په‌یوه‌ندى به‌رێوه‌به‌ر له‌گه‌ڵ مامۆستاكانى له پڕۆسه‌ى په‌روه‌رده
بەکر کەریم حەسەن
قوتابخانه‌كان گرنگترین دامه‌زراوه‌كانى فێڕكردنن كه پێویستیان به بوونى په‌یوه‌ندى زۆر باش هه‌یه له نێوان سه‌رجه‌م ئه‌ندامانى ئه‌و قوتابخانانه به تایبه‌تى به‌رێوه‌به‌ر له‌گه‌ڵ مامۆستاكان و فه‌رمانبه‌رانى قوتابخانه‌كه، ئه‌گه‌ر هاتووو به‌رێوه‌به‌ر هه‌وڵى دا په‌یوه‌ندییه‌كى په‌روه‌رده‌یی درووست له نێوان خۆی و مامۆستاكان و فه‌رمانبه‌رانى درووست بكات ئه‌وا هاوكاری و یارمه‌تیدان له نێوانیان درووست ده‌بێت ، وه ئاڵ و گۆڕی متمانه و دڵنیایی و رێزگرتن درووست ده‌بێت و له سه‌ر ئه‌و بنه‌مایه لێك تێگه‌یشتن و گونجان ده‌بێته ده‌ستپێكردنى كاره‌كانیان و ئاستى فێركردن و په‌روه‌رده‌ش له قوتابخانه‌كه به گشتى سه‌ركه‌وتوو به‌رهه‌م دارده‌بێت، ئه‌گه‌رهه‌ر دوو دڵى و ڕاڕایی وجیاوازى كردن له په‌یوه‌ندییه‌كان هه‌بوو له نێوان به‌رێوه‌به‌ر و مامۆستاكان بێگومان ده‌بێته به‌ربه‌ست و رێگری سه‌ره‌كى له رێگاى په‌روه‌رده و فێركردنو گیروگرفته‌كان له قوتابخانه زیاد ده‌كات، بۆیه ئه‌گه‌ر هه‌ر به‌رێوه‌به‌رێك له سروشتى كاره‌كان و ئه‌ركی خۆی و به‌رپرسیاریه‌تى كاره‌كه‌ى تێگه‌یشت و زانى چۆن سه‌ركردایه‌تى قوتابخانه ده‌كات و كه‌شێكى په‌روه‌رده‌یی له باروگونجاو له قوتابخانه درووست ده‌بێت پشت به‌ستوو به رێزگرتنى تواناكانى سه‌رجه‌م مامۆستاكان و ئاڵوگۆڕكردنى بیرو ڕا و بۆچوونه جیاوازه‌كان له سه‌ر په‌روه‌رده وفێركردن تاكه ئامانج به‌ره‌وپێشبردنى پڕۆسه‌ى په‌روه‌رده و فێركردن بێت و هاوكارى مامۆستاكان بكات و له گیروگرفته‌كانیان بگات و چاره‌سه‌رى كێشه‌كانیان بكات له قوتابخانه‌دا، چونكه ئه‌ركى به‌رێوه‌به‌ر و په‌یوه‌ندى كردنى له‌گه‌ڵ مامۆستاكان هه‌ر ته‌نها سه‌لاوكردن و قسه‌ى خۆش و بزه دابه‌شكردن نییه ، به‌ڵكو تێگه‌یشتنى قوول هه‌بێت له‌لایه‌ن به‌رێوه‌به‌ر بۆ توانا و دڵسۆزی و بارودۆخی مامۆستا و فه‌رمانبه‌رانى قوتابخانه‌كه ، ئه‌مه‌ش كه‌شێكى خێزانى متمانه پێكراو له قوتابخانه درووست ده‌كات و كاریگه‌ری ده‌بێت و شوێنه‌وارى باش له ناخ و ده‌روونى سه‌رجه‌م مامۆستاكان جێ ده‌هێلی و مامۆستاكان هه‌ست به ئاسوده‌یی ده‌كه‌ن له قوتابخانه ئه‌و دڵسۆزییان بۆ كاره‌كانیان زیاتر ده‌بێت، ئه‌وكات له پۆڵه‌كان وانه‌كانیان به باشى ده‌لێنه‌وه و ده‌رئه‌نجام ئاستى فێركردن و په‌روه‌رده له قوتابخانه به‌رز ده‌بێته‌وه و كه مامۆستاكان گڕوتینى و په‌رۆشیان بۆ كاره‌كانیان زیاتر ده‌بێت و به‌رده‌وام هه‌ست به به‌خته‌وه‌ری و ئاسوده‌یی و دادپه‌روه‌ری ده‌كه‌ن له قوتابخانه‌دا ، ئه‌و كه‌شه گونجاوه ئه‌وكاته له‌سه‌ر زه‌وی و ناو قوتابخانه‌كان جێ به‌جێ ده‌كرێ و دێته‌دی ئه‌گه‌ر هاتوو كارامه‌یی هونه‌ری هه‌ڵسه‌وكه‌وت كردنى به‌رێوه‌به‌ر له‌گه‌ڵ مامۆستاكان له‌لایه‌ن به‌رێوه‌به‌ر بوونى هه‌بێت بابه‌تیانه و بێ جیاوازى ڕه‌فتار له‌گه‌ڵ مامۆستا بكات ئه‌وه‌ش هۆكارێكى تری كاریگه‌ره له‌سه‌ر گه‌شه‌پێدانى ڕۆلی به‌رێوه‌به‌رى قوتابخانه.
به‌رێوه‌به‌رى گشتى چاڵاكى وه‌رزش و هونه‌ر
ماسته‌ر له كارگێرى په‌روه‌رده‌یی
