نەوشیروان مستفا دوای زیاتر لە چل ساڵ یەکێتی بوون وەک ئەوەی لە هەسارەیەکی ترەوە هاتبێ کۆنە هاوڕێکانی خۆی کردن بە دوو بەش، بەشێکی لە هەرەمی دەسەڵاتی یەکێتی دەرهێنان و بەشەکەی تریشی بەجێ هێشتن و گوتی: ئەوانەی لەگەڵم هاتوونە دەرێ گۆڕانخوازن و ئەوانی تر گەندەڵن و قووتی خەڵک و سامانی گشتیان لە قوڕگی دێنەمەوە دەرێ و دەیاندەمە دادگا، دوای ماوەیەکی کەم هەردوو بەشەکەی رێکخستنەوە و گوتی: لەگەڵ یەکێتی کۆتایی بە بڕیاری تاکڕەوی سیاسی دێنین.
بەرهەم ساڵحیش دوای دەیان ساڵ یەکێتی بوون و بانگەشە بۆ دیموکراتی و دادپەروەری ئەو حزبە، بە هەمان شێوەی نەوشیروان مستەفا کۆمەڵێک گەندەڵکاری ناو یەکێتی بە دوای خۆی داون و وەک ئاماژە بۆ نادیموکراتی و نادادپەروەری یەکێتی، هاوپەیمانی بۆ دیموکراتی و دادپەروەری دامەزرادووەو وەک بەقاڵی چاک های دیموکراتی و دادپەروەری دەکات.
لە ئێستاوە بە رای گشتی کوردستانی رادەگەیەنم کە دوای چوار ساڵی تر نۆرەی منە، منیش دوای دەیان ساڵ پارتی بوون و خەباتی شاخ و شار، چەند گەندەڵێک لەناو پارتی دێنمە دەرێ و دەڵێم: پارتی گەندەڵە و چیتر گەندەڵی قبوڵ ناکەم و ئەوانەی لەگەڵ منن گەندەڵ نین و ئەوانەی لەناو پارتی ماونەوە گەندەڵن و ئەو گەندەڵانە لە رەگ و ریشەوە هەڵدەکەنم، دوای گەمە کردن بە خەڵکی هەژار چۆن کاک نەوشیروان لەگەڵ یەکێتی رێککەوتەوە و دڵنیام کاک بەرهەمیش لە داهاتوودا رێکدەکەوێتەوە، منیش لەگەڵ پارتی رێکدەکەومەوە.
ئای کوردی هەژار! دوای ئەوەی بەرپرسە باڵاکان لە گەندەڵیدا دادەڕزێن، لە گەمەیەکی کەرتبووندا خۆیان دەکەن بە پێشڕەوی کاروانی چاکسازی و دواتر لە گەمەیەکی تردا رێکدەکەونەوە، دواییش کۆمەڵێک گرد و میترۆ و کارگەی چەمەنتۆ و قومارخانە لەسەر کوڕەکانیان تاپۆ دەکەن و دەڵێن: بای بای، نوقتە وەرنەوە سەری دێڕ.