نازانم چی بنووسم، داستانێك، یان چیرۆكێك كورت بێ، یان درێژ، یا پەخشانە شیعرێك، یان شیعرێكی ئاسایی، یان رستەیەك، یان فرێزێك، یا وشەیەك، یا پیتێك كە سەرەتایەك بێ بۆ نیگارێك كە بكاتە وشەو لە وشەوە بۆ رستە. لە رستەوە بۆ كورتە چیرۆك، یان داستانێك كە خەمی نامۆیی و خەونەكانم لە بیر بباتەوە، یان وێنەی داستانێ كە هەموو رۆژێك لە یادەوەرییەكانمدا، وەك فەرهەنگێك كە خەرمانەی وشەكانم بڕازێنێتەوە..
كاتێك لە قوتابخانەی هەورامان لە گەڕەكی خەبات، لە خەم و ئازارێكی زۆر نالەباردا رووم كردە ئەو قوتابخانەیە، تا وانەیەك بە قوتابییەكانی ئەنفالكراوانی، قەرەداغ و هەڵەبجە و هەورامان لە ساڵێ ١٩٨٨ دا بڵێمەوە، لەو ساتەوە چەندان قوتابیمان پێگەیاند لەژێر قوتابخانە جەمەلۆنەكەی هەوراماندا، ئالەو كاتەوە وەك: نیگایەك بە دڵسۆز بە هاوسەرم ئاشنا بووم. ئۆخەیم كرد كە رووخساری جوانی ئەو هەموو ئازارەكانی لە بیر بردمەوە، وردە وردە، بە بیری رەنگینی ئەو خانەوادەیەكی خنجیلانەمان پێكەوە نا، ساڵ بە ساڵ و مانگ بە مانگ، هەفتە بە هەفتە، رۆژ بە رۆژ، سات بە سات، ئەو ئارامی و هێمنی بە من بەخشی، نیگارێك وەك گزنگی رۆژ، وەك تیشكی هەتاو تیشكی بە خزم و كەسوكاری من بەخشی، هەوێنی یارمەتی بوو بۆ هەمووان، ترووسكەی سەرتۆپی شادی بابان و هەورامان بوو، هەردوو لا كە ئەویان دەبینی، زامەكانیان ساڕێژ دەبوون، نەك جارێك سەدجار ئۆخەی خۆشییان بۆ نیگاری ئازیز دەنواند.
لێرەوە خۆت دەدوێنم:
شەوێ لە شەوەكانی، هاوینی گەرمای شاری سلێمانی، تەماشای وێنەو ئەلبوومەكانی تۆم دەكرد، ئاهـ چەندە جوان بوون. لە ناو هەموو وێنەكاندا تۆ دیار بووی، وێنەكان یادگاری شكۆی كۆمەڵایەتیی تۆیان دەنواند. تۆ نامۆ نەبووی بۆ هەمووان، بەڵكو تۆ سەرقافڵەی رشتەی مرواری بووی بۆ من و بۆ هەموو خزمان.
زۆر دەمێكە باڵندەیەكی جوان و قەشەنگ لە حەوشەی ماڵەكەماندا، فرەبەزەریفی بە دەنگێكی جوان دەجریوێنێ. ئێمە دڵنیاین ئەوە گیان، یان رۆحی خاوێنی تۆیە، لە ساباتی سەیوانەوە تۆ جار جارێ دێیتەوە ناومان. ئازیزەكەم تۆ زۆر جار دەتگوت: دەبێ زۆر بە ئاگایی ئاگامان لە یەكتری بێ، بۆ ئەوەی بە ئاسوودەیی ژیان بەسەر بەرین. تۆ ئێستا لە دوا گڵكۆی خۆتی، چاوی خێرت لە (من و ساناو خولیا گیان) بێت. دیارە هەر رۆحی تۆیە ئەو باڵندەیە، بە ئاوازی جوان دەخوێنێ، بیری شەیدایی تۆیە بۆیە هەردەم بە پاكی دێتەوە حەوشەی ماڵەكەمان.
ئازیزەكەم (نیگار گیان) هۆ شنەبای باخاتی هەورامان، هۆ گلێنەی چاوەكانم، لەو رۆژەوە، تۆ دواهەوارت لە سەیوانە. رۆژ بە رۆژ بیرەوەرییەكانم وەك: نەمامی هیوات هەردەمە لەسەر مێزی نووسیەنەكەمەو هەر جارەو تابلۆی شیعرێكت بۆ دەنووسم. تۆ گزنگی خۆری، یان شنەبای بەهاری، یان وەنۆشەی گوێ چەمی هەورامانیت؟ خۆزگە هەموو سۆزو میهرەبانیی جارانت، بۆ ئێمەت دەنواندەوە. خۆزگە وەك ئەو باڵندەیە جارێ وەك جاران ئێمەت دەدواند. خۆزگە بەیانییەك ببوویتایە بە میوانمان، ئێمە حەز ناكەین تۆ بە تەنیایی بژیت، دەمانەوێ لەم دنیایە و لەو جیهانەی پەسڵاندا پێكەوە ژیان بەسەر بەرین. ئاهـ هەستت خاوێن بوو، تێ ناگەین بۆ چی بە جارێ ماڵئاواییت لێ كردین، هەروەكو مەولەوی دەفەرموێ:
شورای عاشورا دیسان بەزمش بەست
موحەرەم ئاما (مەحرەم) شی نەدەست
تۆ مانگی ئازاری، یان مانگی نەورۆزی، بۆیە لە ماڵەكەماندا، لە (٢٣/٣/٢٠١٧) كۆچی دواییت كرد، تۆ (نیگاری) ئازیز بووی. بۆیە بە جەستە لەلامان نیت، بەڵام هەردەم رۆحت وەك باڵندەی بەهاری بەسەرماندا هاتوچۆ دەكات و نزاوپاڕانەوە لەلایەن یەزدانەوە بۆ ئێمە دەكەیەت.دواجار بۆ لای دكتۆری چارەسەرە، چونكە جار جار دەتگوت: (ئازارم زۆرە. بۆیە دەركەوت نەخۆشی شێرپەنجە زۆری بۆ هێناوی) لە دوای پشكنین و سۆنار، دیار بوو ئەو نەخۆشییە زۆر ئازاری دابوویت، دوای نەشتەرگەریت بۆ یەكەم جار تۆ زۆر باش بوویت، بەڵام تیشكی لێزەرەكەیان دواخستی، بۆیە بۆ جاری دووەم سەری هەڵدایەوە، دیسان نەشتەرگەری دووەمیان بۆ كردی، ئەم جارەیان تۆی لەناوی برد، چونكە شادەماری مێشكت و سنگتی وەك خانووی جاڵجاڵۆكە تەنراوی شێرپەنجە بوو. هەر هیوامان ئەوە بوو، هیواێكت بۆ بێتەوە، بۆ ئەوەی ژیانت ئاسوودە بێت، بەڵام ئەژدیهای شێرپەنجە بەرۆكی بەرنەدایت، بۆیە (من و سانا و خولیا) دەستی تۆمان دەگرت، هەنگاو بە هەنگاو بۆ لای پزیشكی پشكنینمان دەبردی، بۆ دواجار لە ماڵ چوویتە دەرەوە، بەڵام ئەمجارەیان نەگەڕایتەوە ماڵەوە، بۆیە بای شەماڵ گیانی تۆی بۆ سەیوان برد، ئیدی نەهاتیەوە لامان. هەركاتێكی ئەو یادەوەرییانە، بۆ ئێمە مردنێكە، نیگاری خان و مان، هەرگیز سیمای تۆ بۆ ئێمە لەبەرچاو ون نابێت، وێنەكانت هەر یەكەیان تابلۆیەكی خەمڕەوێنە بۆ ئێمە..
زۆر جار هەموو خزمان جەم بوون، بۆ ئەوەی خۆشی و شادی بۆ ئەوان بهێنیتەوە، بەڵام لە نەورۆزی (٢7١٧)دا پەڕەی گوڵت هەڵوەری، گردی سەیوان میوانداری كردی بۆ یەكجاری و كۆچت بۆ ئەوێ كرد، بۆیە رووخسارت لەلامان بە یەكجاری ون بوو. هەركاتێ بیرت دەكەین من منداڵەكان بە سەتڵە ئاوەوە، ئاوپرژێنی گڵكۆ و دار زەیتوونەكانت دەكەین، بۆ ئەوەی ئەو دار زەیتوونانە ببن بە ساباتێك تا هەتاوی هاوینە گڵكۆی تۆ نەپڕووزێنێت، كە دێینەوە لە سەیوان رۆژانی چوار شەممان، نە سیمای جارانی تۆ، نە دەنگ و رەنگی تۆ بە هیچ شێوەیەك بەدی ناكەین، بۆیە ئەلبومی یادەوەرییەكانت پەڕە بە پەڕە هەڵدەدەینەوە، لە یەكەمین وێنەوە تا دواوێنەت بە یەكجاری یادت دەكەینەوە. یادت دەكەینەوە..
هەموو ساڵێك كە نەورۆز دێتەوە خەرمانی خەمەكانمان سەرلەنوێ كۆدەبێتەوە. كۆتابێت بەم دێڕە شیعرەی مەولەوی:
ئیمساڵ نەو وەهار جون خەزانی زەرد
هەیا هۆش گەرمەن مەناڵۆ جە دەرد.
دارا هەورامانی
١٥/٣/٢٠١٨