بە درێژایی ساڵانی سەدەی رابردوو، لەو گرژیی و داگیركارییانەی ناوچەكەی گرتەوەو بە تایبەتی ئەو ستەمەی كە لە كورد كراوە لە لایەن وڵاتە زلهێزەكان و داگیركەرانی كوردستان، پێشمەرگە هەمیشە رۆڵی كاریگەری بینیووەو كوردستانی پاراستووە. مێژووی كورد چەندین شۆڕش و بەرخۆدانی بەخۆیەوە بینیوون كە پێشمەرگە قارەمانانە سەركەوتنی بەدەست هێناوەو توانیوویەتی، هەمیشە بە ورەو ئیرادەو باوەڕەوە، لەگەڵ هێزی پێشكەوتووی داگیركەراندا بجەنگێت و بە خۆشەویستیی نیشتمان و ئیرادەی خۆڕاگرەوە، كوردستان بپارێزێت. زۆرینەی هەرە زۆری ئەو شۆڕش و شەڕانەی رژێمی بەعس و داگیركەرانی كوردستان لەگەڵ كوردیان كردوون، بە سەركەوتنی پێشمەرگە كۆتاییان هاتووە، هەتا رزگاركردنی كوردستان لە دەستی بەعس. بەڵام ئەگەر ئەوسا پێشمەرگە وەها بایەخێكی جیهانیی پێ نەدرابێت و ناسراو نەبووبێت و هاریكاری نەكرابێت، ئێستا بەهۆی ئەوەی لەجیاتی جیهان شەڕی تیرۆر دەكات، جیهان هەمووی ئاشنایە بە پێشمەرگەو قارەمانێتیی، لە ئاستی نێودەوڵەتییەوە دانی پێدانراوەو هاریكاری دەكرێت.لە دەستپێكی شەڕی داعش، دوای ئەوەی سوپای عێراق بەو هەموو چەكە پێشكەوتووەی ئەمریكاوە شكستی هێناو بێ ئەوەی بەرەنگاریی بكات، موسڵ و كەركووك و چەندین ناوچەی تریان جێهێشت، پێشمەرگە دیسانەوە دەستی دایەوە بەرەنگاری و توانیی كۆنتڕۆلی تەواوی خاكی كوردستان بكات و بە درێژایی سنووری كوردستان بخرێتە ئامادە باشییەوە، هەرچەندە لەسەرەتا پێشمەرگە تەنها لە حاڵەتی بەرگریدا بوو، بەڵام دواتر خرایە حاڵەتی هێرش بردن و بە خوێنی چەندین شەهید، توانییان سەركەوتنی یەكجار گەورە بەدەست بهێنن و مێژوویەكی گەورە بۆخۆیان بنووسنەوەو شانازیی گەورە بۆ كوردستان وەدەست بهێنن. ئەگەر بایكۆتكردن ئازایەتی بێت ئەوا كەس لەپێشمەرگە ئازاتر و قارەمانتر نییە و هەموو جیهانیش شایەدی قارەمانێتی پێشمەرگە دەدەن و ئەگەر بایكۆتكردن حەق بێت ئەوا كەس لەپێشمەرگە موستەحەقتر نییە و هەمووانیش ئەوە باش دەزانن، بەڵام ئێوە دەزانن كە ئەگەر بێت و پێشمەرگە تەنیا ساتێك بایكۆتی بەرگریكردنی خاك و خەڵكی كوردستان بكات، ئەوا هەموو شەرەف و نامووسمان دەبن بە كۆیلە و سەبایای تیرۆریستان و دوژمنانی كورد. زیاتر لە پەنجا ساڵە پێشمەرگە خەبات دەكات و خوێن دەبەخشێت و گیانفیدا دەكات و منداڵی هەتیو دەكەوێت و خێزانی سەرگەردان و بێوەژن دەكەوێت و دایكی جەرگی دەسووتێ، زیاتر لە پەنجا ساڵە پێشمەرگە بەدەست بێ پارەیی و بێ مووچەییەوە دەناڵێت و ژیانییان لە شاخ یان لە وڵاتانی دیكە بەبێ دەرامەتی بەسەر دەبات، زیاتر لە پەنجا ساڵە پێشمەرگە كۆڵنادات لە بەرەنگاری كردن و شەڕی دوژمنانی كورد و بەبێ پارە و رۆژێك بەرژەوەندی و ئارامی و ئاسایشی كورد و كوردستانی نەخستۆتە پێش پارە و باری گوزەرانی خۆی و ماڵ و منداڵییەوە، رۆژێك بایكۆتی بەرخودان و خەبات و تێكۆشان و گیانفیدایی كردنی نەكردووە، بەڵام ئەو دكتۆر و مامۆستای زانكۆیانەی كە ڤێلایان بۆ دروستكراو و منداڵەكانیان بەناز گەورەكران و یارمەتییەكانیان نەبڕا تەنها كەمكرایەوە ئەوانی تریش چ مامۆستا چ فەرمانبەر نەیانتوانی تەنها بۆ 6 مانگ پێشمەرگە بن، بایكۆت دەكەن و رێگا و بانەكان دەگرن و داوای رووخانی تەنیا كیانی كوردی دەكەن؟ من ناڵێم هەقدار نین، بەڵام كەسیان نە لەپێشمەرگە كوردترن و نە لەپێشمەرگە پیاوترن، رووحم فیدات پێشمەرگەی كوردستان. پێشمەرگە،هێمایی خۆراگریی شەوە زەنگەكان ، رۆژە گەرمەكان ، سەرما و كرێوە و سەختی و خۆراگری و بەرخۆدانیی نەتەوەییە ،چقڵی چاویی دوژمنانە و وەك قەڵغانێكی پۆڵایین خاك و نیشتیمان و شەرٍەف و كەرٍامەتی كوردو كوردستان دەپارێزێت . پێش مەرگ هەنگاو دەنێ و بە دوژمنان و داگیركەران دەڵێت تا من هەم رێگە نادەم خاكی كوردستان شوێنی ئاسوودە و شوێنی پۆستاڵی ئێوەی لێبێ.بە درێژایی مێژووی مرۆڤایەتی كۆمەڵێك چەمك و دەستەواژە هزر و بیری زانایانی بەخۆیەوە سەرقاڵ كردووە، چەمكگەلێكی وەك فیداكاری، بەرخودان و خۆبەختكردن لە پێناو ئامانج و ئارمانجشارێكی مرۆیی. بەو مانایە كە ئەم چەمكانە لە زەینی كۆمەڵگا، لە تاكەكانی كۆمەڵگەیەك نەخش دەبەستن و بۆ گەیشتن پێیان ئامادەن بێ هیچ چاوەڕوانییەك گیانی خۆیانی بۆ فیدا بكەن و لەو راستایەدا سەختی و دژواری و كەموكووڕی ناناسن و بەردەوام رێ دەبڕن. لە نێو گەلی كوردیشدا بوونی ئەم جۆرە كەسانە پرسێكی سەلمێندراوە، بەو واتایە كە چ لە رابردوودا و چ لە ئێستادا بەشێك لە خەڵكی كوردستان بە هۆی گەیشتن بە لووتكەی بیركردنەوە و مانای راستەقینەی ژیان، گیان و ماڵی خۆیان فیدای گەیشتن بە ئازادی، بەرژەوەندی نەتەوەیی و یەكسانی و دادپەروەری كردووە و ئارەزوومەندانە ژیانێكی پڕاوپڕ بە كەندولەند و هەوراز و نشێو هەڵدەبژێرن. مرۆڤ گەلێك كە ژیان لە لای وان بریتییە لە كۆمەڵێك كات و ساتی جوان و رەنگاڵە كەم ئەم جوانییە بۆ خۆیان پێی دەبەخشن و چاوەڕێی روودانی رووداوێك یان هەڵكەوتنی كەشوهەوایەكی گونجاو و لەبار ناكەن و خۆیان خولقێنەرانە، دەی ئافرێنن. ئافرێنەرانی جوانی لە نێو گەلی كورددا بە پێشمەرگە دەناسرێن. كەسێك كە تەنیا و تەنیا بۆ بەختەوەری مرۆڤەكان هەوڵ دەدات و گیانی بۆ ئەم بەختەوەرییە دادەنێت. بەو واتایە كە قارەمانێتی دەنوێنێ. بەڵام قارەمان كێیە؟ قارەمان بریتییە لەو كەسەی كە لە جەرگەی نەهامەتییەكاندا، كاتێك ئارامی مرۆڤ و مرۆڤایەتی بەرەو لەنێوچوون دەڕوات و چەمكی ژیان لە سنوورەكانی لەنێوچوون نزیك دەبێتەوە. لە لێواریشدا بێت لە مەترسیی تێداچوون رزگاری دەكات و جارێكی دیكە رێگەی ژیانەوەی پێ نیشان دەدات. پێشمەرگە قارەمانێكی حەماسەخوڵقێنە كە هەم مانا جوانەكان بە ژیان دەبەخشێت، هەم لە نێوان بەرداشی رووناكی و تاریكی، چاكە و خراپە و ئەهوورا و ئەهریمەندا وەك سەربازێك فیداكارانە قوربانی دەدات رەنگە هەندێك جار تراژیدیاش ببێت بە بەشی، بەڵام كۆڵ نادات. له‌سه‌رده‌می كۆماره نازاده‌ره‌كه‌ی كوردستان تاكو ئێستا پێشمه‌رگه له‌خۆبوردوانه و ئازایانه و سه‌رسه‌ختانه بواری ده‌ست درێژیی و داگیركاری به دوژمنان نه‌داوه، بۆیه وه‌ختێك شانازی به‌و هێزه سه‌ربازیه شه‌رفمه‌نده ده‌كه‌ین ئه‌وا خه‌ڵاتێكی خوداییه به ئێمه‌ی به‌خشیووه.به‌رخودانی پێشمه‌رگه پێوه‌رێكی نیه بۆ هه‌ڵسه‌نگاندن و قه‌ره‌بووكردنه‌وه، هه‌ر له تێك شكاندنی ئه‌فسانه‌ی داعش وپاراستنی شكۆی مرۆڤایه‌تی له‌سه‌ر ئاستی جیهان، بۆیه ده‌توانین بڵێن ئه‌و داستان و شاكاره مه‌زنانه شیاوی ئه‌و خه‌ڵاتانه نین كه له جیهان ده‌به‌خشرێن، به‌ڵكو سوپاس و پێزانینه‌كان بۆ پێشمه‌رگه گه‌وره‌ترن و تا ئێستا وێنه‌ی نیه، چونكه به‌خشینی روح و دڵ به‌كام پێوه‌ر هه‌ڵده‌سه‌نگێنرێن!..پێشمه‌رگه له‌و شه‌ره ڕه‌وایه‌ی كه وه‌ك داستانی پردی و مه‌خمور و تلسقۆف مێژوو به سه‌ربه‌رزی بۆیان تۆمار ئه‌كات وه‌ك داستانی گه‌روی عمر ئاغا و خواكورك و كۆرێ، بۆیه هێشتا هیوایه‌ك هه‌یه بۆ مانه‌وه به شكۆمه‌ندی و سه‌ربه‌رزی و سه‌ربه‌ستی بۆ كوردستانیان.بۆ نیشتمانی كوردستان هیچ شتێك شیاوی دڵته‌نگی نیه، چونكه له‌مه‌یدانی شۆره‌سواری و سوارچاكان بوونی پێشمه‌رگه هه‌موو تارمایه‌كانی دوژمن و نه‌یاران له‌بار ده‌بات، له‌هه‌مان كاتدا خۆشگوزه‌رانی و ئاسایش بۆ هه‌مووان ده‌گه‌رێنێته‌وه، هه‌ر بۆیه ناوی پێشمه‌رگه ناوێكی به‌رزو دره‌وشاوه‌یه لای هه‌موو نیشتیمان دۆستان و كوردپه‌روه‌ران. هەر وەك سەرۆک مسعود بارزانی دەڵێ:" ئەزموونی پێشمەرگایەتی بۆ من گەورەترین قوتابخانە بووە و لەو قوتابخانەیەشدا ئێمەی پێشمەرگە مامۆستایەکی گەورەی وەک بارزانیی نەمرمان هەبووە. ئامۆژگاریەکانی بارزانیی نەمر چ وەک باوکێک و چ وەک رابەرێک ڕێنیشاندەری ژیان و خەباتم بووە. دەتوانم بڵێم هەوێنی خۆراگری و ورەبەرزیمان لە خەباتدا ئەم ئامۆژگارییەی باوکم بوو کە (لە شکستدا نائومێد نەبین و لە سەرکەوتندا لەخۆبایی نەبین،بۆیە ئەم ووتەی سەرۆک بارزانی و ئامۆژگاری بارزانی نەمر دەبێت هەمیشە لەبەر چاومان بێت بۆ فاکتەری بەهێزی بەردەوامیان .
رێبوار حەمەلاو شوانی
