ئاخ و ئاڤ و ژینگەھا عیراقێ ب وی ئاوایە کو ھەردەمێ سەرکردەک لێ دروست بیت یێ دوو ریی بیت! رەنگە ئەڤە جھێ پرسیارێ بیت ؟ بەلێ , دیروکا عیراقێ بو مە بەرسڤێ ددەت ھەر ل سالا دامەزراندنا وێ ١٩٢١ ھەتا نھا بەردەوام شاھێن وێ ھەتا سەروک وەزیرێن سەردەمێ شاھی کو بەردەوام کار ل سەر سیاسەتا دوو ریی کریە بەرامبەر کوردستانێ . و ل سەردەمێ کوماریێ ژی ئەڤ سیاسەتە و سایکلوجیایا سەرکردێن ئێکێ یێن عیراقی بەرەف پێشتر چو ل سالا ١٩٥٨ وەرە ھەتا ھاتنا حەیدەر عەبادی.ھەردەمێ لاواز بن بەرەف کوردستانێ دئێن و ب مالا خوە دزانن و دەھان ئایەت و حەدیسا دێ سەر براتیا میللەتان ئینن, ھەتا ب وێ روژێ دگەھن کو بھێز دکەڤن و براتیێ دکەنە بێ خێرترین تشت و پەیڤا (حەق بو ێاحبێ خو زڤری ) دکەنەشیعار.
ئەگەر نموونا زیندی ل سەرکردێن عیراقێ وەربگرین کو لاوازی و بھێزیا ویا ب دیکور مەدیتیە کو سەروک وەزیرێن عیراقێ حەیدەر عەبادی یە, دێ بینین کو ل پێنگاڤێن وەرگرتنا دەسەلاتێ و ژناڤبرنا داعشێ بێ کوردان نەشیا ئێک پێنگاڤ پاڤێژیت و روژا جھێ پێ خوە گرتی و درزێن ناڤمالا کوردی و نەھوشیاری و کالفامی و نەزانینا ھندەک کەسێن نەزان ب دەرفەت دیتی تایبەت ل ناڤ ئێکەتیا نیشتیمانیا کوردستانێ, خوە کرە سوپەرمان و ھەمی ھێزا کو کورد ل بنیاتێ ئاڤاکرنا وێ بون بەرێ وێ دا کوردستانێ و زورترین تاوان و جینوساید ل دژی گەلێ کورد ئەنجامدان و ھیچ جوداھیەک ل گەل سەرکردێن بەرێ یێن عیراقێ نەبون کو کیمیا و جینوساید ل دژی کوردان بکار ئینای.
ئەڤرو پشتی ھەمی تاوانان حەیدەر عەبادی ھەفتیانە وەکی فلمێن ھەفتیێ کو ل کەڤندا ل تیڤیان دھات , بەحس ژ ھنارتنا موچە و بوجێ کوردستانێ دکەت. حەیدەر عەبادی بو راکێشانا سوزا فەرمانبەرێن کوردستانێ و مفا وەرگرتن ل قەیرانا دارایی بو پتر ئالوز کرنا رەوشا ھەرێمێ و پالدانا خەلکی بو شورەش و راپەرینێ ل دژی حکومەتا کوردستانێ کو راستە رەخنە و گلەی و گازندێن زور ل سەر ھەنە و فەرە پێداچونەک کو ھەژی خەباتا گەلێ کورد و قەبارێ گەندەلێ بیت بێتە کرن و پروسا چاکسازیێ بەردەوام بیت. ئەرێ ئەگەر راستە عەبادێ خەمخورێ فەرمانەبەرێن کوردستانێ یە , بوچی دەست ب دانوستاندنا ناکەت؟ ئەرێ ئەگەر عەبادی مروڤەکێ عادلە , بوچی دەستوری جێ بەجێ ناکەت؟ ئەرێ ئەگەر راست دبێژیت و پروپاگندە نیە , بوچیبودجە و موچێ ھەرێمێ ناھنێریت؟....دەھان پرسێن دیتر دھێنە کرن و نە عەبادی دشێت بەرسڤێ بدەت و نە ئەوێن گازندا ل ڤێ رەوشێ دگرن.
پشتی کو سەروکێ حکومەتا ھەرێما کوردستانێ نێچیرڤان بارزانی دەھان جاران دووپاتی ل سەر ھندێ کری کو حکومەتا ھەرێما کوردستانێ و سەرکرداتیا سیاسی یا کوردستانی یا بەرھەڤی دانوستاندنێن جدیە ل گەل بەغدا دیف دەستورێ عیراقێ بەلێ ب مەرجەکێ دەستور ھەمی بێتە جێ بەجێ کرن و نە ئەو بەندێن ل بەرژەوەندیا بەغدا بێنە جێ بەجێ کرن و یێن دیتر ژی بو خوە تەفسیر بکەن.ھەروەسا ھەمی ئالێین ھەرێمی و نێڤدەولەتی دووپاتی ل سەر دەست پێکرنەڤا دیالوگەکا ئاڤاکەر کریە ل ناڤبەرا ھەولێر و بەغدا و داوی ئینان ب ڤێ رەوشا نە ئارام.
پشتی رەتکرنا دانوستاندنان ل گەل ھەولێرێ ژ ئالیێ عەبادی ڤە و ئەو غرورا بو دروست بوی , ل جھێ ھندێ ھەمی ئالیێن سیاسی ئێک بگرن و ل پشت حکومەتا ھەرێمێ بن کو ئەمریکا و ئەوروپا و نەتەوەێن ئێکگرتێ و ھەمی جیھان ب نونەرێ خەلکێ کوردستانێ دزانیت . ھندەک ئالیێن سیاسی سەرەدانا عەبادی دکەن و بێ کو ھیچ داخازنامەک یان پروژەک ھەبیت . یان کو عەبادی ئیعتیبارەکا سیاسی بو دابنێت .ھەتا گەھشتە رادەکێ کو ل شروڤەیێن کەسێن نیزیکێن عەبادی دا ب ترانەڤە بەحس ژ وێ شاندێ ھاتیە کرن و ب وەفدێن حەجێ دایە نیاسین و (مەوسمێ حەجا ھەرێمی بو بەغدا دەست پێکر) ب راستی ئەڤ چەندە ھەمی ل ھندێ دئێت کو ناڤ مالا کوردی یا رێک نیە. ئەگەر ئەڤ وەفدە ژی خوە ب نونەرێ کوردستانیان بزانیت و بەحس ژ گوتنێن خێرێ بکەن, بەلێ زور رەخنە ژی ھەنە کو مروڤ دشێت لێ بگریت . وەکی :
- عەبادی ب خوە ھەفتیانە بەرێ نامێن خوە دکەتە حکومەتا ھەرێما کوردستانێ و ئانکو عەبادی عیراق وێ باش دزانن کو ل سەر ھەمی کێم و کورتیان کورستان ژ ئالیێ حکومەتەکا سەربەخو دئێتە رێڤەبرن.
- ئەگەر راستە ئەو ئالی باوەریێ ب کیانێ سیاسی و دەستوری یێ ھەرێما کوردستانێ دئینن , ب چ سیفەت ل سەر ڤان دەزگەھێن شەرعی را دچنە گەل ئالیێ بەرامبەر.
- چونا بەغدا بێ پروژە و دەستکەفت ھندی دیتر پێگەھێ کوردستانێ لاواز دکەت .
- ئاریشێن کوردستانێ زورن و کەفتینە سەرئێک و ب روژەک و دوو روژا چارەسەر نابن و ب برنە بەغدا مەزنتر لێ دئێن.