ئەگەر چاوێكی خێرا بە مێژووی خۆماندا بگێڕین، دەبینین بەدرێژایی مێژوو، هۆكاری دەرەكی كاریگەریی خراپی لەسەر كورد كردووە، بەڵام هەر لە ناو ئەو لاپەڕانەی مێژوودا، پەتایەكی كوشندە بەدی دەكرێ كە هەمیشە بڕستی لە كورد بڕیوە، ئەویش پەتای خۆخۆری و ناكۆكیی ناوخۆییە، چەند هۆكاری دەرەكی لە قۆناغە جیاجیاكاندا دووبارە بووبێتەوە، هێندە و زیاتریش ناكۆكی و خۆخۆری تەشەنەی كردووە، تا وایلێهاتووە هەردووكیان كاكەبرالەیەكیان لەگەڵ یەكدی هەبێت.
ناكۆكیی ناوخۆ رێگەی بۆ هۆكاری دەرەكی خۆشكردووە، راستە هێزە گەورەكانی جیهان، سیاسەتی خۆیان لەسەر بنەمای پاراستنی بەرژەوەندییەكانی خۆیان دادەڕێژن، بەڵام یەكێك لە هۆكارە هەرە سەرەكییەكانی وەپاشكەوتنی كورد، خۆخۆری و ناكۆكیی ناوخۆییە، چونكە نەیهێشتووە كورد وەك گەلێكی حیساب بۆكراو دەربكەوێت، ئەمەش بە دەوری خۆی رێگەی بۆ ئەوە خۆشكردووە، كورد نەچێتە خانەی بەرژەوەندیی دەوڵەتە بڕیاربەدەستەكان.
لەلایەكی دیكەشەوە، هۆكاری دەرەكی سوودێكی زۆری لە ناكۆكیی ناوخۆ وەرگرتووە، بۆ نموونە ئێران هەر لە ساڵانی سەرەتای شۆڕشی ئەیلوول1961-1975ـەوە، دوای ئەوەی هەستی بە ناكۆكیی ناو حزب و شۆڕشی كوردستان كردووە، رۆڵی لە زیاتر خۆشكردنی ئاگری ناكۆكیی ناوخۆی كوردستانی عێراق هەبووە، دوای دوولەتبوونی پارتی دیموكراتی كوردستان لە 1964 عێراقیش ئەو ناكۆكییەی بە قازانجی خۆی قۆستەوە و باڵی جیابووەوەی لە دژی شۆڕش بەكارهێنا.
ئەمەریكا ئەوەی بۆ دەركەوت كە كورد لەناوخۆیدا یەكگرتوو نییە، بۆیە ئەو قەناعەتەی لا دروست بووە كە نابنە هەڕەشە، بەڵكو وایان داناوە كە حكوومەتەكانی ناوچەكە خۆیان دەتوانن كورد رابگرن و سەركوتیان بكەن، لەم بارەیەوە (بەپێی تێزێكی دكتۆرا) لە نووسراوێكی ROBERT W. KOMER (رۆبێرت و. كۆمەر) ی كارمەندی ئەنجوومەنی ئاسایشی نەتەوەیی بۆ یاریدەدەری تایبەتی سەرۆكی ئەمەریكا 1961-1963 دا هاتووە:"كورد قەومێكن لەناو خۆیاندا رێكخراو نین، هێزەكانی ئاسایشی ناوخۆ دەتوانێت هەموو سەركەشییەكیان دابمركێنێتەوە"، ئەم تێڕوانینەی ئەمەریكا، زەمینەی بۆ ئەوە خۆشكردووە دەوڵەتە داگیركەرەكان بە ئارەزووی خۆیان كورد بچەوسێننەوە.
هەموو كورد هەست بەو دەردە گەورەیە دەكات، كەچی هێشتا بە دەستییەوە دەناڵێنین، لایەنە كوردییەكان لە ناكۆكیدا زۆر بێباكن، رق و كینە ئەوەندە كۆدەكەنەوە، گوێیان لێنیە لە ساتەوەختی باڵابوونی هەستی نەتەوایەتیدا، هەڵیڕێژن و لە پێناوی بەرپێندانە لایەنی بەرامبەر و ركابەر، پشتی میللەت لە زەوی بدەن و قەڵای نەتەوایەتی بەسەریەكدا بڕووخێنن، داگیركەرەكانیش ئەزموونیان لە ناكۆكیی ناوخۆیی كورد پەیداكردووە و لە كاتی پێویستدا بە قازانجی خۆیان بەكاری دەهێنن.
بەغدا هەمیشە خەون بە دەرفەتێكەوە دەبینێ شتێك بە ناوی هەرێمی كوردستان نەهێڵێت، لە 16ی ئۆكتۆبەر بە رێككەوتن لەگەڵ گرووپێك هەلی بۆ رەخسا، بە بەردێك دوو چۆلەكەی پێكا، هەم بەشێكی زۆری خاكی داگیركردەوە و بە عەرەبكردن دەستی پێكردەوە، هەم ناكۆكیی ناوخۆی كوردی قووڵتر كردەوە و بێمتمانەیی خستەوە ناو لایەنە كوردییەكان، ئەوەندەی لەو دەردە رادەمێنم هەست بە بێتاقەتی دەكەم و بێ ئومێدی پەلامارم دەدات.