دڤان چەند روژان دا ھێرشەک بەرفرەە ل راگەھاندێن پشکەک ژ پارتێن سیاسی و سێبەر دا دەستپێکریە ل دژی سەروک وەزیرێن حکومەتا ھەرێما کوردستانێ کوردستانێ , وەک پشکەک ژ ھەوا ھەلبژاردنان و شکاندنا وان دەستکەفێن کو د سیاسەتێ ب خالێن گرنگ و کاریگەر دئێنە ھژمارتن کو نێچرڤان بارزانی ل پشتی شازدێ ئوکتوبەرێ بدەست ئینای.ئەڤ چەندە ژی ل وی دەمی دا ھات کو ماموستا و فەرمانبەران نەرازیبون دەستپێکری ل چەند باژێرێن کوردستانێ.دڤێرە دا یا روون و ئاشکرا ئەوە کو ماموستا خوەدی مافن و بو دەمێ سێ سالانە ژین و ژیارەکا نەخوشدەرباز دکەن و ئەرکێ خوە یێ پێگەھاندنا نفشێ پاشەروژێ ژی بەردەوامن . فەرە رێز ل ماموستای بێتە گرتن.
داوی بریارا حکومەتا ھەرێما کوردستانێ کاریگەریەکا ئەرێنی ل سەر دەروونی ماموستا و فەرمانبەر کر ب کێمکرنا رێژا پاشکەفتێ موچەی و ب ڤێ بریارێ بازرا ژی دێ گەشەکا باش کەن. ب ھیڤیا ھندێ کو ئیدی دوو پەیڤ ل فەرمانبەرا ڤە ببن (پاشکەفت و بەپەلە) بو موچەی.
تشتێ جھێ پرسیارێ ئەوە نھا کوردستان ل پشتی شازدێ ئوکتوبەرێ ل باشترین دەم دایە و پتر پێتڤی ب رێکخستنا ناڤ مالا کوردی ھەیە و , ھەروەسا حکومەتێ رێژا پاشکەفتی باش کێمکریە , ھیڤیەک بو جڤاکی زڤریەڤە . بوچی ھێرش و تانە و تومەت بو حکومەتێ و سەروکێ حکومەتا ھەرێما کوردستانێ دەستپێکریە ؟ ب دیتنا من دوو خال بەرسڤن ئەو ژی تاکێ کورد ب درێژاھیا دیروکێ بەردەوام دژی سەرکردێن خوەیێن سیاسی و نەتەوەی و ھەتا ئولی ژی راستایە و کار بو شکاندنا وان کریە . ھەروەسا تشتێ بازارێ توھمەتا گەرم کری نیزیک بونا ھەلبژاردنانە.
ب گروڤە و ھژمار و کردار و واقع و سەر ئەردی دا بزانین نێچیرڤان بارزانی چ کریە ل شەش ھەیڤان دا , تایبەت پشتی شازدێ ئوکتوبەرێ :
پشتی خیانەتا شازدێ ئوکتوبەرێ حەشد و سوپایێ عیراقێ ب ھەمی ھێزڤە ھات و کار دکر بو ھندێ بچنە داویا سنورێ کوردستانێ ! بەلێ ل شەرێ پردێ و زومار سنور بو ھێزێن عیراقی ھاتە دانان . پشتی ڤی شەری ژی بەردەوام گەفا شەری ل کوردستانێ دھاتە کرن ژ ئالیێ بەغدا ڤە. بەلێ بو ھندی کوردستان یا پاراستی بیت و نەبیتە پشکەک ل ململانێن دەڤەرێ , سەروکێ حکومەتێ بەردەوام دگوت ئەم شەری رەتدکەین و بەرھەڤی دانوستاندناینە . ب ڤێ سیاسەتا نەرم غرورا سەرکردێن عیراقێ ھاتە خارێ نەچاری دانوستاندنا بون.
ھەر ل درێژاھیا وان کارێن دژی ھەرێما کوردستانێ ھاتیە کرن ژ ئالیێ بەغدا ڤە دوورپێچا ل سەر فروکەخانە و دەرازینکێن سنوری بو . ب ھەولێن بەردەوامێن سەروک وەزیران و دووپاتی کرن ل سەر جێ بەجێ کرنا دەستورێ عیراقێ , شیا ھێزێن نێڤدەولەتی پالدەت کو گڤاشتنا ل سەر عەبادی بکەن . ئەو بو فروکەخانە و دەرازیکێن سنوری ژی ھاتنە ڤەکرن.
پشتی ریدانێن شازدێ ئوکتوبەرێ و ئەو دورپێچا ل سەر کوردستانێ ھاتیە سەپاندن , دەرگەھێ پەیوەندی کرن ب دەرڤە زەحمەت کەفت تایبەت دەمێ جیھانێ دیتی گروپەکێ کوردی ل ڤی خیانەت و ھێرشێ پشکدارە. ب ھەول و ماندیبونەکا زور و ل رێکا فروکەخانێن وەلاتێن دەڤەرێ نێچیرڤان بارزانی شیا بگەھیتە پاریس و برلین و میونخ و دافوس و تەھران .دەھان کومبون ل گەل بەرپرسێن جیھانێ ئەنجامدان و ب ڤێ ئێکێ رەوشا دبلوماسیەتا کوردستانی ڤەگەریا بەری خیانەتا شازدێ ئوکتوبەرێ و بگرە ب پێکولێن بەردەوامێن سەروکێ حکومەتێ باشتر ژی بویە.
ل خالێن ھەری گرنگ کو ڤان شەش ھەڤێن چوی کار ل سەر ھاتیە کرن ژ ئالیێ سەروکێ حکومەتا ھەرێمێ بریارا چاکسازیێ بو کو ب ڤێ بریارێ پتر ژ سەد ملیار دیناران بو حکومەتێ دێ ڤەگەرینیت. ھەروەسا کارەک باش ژی ھاتیە کرن بو شەفاف کرنا داھاتێن کوردستانێ.ناڤبرنا گەندەلیێ بەردەوامی دان ب چاکسازیێ نە ئەرکەک سڤکە ژ بەرکو ئەڤ سەروبەرێ ھەیی ل سالا ١٩٩٢ دەستپێکریە ھەتا نھا .
ل داویێ فەرە تاکێ کورد ل وێ چەندێ ھوشیارتر بیت کو ھەر چار سالان جارەکێ بو مەرەمێن حزبی بێتە کار ئینان و شاشی ل بەر چاڤی بێنە بەرزە کرن , ھەبونا گەندەلیی و نەدادی حاشا ھەلنەگرە بەلێ زڤرینە سەر پێ خوە پشتی شازدێ ئوکتوبەرێ ژی بەرەڤانیکەرەک گرنگە بو حکومەتا ھەرێما کوردستانێ و کەسێ سەروک وەزیران ژی بخوە . داخازکرنا مافان کارەک نورمالە و ھەمی تەخ و چینێن وەلاتی مافێ خوەنشیاندان و داخازکرنا مافان ھەیە ب رێکا مەدەنی و دیر ژ توند و تیژیێ . بکار ئینانا ڤان نەرازیبونا بو بەرژەوەندیا حزبی نەد جھێ خوە دایە و فەرە ھەمی ئالیەک ب دەستھەلات و ئوپوزسیون ڤە وەک داکوکی کار بن نەک پالدەر و پشکدارێن ئێکەتیێن پیشەی دا.ھەوا راگەھاندنێ دژی نێچیرڤان بارزانی د ڤی دەمی دا جھێ پرسیارێ یە ؟ ژ بەرکو شیایە ل ڤان شەش ھەیڤان دا کوردستانێ ل شەری بپاریزیت بەرامبەر بەغدا و ھەمی پێکول کرینە بو دووبارە ڤەگەراندنا پێگەھێ کوردستانێ ل نافخو و دەرڤە و ھەروەسا کارەک باش ژی کریە بو رێکخستنەڤا ناڤ مالا کوردی . ب دبلوماسیەتا سەرکەفتی شیایە کو عیراقێ نەچار بکەت فروکەخانە و دەرازیکێن سنوری ڤەبکەت .
بەرەڤانی کرن ل کارێن سەرکەفتیانە یێن سەروک وەزیران وێ ناگەھینیت کو چو کێم و کورتی ل ڤی وەلاتی دا نینە , بەلێ توش بونا ڤێ قەیرانێ مەزنترین کێم و کورتی یە . بەلێ (رێکا ھزار کیلومەترا ب ئێک مەتر دەست پێدکەت ) . ئەو پێنگاڤێن دەست پێکری دلخوشکەرن . بەلێ ب ھەست کرن ب ھندێ کو خودایەک ل سەر سەرێ مروڤی یە , ھەروەسا ویژدانەک ساخ و دەست ل ناڤ دەستیێ دێ گەھینە حوکمەکێ رەشید کو ماف بدروستی بو خودان مافی بزڤریت و دادپەروەریا جڤاکی ل وەلاتی دا بەرپا ببیت.