ئه‌م ئازادیخوازین نه‌ك جۆداخواز
د.نەسرەدین ئیبراهیم گۆلی*
راستى چ بۆ ڤێ چه‌ندێ و شێوازێ كلاسیكێ جه‌نگێ سایكۆلۆژى هندى بێته گوتن كێمه هێشتان كێمه و چ نه‌هاتیه‌گۆتن، لێ تنێ گه‌له‌ك، شه‌رمزارییه ل چه‌رخێ بیست و ئێكێ، سه‌رده‌م و چه‌رخێ ئازادییا تاكى و نه‌ته‌وان، شونیكا هنده‌ك لایه‌ن ڤى تیگه‌هى بۆ وى نه‌ته‌وێ كۆ هزاران ساله چ جۆرێ سته‌مێ نینه لدژى نه‌هاتیه بكارئینان، ڤى شێوازێ كریت و دویر ژ بنه‌مایێن مافێ مرۆڤان و ئازادییا نه‌ته‌وه وتاكه كه‌سى، و پره‌نسیپێن راگه‌هاندن و ئایین و ره‌وشت ولۆژیكى بكاردئینن، وپترتر ژى شه‌همزارییه هنده‌ك پارت ولایه‌نیێن كوردستانێ وته‌نانه‌ت بناڤ كورد ژى هه‌مان كارى دكه‌ن یان خراپتر ژ وێ، بزاڤا به‌رده‌وامییا بنده‌ستیێ دده‌ن وكمباختر ژى بزاڤێ دكه‌ن ببنه ئالاڤه‌ك بۆ مانا كوردستانیان لبن وێ داگیركارى وسته‌مگه‌ریێ، و ژهه‌مى ئه‌وان ژى رووێ ره‌شتر، ئه‌و گه‌نده‌لكارێن هه‌تا نۆكه و هه‌تا هه‌تا چاڤیێن وان ژ مالى و خانى و ترۆمبێل و كڕینا ڤێله و كۆشك و ته‌لار و گزیرتا لده‌رڤه‌ى كوردستانێ تێرنابن، و بوینه ئه‌گه‌ر هنده‌ك ناڤ ونیشانیێن جۆدا ببنه ده‌رگه‌هێ هندێ، هنده‌ك خۆ لدژى ئازادییا كوردستانیان بهلاڤێژن و ببنه ده‌رگه‌ه بۆ هندێ لایه‌ن و ولات تێگه‌هێ جۆداخوازیێ لسه‌ر ده‌مێ دیموكراسیه‌تێ بۆ وان كه‌سێن ژ هه‌ستیارى و ڤیان و دلسۆزییا خۆ بۆ مله‌ته‌كێ ماندى، بزاڤا ئازادیخوازیێ دده‌ن، لێ هه‌مى ئه‌و لایه‌نیێن تروهات دبنه ئاسته‌نگ لبه‌ر ڤێ ئێكێ، و فاكته‌ر و بناس و ئه‌گه‌ر هنده‌ك و خه‌لكه‌ك بێژنه مه جۆداخواز.
بخۆ جۆداخوازى ئه‌وه تۆ به‌شه‌ك بى ژ نه‌ته‌وه‌ى عه‌ره‌ب، بۆ نموونه، تۆ جۆداببى وببیه ده‌وله‌ته‌ك وه‌ك كوێت یان قه‌ته‌ر یان یه‌مه‌ن یان مه‌غرب، به‌لێ دیاره و ئاشكرایه وه‌كى رۆژێ رۆهنه، وه‌ك سه‌رۆك بارزانى دفه‌رمووتن "ئه‌م دوو نه‌ته‌وه و كه‌لتوور و فه‌رهه‌نگێن جۆدانه" و ئه‌م ئازادیخوازین نه‌ك جۆداخواز. چونكه ئه‌م لدویڤ ئایه‌تا 13 ژ سوره‌تا حه‌جه‌رات د بناغێ خۆ دا، ژ هه‌ڤدۆ جۆدانه، وئه‌ڤ سنوور و ستاتۆ و وه‌لاتیێن جۆگرافیایێن ده‌ستكرد تنێ تشته‌ك سیاسى و ساخته‌نه، و بۆ رۆژ ئاڤاییا چه‌سپاندنا هێزا ده‌ستهه‌لاتێ، و بۆ وه‌لاتیێن دیتر ژى داگیركرن وسته‌مگه‌رییه، كۆ رۆژه‌ك ژ رۆژان دوماهیكه‌كا هه‌یى. ئازادیخوازیى نه تاوانه و نه گۆنه‌ه ونه‌جۆداخوازییه به‌لكۆ تنێ ئازادیخوازییه و ئازادیخوازى جۆره‌ك ژ په‌رستنا یه‌زدانێ مه‌زنه، چونكه وى ئافرێنه‌رێ كه‌زن هه‌مى مرۆڤ وه‌ك ئێك یێن ب ئازاد ئافراندین.
*ئه‌ڤ بابه‌ته ل رۆژناما ئه‌ڤرۆ ل به‌رپه‌ڕێ 12 ل ریكه‌فتى 24/1/2018 هژماره 2277 هاتیه‌به‌لاڤكرن.
