پشتی ریدانێن شازدێ ئوکتوبەرا خیانەتکار کو ب پیلانەکا ئیقلیمی و گلوپێ کەسکێ روژئاڤایی تایبەت ئەمریکا و ئەوروپا بو ل گەل خیانەتا فسبوکباز و کالفامێن ئالیەکێ دیارکری. ڤێ ریدانا کو ل ھزر و تەخمین و شروڤەیا کەسێ دا نەبو , زورترین کاودان ب سەر ھەرێما کوردستانێ دا ئینان . ژ ھەمیان مەزنتر داگیرکرنا نیزیکی پێنجی ل سەدێ ئاخا کوردستانێ بو د گەل دەست چونا وێ رێژێ ل داھاتێن ھەرێمی و پرت پرت بونا ئالیێن سیاسی و ل دەست دانا دەرفەتەکا زێرین.
بەرامبەر ڤێ چەندێ دەسەلادارێن بەغدا و تایبەت کەسێ سەروک وەزیرێن عیراقێ حەیدەر عەبادی غرورەک بو دروست بو و کو ھەمی ژی ڤەدگەرێت بو وێ کەساتیا کو روژئاڤا و عەرەب پێکولێ بو دکەن کو کەسێ عەبادی جارەک دن دەسەلاتێ وەربگریت ب وێ ھیڤیێ کو عیراقێ ل بن کونترولا ئیرانێ و ویلایەتا فەقیە دەربینیت. ب دیتنا من ئەڤ ھزرە ب ھیچ ئاوایەکێ نابیتە واقع ژ بەرکو عەبادی ل حزبەک ئیسلامی شیعی یە کو باگراوەندێ وێ و سەرکردێن وێ ئیرانیە و شورەشا ئیسلامیە , ھەروەسا ئیران ل عیراقێ دا بویە واقع و ب نەھجێ سیاسی یێ کەسەکێ کو دڤێت ل راگەھاندنێ دا بو روژئاڤایێ خوە جوان بکەت ب ھیچ ئاوایەکێ ئەڤ چەندە ناھێتە گوھرین.
پشتی سەروکێ حکومەتا ھەرێما کوردستانێ نێچیرڤان بارزانی وەک نەمبەر وەن ل گورەپانا سیاسی و دبلوماسی دەرکەفتی ل سەر ئاستێ نافخوی و عیراقێ و دەرڤە , و ئەو ھەلویستێن دبلوماسی و بەردەوامی دان ب چارەسەریا کریزان ب رێکا دەستوری ب مەرجەکێ کو دەستور وەکی خوە بێتە جێ بەجێ کرن.
چەندین دەستکەفتیێن زور باش بو ڤێ قوناغا مەترسیدار ب دەست ئینان , ژ وانا :
- پارستنا کیانێ سیاسی و دەستوری یێ کوردستانێ ل ناڤبرن و دوو ئیدارەییێ .
- رێک گرتن ل شەرەکێ کو زور ئالیان ئاگرێ شەری ھەلدکر , بەلێ ب رەتکرنا ڤێ بژاردێ و گرنگی دان ب رێکێن ئاشتیێ و جێ بەجێ کرنا دەستوری.
- دەستپێکرنا دانوستاندنا ناڤبەرا بەغدا و ھەولێرێ ل سەر ئاستێ وەزیر و شاندنێن ھونەری و ل داویی پێنگاڤ داخازکرنا لیستا موچێن وەزارەتێن پەروەردە و تەندروستی.
- گرنگی دانا دەرڤە ب پێگەھێ کوردستانێ و داخازکرنا سەروکێ حکومەتا ھەرێمێ بو سەرەدانیکرنا وەلاتێن ئەوروپی.
- پێکولکرن بو خوە دووبارە رێکخستنەڤێ تایبەت پشتی حکومەتێ داخازکری دەمێ ھەلبژاردنان بێتە دیارکرن و دەست کری ب پروسەکا چاکسازیێ کو ھیڤیێن باش ل سەر دئێنە چنین.
- ھاتنە پێشا ئالیێن عیراقی بو ھەولێرێ تایبەت دەمێ سەرکردێن ئێکێن حزبان داخازا دووبارە دانوستاندنا دکەن.
ئەڤە و چەندین خالێن دیتر ھەنە کو بەرھەمێ سیاسەتەکا سەرکەفتی بو ل ڤێ قوناغێ دا کو چ ئالیەک ل پشتا ھەرێمێ نەبو.ھەتا زور ل شوڤینی وھەڤ ئاوازێن وان ل خائینێت شازدێ ئوکتوبەرێ ھزر نەدکر دووبارە ھەرێم خوە دێ ل سەر پێ گریت و دگوت ئیدی نابیت بێژین (اقلیم کردستان ) فەرە بێژین (الشمال الحبیب)
حکومەتا ھەرێما کوردستانێ وەک نونەرێ خەلکێ کوردستانێ شیا جارەکا دیتر وەلاتێن دەردور و جیھانی بینیتە سەر خەتێ و ھەمی گڤاشتنا ل بەغدا بکەن و دانوستاندنا دیف دەستوری ل گەل ھەولێرێ دەست پێبکەن . و ل داویی پێنگاڤ ژی دا ھنارتنا نامەکێ بو ژ ئالیێ ئەنتونیو گوتیرێس ئەمیندارێ گشتی یێ نەتەوێن ئێکگرتی بو سەروک وەزیرێن کوردستانێ کو تێدا داخازیا چارەسەریا کێشێن ناڤبەرا بەغدا و ھەولێرێ دکر. ئەڤە وێ دگەھینیتە باشترە بو ھەمی ئالیان ب ئێک پروژە خوە نیزیکی حکومەتا ھەرێمێ بکەن و ب ئێک دەنگ و ئەجیندا بچن بو ھندێ زێدەتر زیانێ ل پێگەھێ ھەرێما کوردستانێ نەدەن و ئەڤ شاندنێن ڤێ داویێ چوی ژی بوینە جھێ لاوازکرنا ھەلویستێ ھەرێمێ ژبەرکو ئەو بو خوە چوینە وەک داخازیکەر بێ کو چو پروژە ھەبیت .