دوزا کوردی پشتی سەد سالان ژ ئاشکرا بونا رێکەفتناما سایکس - بیکو یا نھێنی کو کوردستان ل ناڤبەرا وەلاتێن سەردەستێن جیھانێ پارڤەکر بو . ھەروەسا ئەڤ رێکەفتنامە و سەروبەرێ نافخویی وەکر کوردستان ب رەسمی بکەڤیتە بن داگیرکەریا سێ نەتەوێن دەڤەرێ ل وەلاتێن عیراق و سوریا و تورکیا و ئیرانێ . وەکی بێشکچی کوردستانێ ب (داگیرگەھەکا نێڤدەولەتی ناڤ دکەت).دوزا کوردی دربەکا دیا مەزن ڤێکەفت, کو ژ پێشبینیا چو سەرکردە و سیاسی و شروڤەکاران ھەتا دوست و دوژمنێن کوردان نەبویە.ئەو ژی ب خیانەتا شازدێ ئوکتوبەرێ و ھەلکرنا گلوپێ کەسک ژ ئالیێ وەلاتێن ھەفپەیمان ل سەری دا وەلاتێن ئێکگرتیێن ئەمریکی و ھەروەسا لێک کومبونا ھەر ئێک ژ تورک و عەرەب و فارسان سەرەرایێ ھەبوناجوداھیان ل ناڤبەرا ڤان نەتەوە و دەولەتان. بویە ئەگەرێ ھندێ کو نیڤا ئاخا کوردستانێ ل بن دەسەلاتا کورد نەمینیت . کورد بگەھنە قوناغەکێ کو ل خوە زڤرین ببیتە باشترین رێک .
ب خاندنا روپەلێن دیروکا کوردستانێ دێ بینین کو زور جارا سەر ژێھەلی و ژووردایی تێدا ھەبوینە و تشتەک نورمالە , بەلێ دووبارەکرنا ھەمان کریار چو جاشاتی بیت یان خیانەت و خوشباوەری ئەڤەیە کارەسات و میللەتێ کورد توشی بێ ھیڤیی بونێ دکەت.پیلانا شازدێ ئوکتوبەرێ تنێ گرتنا وان دەڤەرا نەبو , بەلکو تەمامیا وێ ژ ناڤبرنا کیانێ کوردستانێ بو و بەردانە ئێکا ھێزێن کوردی بو. پشتی سەرھلدانا خونیشاندنا ل سلێمانیێ و دەردوورا و ئەو وێرانکاری و سوتنا مولکێ گشتی ب دیف خوە داھاتن و ئەو ھاندنا کو ژ ھندەک ئالیان دھات بو ھندێ راپەرین دژی دەزگەھێن دەولەتێ دروست بیت . ھەروەسا ئەو پێنگاڤا جھێ پرسیارێ کو ژ ئالیێ ھندەک ژ ئالێن سیاسی ھاتیە ھاڤێتن کو بریار دای ل حکومەتا ھەرێما کوردستانێ دەربکەڤن. ھەتا گەھشتە وی ئاستی ھندەک ژ سەرکردە و ئالیێن سیاسیێن بناڤ کوردستانی داخازێ ژ حەیدەر عەبادی (قائد قوات المسلحە) بکەن دەست وەردانێ ل کوردستانێ بکەت بو پاراستنا گیانێ ھاولاتیان؟!
ب راستی جھێ حیبەتیێ یە کو خیانەت و سوتنا مال و مولکێن گشتی و داخازکرنا دەستێ وەردانا بەغدا ژ کارێن نافخویێن کوردستانێ ل ئێک دوو کومببن. بو ھندێ کو ئەڤ رەوشە ب ئارامی دەرباز ببیت فەر بو ھەمی ئالی دوور ژ بەرژەوەندیێن حیزبی و شەخسی و ب ئێک دەست و دل کار بکەن بو دەربازکرنا ڤێ قوناغێ وەکی سەروکێ حکومەتا ھەرێما کوردستانێ بەرێز نێچیرڤان بارزانی چەندین جاران دووپاتی ل سەر ڤێ رستێ کریە (تنێ ب ئێک رێزیێ دێ شێین ڤێ قویناغێ دەربازکەین) ب راستی تنێ ئێک رێزی مە دگەھینیتە کەنارێن ئارام ژ بەرکو چارەنڤیسێ مە ئێکە.
حوکمرانیا کوردی بو دەمێ بیست و شەش سالان ب ھەمی کێم و کورتیێن خوەڤە ئەڤروکە پێتڤی ب گەلەک کاری کو ژیانەک ھەژی بو کوردستانیان دابین بکەت و ڤێ قوناغێ کو خەلک ل خوە و حکومەت و حزبان تورەیە دەرباز بکەت , نھا پشتی ریدانێن شازدێ ئوکتوبەرێ و ھەبونا درزێن مەزن ل بیاڤێن سیاسی و ئابوری و خزمەتگوزاری و سەربازی و یاسایی دا , فەرە پلانەک موکم بێتە دانان و کو زور جاران ژی دووپاتی ل سەر ڤێ چەندێ ھاتیەکرن ژ ئالیێ حکومەتێ ڤە کوھەمی کار کرنا وان دێ ئەو بیت حوکمرانیەک باش کو ھەژی خەلکی بیت جێ بەجێ بکەن.
نھا باشترین دەرفەتە.....
(١)
ئێک رێزی - گەلێ کورد چەندین جاران پێکول کرینە ب ڤێ گاڤا داویێ ژی ڤە کو بگەھنە مافێن رەوایێن خوە و ل بن دەستێ روم و عەرەب و عەجەما دەرکەڤن و وەلاتەک سەربەخو ئاڤا بکەن . بەلێ دەردێ کوژەکێ کوردان خیانەت و نەتفاقی بویە کو ھەردەم دەرگەھێ دەستێ وەردان ناڤ مالا کوردی ھەبویە و نە ئەڤرویە ڤی دەردی ل کوردان دایە و ئەحمەدێ خانێ دەمێ بەحس دکەت دبێژیت (گەر دی مە ھەبا ئیتفاقەک , ڤێگرا مەکربا ئینقیادەک ...) وی دەمی میللەتێن دەردور ژ روم و عەرەب و عەجەم و تورکان ژی خولامینیا مە دکر . بەلێ نھا مە نیە ئیتیفاقەک و ئێک قیادە ئەم ب ھەڤرا و دەستە دەستە بوینە خولامێن دەردورا , ئەو ژی ب ئەگەرێ نەبونا ئێک رێزیێ یە . ئەگەر ئەم نەبن ئێک وی دەمی ئەم دێ ژ نافچین ئێک ب ئێک . ئەوێ خیانەت ل کەرکوکێ کری نھا زمان و ئالا و حزب و ھێزا وی بەری برایێ وی تێتە رەتکرن. ئەڤە چارەنڤیسێ ھەفپشک , ئەگەر ئەم نەبینە ئێک ھەول نەدەین ڤێ قوناغێ دەرباز بکەین , دێ خرابتر ب سەرێ کوردستانێ ھێت.
ل ریدانێن چوی بو مە دیار دا بیت کو نەبونا ئێک رێزیێ بویە فاکتەرێ سەرەکی یێ ژ نافچونا شورەش و بزاڤێن کوردی , لەوما فەرە ھەمی ئالێن کوردی باش وێ بزانن چو جاران نەتەوەێن دەردوور گەلێ کورد قەبیل ناکەن ژ بلی ھندێ کو داردەست و نوکەر و بندەستێن وان بن. ب ئێک رێزی و ئێکگرتن و کومبون ل دوورا حکومەتا ھەرێما کوردستانێ ل ڤێ قوناغێ باشترین دەرفەتە کو ئەم ل نھا و پاشەروژێ ببینە خوە دی ھێزەک کو ببینە واقع و ل ھاوکێشێن دەڤەرێ ژی ببینە ھژمارەک مەزن.