۆژی دا دێ کەلن و حەلن، وەک زارۆک و ژن و زەلامێن حەلەبچەیا کوردستانێ. بلا بەری ھەر وەلاتەکی ئەم گازندا ش خۆ بکەین و بزانین راستی ڤان دەستھەلاتدارێن بناڤ مۆسلمان، ھندی یێت نەمۆسلمان، دلێ مرۆڤی ژ گەلەک تشتا رەش کرن:
بێ ناڤێ خۆدێ نامە ڤەنابن
بێ وەلات ئەم قەت ئازاد نابن
پشتی مرنێ نە من ئەڤ ناڤ و نە چ بەھی
تنێ بنڤێسن لسەر گۆڕێ من ئەڤێ:
" ناڤ زەردەشتە ش کوردستانێ".
مخابن سەرکردێن ھۆڤ و خۆپەرێست بەرێ جیھانێ ددنە ئاقارێن ھۆسا، و بۆ بازرگانێن ئەورۆپی ژی بسانەھییە ھەر تشتەکێ بۆ بەرژەوەندییا خۆ بکەن ھەتاکۆ ب نەمانا ھەمی مرۆڤاتیێ بیت.