هەموو ئەو گەل و نەتەوانەی لە قۆناغی رزگاری نیشتیمانیدا پرۆسەی بنیاتنانی دیموکراسییان پێش پرۆسەی رزگاری نیشتیمانی و گەیشاتن بە مافی سەربەخۆیی و دامەزراندنی دەوڵەت خستووە، وەک ئێستای ئێمەی کوردی ژێردەستە تووشی فەوزای سیاسی و لێکترازان و ئاشووب و ئاژاوەی ناوخۆ بوون، چونکە لە حاڵەتێکی واهادا و ئەگەر پرۆسەی بنیاتنانی دەموکراسی پێش پرۆسەی رزگاری نیشتیمانی و سەربەخۆیی بخرێ، وەک ئەوە وایە دەرگا کراوە بێ و هەوڵبدەی لە کون و کەلەبەری پەنجەرەوە بچیتە ژوورەوە،
کورد لە هەر چوار بەشەکەی کوردستان خاکی داگیر کراوە و زوڵم و ستەمی نەتەوەیی لەسەرە، کەچی لە باشوور بەناوی دیموکراتی ئەوەندەی چاوەکان لەسەر بایکۆت و جنێوفرۆشی و ئاژاوەنانەوە و یووک کردنی مێژووی بەرخودان و بێ بەها کردنی ئێستا و گومان خستنە سەر داهاتوو و دەست تێکەڵ کردنن لەگەڵ ئەم دوژمن و ئەو داگیرکار، چاوەکان ئەوەندە لەسەر بەدیهێنانی خواست و ئامانجە نەتەوەییەکان و پاراستنی دەستکەوتەکان و بەگژدا چوونەوەى ئەو زوڵم و ستەمە نین کە کوردیان دووچاری دەیان کارەسات و وەیشوومە کردووە.
مێژوو ئەو راستییەی سەلماندووە کە مەترسیەکانی بەردەم یرۆسەی رزگاری نیشتیمانی و سەربەخۆیی هەر گەل و نەتەوەیەک کاتێک دەردەکەون کە پرۆسەی بنیاتنانی دیموکراسی پێش بخرێ، چونکە لە حاڵەتێکی وەهادا دوو ئەگەری ترسناک دێنە پێش پرۆسەی رزگاری نیشتیمانی و سەربەخۆیی.
ئەگەری یەکەم:ــ بەناوی دیموکراتی دەرگا بە رووی دوژمنان و دەزگا هەواڵگریەکانیاندا دەکرێتەوە و دەتوانن بە ئاسانی لێیەوە بێنە ناو ریزەکانی شۆڕش، بەوەش کۆدەنگی یەکهەڵوێستی نەتەوەیی لەبار دەبرێ.
ئەگەری دووەم:ــ دەستە و گرووپە بەرژەوەند خوازەکان بوونی دیموکراتی وەک پەردە بەسەر هەڵوێستە نانەتەوەیی و نانیشتیمانیەکانیان هەڵدەکێشن و تەنانەت خیانەتیش پێ حەڵاێ دەکەن.
ئاخر دیموکراتی بە رزگار بوون لە دیکتاتۆری و توانەوەی بەستەڵەکی کۆنەخوازی لادانی پەردە لەسەر دەموچاوە بەرژەوەند خوازەکان دێتەدی، ئەتۆ ژێردەستەی رژێمێکی کۆنەخوارز و دیکتاتۆری وەک ئەوەی عێراق و پرێزەری بەرژەوەندی بەرژەوەند خوازەکان بیت، چۆن دەکرێ دیموکراتی پێش پرۆسەی رزگاری نیشتیمانی و سەربەخۆیی بخرێ؟!