پتر ژ سێ سالانه قه‌یران و نه‌بوونا مووچه‌ى هه‌رێما كوردستانێ ڤه‌گرتى، ئه‌ڤ یه‌ك ژى نه بتنێ بوویه ئاریشه، به‌لكو ژ بۆ هند پارت و ئالیێن سیاسى بوویه خێر و به‌ره‌كه‌ت و وه‌كو كارته‌كێ ژ بۆ شكاندنا هه‌ڤدوو بكاردئینن، سه‌یر ئه‌وه ل ده‌ستپێكا سالا 2014 ب برینا بودجه و مووچه‌یێ فه‌رمانبه‌ران ئه‌ڤ ئاریشه درووست بوو، بۆ ده‌مێ پتر ژ دوو سالان هه‌ر پێنچ پارتێن سیاسى و بۆ ده‌ما چار سالان ژبلى گۆران هه‌ر چار تێن دى یێن سه‌ره‌كى دناڤا حكومه‌تێ بوون، لێ ده‌ما هه‌لبژارتن نزیك بووى، گۆران و كۆمه‌ل و ئێكگرتوو خوه ژ حكومه‌تێ ڤه‌كێشا، ژ نوو هه‌ست ب وێ یه‌كێ كر كو خه‌لك پێدڤیه و ئه‌ڤ ره‌وشا خه‌لكى بخوه ب ده‌رفه‌ت دیت ژبۆى كو ده‌نگێ خه‌لكى ژ بۆ خوه كۆمڤه‌كه‌ن، باشتر بوونا ره‌وشا هه‌رێمێ د به‌رژه‌وه‌ندا وان دا نینه و هه‌ر ژ به‌ر ڤێ یه‌كێ گۆران و كۆمه‌ل و ئێكگرتوو لیستا دكتۆر به‌رهه‌م سالحى، ژ عه‌بادى خواستن مووچه‌یێ فه‌رمانبه‌رێن هه‌رێمێ ره‌وانه نه‌كه‌ت. ئه‌ڤه نه ل سه‌ر گۆتنا من و عه‌بادى بخوه گۆتیه كو ئه‌ڤ پارتێن سیاسى كو سه‌ره‌دانا وى كرین، داخواز ژێ كریه مووچه‌یێ خه‌لكێ هه‌رێمێ نه هنێریت، ئه‌ڤه ژلایه‌ك، ژلایه‌كێ دى ڤه پشتى رێكه‌فتنا هه‌ولێر و به‌غدایێ ل سه‌ر هنارتنا به‌شه‌كێ مووچه‌یێ فه‌رمانبه‌رێن هه‌رێمێ شه‌پۆله‌كا سه‌رتاسه‌رى یا خوه‌نیشاندانێ هه‌رێما كوردستانێ ڤه‌گرتیه، هیچ پارت و ئالییه‌كێ سیاسى ژى دژى ڤێ خوه نیشاندانێ نینه و ب مافێ ره‌وایێ فه‌رمانبه‌ران دزانن، رێكخه‌رێن خوه‌نیشاندانێ بخوه مامۆستا و فه‌رمانبه‌رن و بێ هاریكاریا هیچ ئالییه‌كێ سیاى شیاینه ئه‌ركێ خرڤه‌بوونێ ب ئه‌ستۆیێ خوه‌ڤه بگرن، لێ تشتێ سه‌یر دهێته دیتنه ئه‌وه كو ژ نشكه‌كێ ڤه په‌رله‌مانتار و سه‌ركرده‌یێن هند پارتێن سیاسى دناڤا وان دهێنه دێتن و ب دروشمێن دژى ده‌سته‌لاتى و (ئه‌لاهو ئه‌كبه‌ر) هه‌ولدده‌ن سۆز و عاتیفه‌یا خوه‌نیشانده‌ران بۆ خوه رابكێشن، مه‌لایێ سیاسه‌تڤان شاش د خوه‌نیشاندانێ گه‌هشتیه و هه‌ر ب سه‌ر مینه‌رێ تێگه‌هشتییه و هه‌ر ده‌ما به‌رسڤ ژ بۆ پرسیارا رۆژنامه‌ڤانى نه‌دما ب ده‌نگێ بلند (ته‌كبیر) لێددان هه‌روه‌كو جیهادێ دكه‌ت، ژ بۆ داعشێ ژى رۆژه‌كێ نه‌گۆته هێزێن پێشمه‌رگه‌ى ئه‌وێ هوون دكه‌ن جیهاده، ژبۆ خوه‌راگریا خه‌لكى ل سه‌رده‌مێ شه‌رێ داعشێ و ل ده‌مێ قه‌یرانێ رۆژه‌كێ حه‌ماسا ده‌مێ خوه‌نیشاندانێ نه‌گرت و نه‌گۆته خه‌لكێ ئه‌وێ هوون دكه‌ن خێره و ب جیهاد حسابه، چار ساله خه‌لك د قه‌یرانێ دا نزا كابرایێ حاسیبه ل كیڤه بوو و بۆچى ب ده‌ڤه‌را زاخۆ نه‌دكه‌فت، لێ زاخۆیی هشیارن و دزانن سه‌ره‌دانا وى یا نها بۆ زاخۆ ئارمانج پێ چییه و ژ بلى بانگه‌شه‌یا هه‌لژارتنان؛ هیچ تشته‌ك دى ژ ره‌وشا وان نا گهوریت، ئه‌ڤه دده‌مه‌كى دایه كو چار سالێن بۆرى هه‌م دناڤا حكومه‌تا هه‌ڕێمێ و هه‌م ژى وه‌كو نوونه‌ر ل په‌رله‌مانێ ئیراقێ كه‌سێ هاى ژ ده‌نگێ وان نه‌بوویه و رۆژه‌كێ ئاخفتنه‌كا خێرێ د به‌رژه‌وه‌ندا خه‌لكێ هه‌رێمێ نه‌كرینه، ژلایه‌كێ دى ڤه، خوه‌نیشانده‌ر نها ژ هه‌موو پارتێن سیاسى بێ هیڤى بووینه و باش دزانن ده‌ما سیاسه‌تڤانه‌ك دچیته ناڤا خوه‌نیشاندانا وان دا، ژ بۆ چ ئارمانجه‌ك چوویه وێرێ؟! كه‌واته ئیدى دروشم و به‌یاننامه‌یێن پشته‌ڤانیێ هیچ مفایه‌كێ ناگه‌هینن خوه‌نیشانده‌ر و مووچه‌خۆران، ب لارێبرنا خوه‌نیشاندانێ و تۆمه‌تباركرنا هه‌ڤدوو هیچ ژ ره‌وشا مامۆستا و مووچه‌خۆران ناگهوریت، ئه‌وێ نها خوه‌دان ده‌ستهه‌لاته: حكومه‌ته و تلێ خوه نیشانده‌ران ژى بۆ حكومه‌تێ ئاراسته‌كریه، له‌ورا بهێلن مامۆستا بخوه په‌یاما خوه بگه‌هینن و خوه‌نیشاندانێن وان ژى نه‌كه‌نه ملكێ خوه، هه‌ر كه‌د و ره‌نجا مامۆستایان بوو كو حكومه‌ت پشتى رێكه‌فتن ل گه‌ل به‌غدایێ بریاردایه د كۆمبوونا بهێت یا جڤاتا وه‌زیرێن هه‌رێمێ گهورینێ د خشته‌یێ پاشكه‌فتا مووچه‌ى دا بكه‌ت، ئه‌ڤه ب خوه ژى ئاماژه‌یه‌كه كو ئاریشه‌یێن دارایی یێن هه‌رێمێ به‌ر ب گهورێنێ دچن.
کارزان فەقێ
