حكومەتێكی بەهێز لە نێو عێراقێكی پر قەیران و ئاڵۆزی بەردەوام ..
رێبوار حەمەلاو شوانی
نەتەوەیی كورد ، لەو كاتەوە خەباتی لە پێناو مافەرەاكانی كردووە ،هیچ كات باوەری بە شەرٍو توند و تیژی نەبووە و بە ناچاریی شەرٍی كردووە لە پێناو ئەوەی كۆتایی بە شەرٍ بێ و داگیركەران لەو راستییە تێبگەن كە دەبێ خاك و ماف داگیراوان بگەرێتەوە .بزاڤی ڕزگاریخوازی كوردستان هیچ كاتێك ئامادەنەبووە تەعەدا لە هیچ كەس و لایەن و هێزێك بكات وە تەعەداشی لە هیچ هێز و لایەنێك قەبول نەكردووە، لە دواهەمین داستانیشدا لە پردێ و زومار و سحێلا و تلسقۆف ئەم راستیەیە سەڵمێنرا، كە جگە لەوەی داستانەكە ئیلهام بەخشی بەرخودانی پێشمەرگە بوو وانەیەكی گرنگیش بوو بۆ بەغدا كە چۆن پێشمەرگە شكستی بە هێرشی میلیشیا عێراقیەكان هێناو دەریشی خست ئەگەر خیانەت و پیلان نەبوایە ئەستەم بوو كەركووك و ناوچەكانی تری كوردستانی جارێكی تر داگیربكرێنەوە، بەڵام لەگەڵ ئەمەشدا سەركردایەتی سیاسی كوردستان هەموو كات ویستوویەتی لە رێگای ئاشتی و لە چوارچێوەی دەستووردا كێشەكان چارەسەر بكرێن كە گۆرانكاریەكانی چەند رۆژی رابردوو لە سیاسەتی حكوومەتی بەغدا جێگای دلخۆشین و دیبلۆماسیەتی سەرۆكی حكوومەتی هەرێمی كوردستان و راوێژكاری ئەنجوومەنی ئاسایشی هەرێمی كوردستانی سەلماند كە لەژێر ڕۆشنایی ئەم گۆرانكاریانە پێویستە دەسەلاتدارانی عێراق چاك لەوە تێ بگەن، كە كێشەی گەلی كوردستان كێشەی نەتەوەیی و دەستوری و خاكە كە ئەمەش سادەترین مافی هەر مرۆڤێكە بۆیە نابێت وا بیربكەنەوە كە بە كردنەوەی فڕۆكەخانە و ناردنی برێك مووچە و بوودجە ئیدی تەواو هیچ كێشەیەكمان نەماوە، چونكە تا كێشەی نەتەوەییمان چارەسەر نەكرێت ئەوا كێشەی كورد چارەسەر نابێت كە حەقە بە جددیش بیر لەو مەسەلەیە بكرێتەوە هەول بدرێت لەسەر بنەمایەكی راست و دروست لە چوارچێوەی دەستوری عێراقدا سەرجەم كێشەكان چارەسەربكرێن چونكە رابردوو دەریخست بە پێشێڵكردنی دەستوور نەتوانرا گرفتەكانی نێوان بەغداد و هەولێر چارەسەربكرێن، بۆیە دەبێت فەرهەنگی ئینكاری تاكی كورد و پەراوێزخستنی مافەكانمان كۆتای پێ بهێندرێت كە ئەمەیان فەرهەنگێكی شۆڤینیەو میراتی رژێمی لەناوچووی بەعسە كە هەمیشە بروای بە مافی نەتەوەكانی تر نەبووەو كاری لەسەر شكاندنی شكۆی مرۆڤ دەكرد، بۆیە لە سایەیی حیكمەتی سەرۆك مەسعود بارزانی و قارەمانیەتی هێزی پێشمەرگەی كوردستان و خوێنی شەهیدان و خۆراگری خەڵكی كوردستان قۆناغە سەختەكەمان تێپەڕاند و وا كۆتای دێت، بەڵام ئەمەش مانای ئەوە نیە كە ئیدی خەونی دێرینی گەلی كوردستان بۆ سەربەخۆیی بە كۆتا هاتووە، كە سەدەیەكە لەم پێناوەدا خەبات و قوربانی دەدرێت و ئامانج و ستراتیژیەتی هەموو شۆڕش و ڕاپەڕینەكانیش سەربەخۆیی بووە، وە بینیشمان چۆن لە ٢٥ـی ئەیلوولی رابردوودا زۆرینەی خەڵكی كوردستان دەنگیان دا بۆ سەربەخۆیی، كە ئەمەشیان تاوان و گوناه نەبوو، بەڵكو مافێكی ئاینی و نەتەوەیی و سروشتی خەڵكی كوردستان بوو، راستە بەهۆی چەند هەلومەرجێكی سیاسی و بەتایبەت خیانەتە مێژوویەكەی ١٦ـی ئۆكتۆبەر ئەنجامی ریفراندۆم سركرا، بەڵام گرنگە دوژمنان باش بزانن ئەگەر بە زەبری هێز و رێكاری سەربازی وەڵامی خواستی رەواو دیموكراسیانەمان بدەنەوە، بەڵام ناتوانن بەربەست بۆ پاشگەزبوونەوەمان لە سەربەخۆیی دروست بكەن و بە دڵنییاییەوە خۆراگریمان و ئاشتیخوازیمان و پێداگیرمان لە سەر مافەرەواكامان لە گەیشتن بە ئامانجە رەواكانمان نزیكمان دەكاتەوە .
