ھەلدانەڤا روپەلێن دیروکا کوردستانێ ب ھەمی قویناغێن خوە ڤە , چەند ھەفپشکی ل ڤان قویناغان ھەنە وەکی خەبات و خیانەت و ھیڤی بون و روحا بەرڤانیێ.کو پرانیا وان ڤەدگەرن بو وی چەندێ کو کورد و کوردستان پارڤەکری بویە ل سەر دەولەتێن دەڤەرێ . ھەر ژ شەرێ چالدێرانا ١٥١٤دناڤبەرا ئوسمانی و سەفەویا ھەتا رێکەفتنامێن ناڤبەرا وان کو ل سەر دەشت و دول و کەلھێن کوردستانێ بوینە, شەرێ جیھانی یێ ئێکێ (١٩١٤ - ١٩١٨) و ئەو کونگرە و پەیماننامێن بەری شەری و پشتی شەری ھەمی ل سەر ھندێ رێککەفتی بون کو کوردستانێ ل سەر دەولەتێن ھەفسی وەکی تورکیا و ئیران و عیراق و سوریا پارڤە بکەن و دیف بەرژەوەندیێن سیاسی و ئابوری و ئیمپریالیزمیێن وەلاتێن سەردەستێن جیھانێ.
پشتی بلاڤبونا سیاسەتا رەتکرنا کوردستانێ و تێگەھێ (ئەنتی کورد = دژی کورد ) و ب کردار جینوساید کرنا گەلێ کورد ل ھەر چار وەلاتێن رەگەزپەرست , وی دەمی دا کورد ژی بێدەنگ نەبویە و ھەردەم خەبات کریە بو ئازادی و سەربەستی و رزگاریا وەلاتی ل بن دەستیێ , بەلێ ل گەل ڤێ خەباتا ئەزەلی کو ل گەل پارڤەکرنا وەلاتی دروست بوی , دەردێ خیانەتی َ ل پرانیا شورەش و بزاڤێن کوردی دایە و ب (١٦ئوکتوبەرێ ) ڤە.ل دیروکێ دا گەلێ کورد زیانەک مەزن ل خیانەتێ دیتە و بەردەوام ژی ھاتیە رەشکرن بەلێ پەروەردەیا ھندەک کەس و ئالیان ب وی ئاوایی ھاتیە کرن کو خیانەت ل بەر شیرین بویە ھەمی ژی ژ بەر تولڤەکرن ل نەیارەکێ سیاسی !!میرگەھێن کوردی ل سوران بگرە ھەتا بوتان و بادینان و بابان و ئەردەلان و دیڤدا شورەشێن شێخ و سەید و مەلایێن کوردستانێ ژی ھەر دیسان ل دەردێ خیانەتێ دەرباز نەبوینە , دربێن مەزن ڤێکەفتینە ؟!
لێرە دا دوو پرسیار دئێنە کرن , بوچی خیانەت ؟ ئەرێ گەرەنتی ھەیە خیانەت نەئێتە دووبارە کرن؟
خیانەت کرن ڤەدگەریت بو پەروەردە و رەوشت و ئاستێ تێگەھشتنا تاکی ھەتا جڤاکی . ھەروەسا نەبونا ھەستێ نەتەوایەتی و ھەبونا ترسەکا مەزن ل دوژمنی و نەبونا روحا بەرەڤانیێ و نەبونا خەما وەلاتی و وەلاتیان و نەبونا ھوشیاریا سیاسی و رازیبون ب دەسەلاتا بیانیا و باوەری ئینان ب سوزێن بیانیا و بەرژەوەندیا خوە و حزب و بنەمالێ و نەبونا شیانا قەبولکرنا بەرامبەرێ خوەیێ کورد و نەبونا باوەریێ ب خوە و دەسەلاتا کوردی و ھەروەسا ھەتا نھا وەک پێتڤی ستراتیجیەتەکا سیاسی بو پاشەروژ و ئاڤاکرنا وەلاتەک دیر ژ خیانەتێ ب دروستی نەبویە....ھتد!
ل سەر گەرەنتیا دووبارە نەبونا خیانەتێ ! ئەگەر ئەڤ پرسە ل بەری (١٦ئوکتوبەرێ ) ل چ تاکەکێ کورد ھاتبا کرن دا بەرسڤا وی ئەو بیت ( کورد پشتی خوینا ڤان شەھید و ئازادیا کوردستانێ چ جارێن دیتر خیانەتێ ل ھەڤدوو ناکەن!!!). بەلێ بەروڤاژی دەرکەفت و بدیتنا من دانانا ستراتیجەتەکێ کو لادان لێ خیانەت بیت ھەتا دەولەتا کوردی دئێتە ئاڤاکرن , ھەروەسا لادانا ڤان گرێ کویرێن ناڤبەرا سەرکردە و ئالیێن کورد دا بو ھندێ دەرگەھێ خیانەتێ ڤە نەبیت , ژ بەرکو خیانەت ل ڤی دەرگەھی دقوتیت دەستپێکێ.
پشتی کو گەلێ کورد ل خەونا سەربەخویێ نیزیک بوی و ب پروسا ریفراندوما دیموکراسی شیای رایا گەلی وەربگریت و ب زورینا رەھا گەلێ کورد ب کەرکوکی و شنگالیان ڤە دەنگ ب بەلێ بو سەربەخویێ دا . بەلێ ئەقلیەتا بەغدا و حەشدا مەزھەبی و خیانەتا گروپێ خوشباوەر و سوحبەت خوشا و گلوپێ کەسکێ ئەمریکی و ئەوروپی شیان دربەکێ ل ڤێ دەستکەفتێ بدەت , بەلێ خەونا سەربەخویێ ژ بیرا چ کوردەکێ ناچیت و کورد دێ ب سەربەخویێ گەھیت چ نیزیک یان دویر.
ل داویێ دا فەرە ھەمی ئالیێن کوردستانی ھاریکاریا حکومەتا ھەرێما کوردستانێ بکەن بو ھندێ بشێت ب زوترین دەم کوردستانێ ل ڤێ کریزێ دەرباز بکەت کو نە ھەژیێ ڤێ چەندێ یە پشتی مەزنترین رێکخراوا تیرورستی شکاندی و تازە ب چەکێ ئەمریکی ھێرش ل سەر بێتە کرن. ھەروەکی دیار سەروکێ حکومەتا ھەرێما کوردستانێ نێچیرڤان بارزانی بو چەندین جارانە داخازا دیالوگێ دکەت ل بەغدا بو ھندێ زێدەتر خوینا ھەردوو ئالیان نەئێتە رێشتن و ئەو پرسگرێکێن ھەیژی ب دانوستاندن بێنە چارەسەرکرن کو ل سەر ھەمیان را (ماددێ ١٤٠) دەستورێ عیراقێ یە کو تایبەتە ب دەڤەرێن کوردستانێن دەرڤەی ھەرێمێ.بەلێ بەغدا ھەتا نھا نەھاتیە پێش بو دەستپێکرنا دانوستاندنەکا جدی و دیف دەستورێ عیراقێ کو ھەر روژ دەنگێ ھندێ بلند دبیت ئەم ل گەل جێ بەجێ کرنا دەستورێ عیراقێ ینە , بو پروپاگندێن ھەلبژاردنا.