ئەڤ رەوشا نھا کوردستان تێدا دەرباز دبیت کەسەک نینە کو ھیڤیا ب رەوشەک ھوسا ب خوازیت و زورترین قەیران ل گەل زورترین مەترسیێن کوژەک کوردستان ڤەگرتیە. و ھەتا وی رادەی کو مەترسی ل سەر کیانێ سیاسی و دەستوری و دیروکی و جوگرافیی کوردستانێ ھەیە. ل پشکا ئێکێ ل ڤێ گوتارێ من ئاماژە ب ھەبونا درزێن مەزن ل ناڤبەرا ئالیێن سیاسی کر ل ھەرێمی و ئەڤان درز و ناکوکیان ئەڤ رەوشا مەترسیدار ب دیف خوە دائینا.و دەرباز بون ل ڤێ رەوشێ کومبونە ل دوور بھایێن نەتەوەی و نیشتیمانی و حکومەتا ھەرێما کوردستانێ و دروستکرنا براتیەکا ب بنیاتە.
نھا فەرە ئەم ڤێ رەوشێ ب دەرفەت ببینین و دەست ب خالا دوویێ بکەین کو کوردستان ل بەرامبەر بەغدا ئیحراج کریە و حکومەت ل چاڤێن گەلەک ژ تاکێن میللەتی کرێت کریە ب ئەگەرێ کریارێن گەندەلی و بکار ئینانا پلە و پوست و مالێ گشتی.ئەڤرو پشتی سێ سال ژ قەیرانا دارایی و ئەو بێن درێژیا کو موچە خورێن کوردستانێ بەرامبەر گیروکرن و پاشکەفت کرنا موچەی گرتی ل چ جھەکێ جیھانێ نینە و نەبیە ژی . پینگاڤەک گرنگ ل حکومەتا ھەرێمێ د ئێتە خاستن کو دەست ب پروسەکا ب بنیات کو سنورێ کەس و حزبێن جودا جودا دەرباز بکەت و ئارمانج ل چاکسازیێ ڤەگەراندنا مولکێ خەلکی بیت ل دەستێ زومرەکا گەندەل و دووبارە پارڤەکرنا وی مافی بیت ل سەر ھەمی خەلکی بێ جوداھی کو ھەتا نھا ب ڤی ئاوای نەبویە و ب دیتنا من ئەگەر ھاریکاریا گشتی ھەبیت ل ھەمی ئالیەکێ پێنگاڤێن سەروکێ حکومەتێ بو وی ئاراستەی دچن کو چاکسازیەک ب بنیات و بەرھەم دار ب دەست بێت.چونکی رێژا گەندەلیێ ل عیراقێ و کوردستانێ زور بلندە و رەخنەک جدی ل سەر ئەدایێ حکومەتا بەغدا و ھەولێرێ ھەیە ل ڤی بیاڤی دا و و کار کرنا حکومەتێ بو کێمکرنا رێژا موچەخورێن کوردستانێ ب رەنگەکێ کو کەسێن خزمەت کری زیان ڤێ نەکەڤیت , وەکی قوتکرنا موچێ وان کەسێن کو خوەدیێ دوو موچە و سێ موچە و چارموچانە!! سەرەرایێ ھەبونا چەندین خانەنشینێن وەھمی یان کو چ روژەکێ ژی خزمەت نەکری بەلکی دار دەستێن بەعسێ بوینە.
ل خالێن ھەری گرنگ کو فەرە حکومەتا ھەرێما کوردستانێ ڤێ قەیرانێ ب دەرفەت وەربگریت ودەست بکەت ب دووبارە رێکخستنا ھێزێن پێشمەرگێن کوردستانێ و راھێنان پێکرن و ب نیشتیمانی کرنا وان و ئینانە دەر ل بن دەسەلاتا کەسان کو کاریگەریەک خراب ل سەر ئەدایێ ھێزا پێشمەرگەی کریە تایبەت ل شازدێ ئوکتوبەرێ .دڤێ خالێ دا بارێ پارتی دیموکراتی کوردستان و ئێکەتی نیشتیمانی کوردستان گران ترە ل ئالێن دیتر و فەرە وەک ئەرکەک نەتەوەی و نیشتیمانی کار بکەن وەزارەتا پێشمەرگەی دووبارە ل سەر شێوازێ وەلاتێن جیھانی رێک پێخن و دەستێ حزبێ ل کاروبارێن پێشمەرگەی بێتە لادان.
ھەول دان بو ئارامکرنا ڤێ رەوشێ و دەربازکرنا وێ و دووبارە بھێزکرنا کوردستانێ ب براتیێ و ئەنجامدانا ھەلبژاردنەکا بێ کێم و کورتی وێ دگەھینیت کو مە دەرفەت ل ڤێ قوناغا مەترسیدار دیتیە و ئەڤ رەوشە نەبویە فاکتەرێ ژ نافچونا کوردستانێ.
ژ خالێن ھەری سەرەکی و پشتی وێ بێ دوست بونا کو ب سەرێ کوردستانێ دا ھاتی تایبەت پشتی سێ سالێن شەرێ دژی داعشێ کو کوردستان بیە مەزنترین دیوار بەرسینگێ دەولەتا داعشا تیرورستی کو نەھێلا زێدەتر سنورێن خوە موکم بەکەت و ئەفسانا وێ ژناڤبر . ل ئەنجامدا ب ئەمبرانزێن ئەمریکی و ئەوروپی پێشمەرگە ھاتنە شەھید کرن !جھێ ھندێ رێزگرتنا وان بێتە گرتن و ھەر ھیچ نەبیت ھنارتنا چەکێن پێتڤی بیت. لەوما فەرە حکومەتا ھەرێما کوردستانێ دەست بکەت ب دانانا پلانەکا ستراتیجی بو ھندێ پەیوەندیێن کوردستانێ ل گەل ھەمی وەلاتێن دوست دووبارە رێک پێخیتە ڤە ل سەر بنیاتێ نیشتیمانی و دیر ژ بەرژەوەندیا حزبی و شەخسی . ئەڤ پێنگاڤێن ڤێ داویێ یێن سەروکێ حکومەتا ھەرێما کوردستانێ بەرێز نێچیرڤان بارزانی تایبەت کو سەرەدانا فەرەنسا و ئەلمانیا کری و پشتی سەرێ سالێ سەردانا برێتانیا کەت ل گەل تیریزا مەی کومبیت و ب نەھجی خویێ نەرم و دیر ژ گەفکرنێ ھاڤێتنا توپێ بو گورەپانا بەغدا و دووپاتی ل سەر جێ بەجێ کرنا دەستورێ عیراقێ کرن بویە جھێ رێزگرتنا ھەمی وەلاتێن جیھانێ . ژ بەرکو ھەتا نھا عیراقێ کورد ب لارێ ل دەستوری د ھژمارتن , بەلێ نھا سیاسەتا حکومەتا ھەرێما کوردستانێ وەسایە کو بەغدا ل جێ بەجێ کرنا دەستوری دانابیت دیف ھەوا و نەفسێن خوە بیت و بەندێن ل بەرژەوەندیا وێ جێ بەجێ بکەت و یێن دیتر ژی بن پێبکەت.
ل داویا ڤان دوو گوتارێن کو من ب ناڤ و نیشانێ باشترین دەرفەت...... ئێک بو دووبارە رێکخستنا ناڤ مالا کوردی و دیڤدا ئەنجامدانا پروسا چاکسازیێ کو کەس لێ ڤەدەر نەبیت و ھەروەسا ئارام کرنا رەوشێ و ئەنجامدانا ھەلبژاردنێن بێ کێم و کورتی و بھێزکرن و دووبارە رێکخستنا ھێزێن پێشمەرگەی و گرنگی دان ب پەیوەندێن کوردستانێ ل گەل وەلاتێن جیھانێ و کار کرن ب جدی .ئەڤ رەوشە دەمکی یە و زور خرابتر ژی ب سەرێ کوردستانێ ھاتیە و دەرفەت وەرگرتن ل ڤێ رەوشێ باشترین مفایە .