ئەڤ رەوشا نھا کوردستان و عیراق و روژھەلاتا ناڤین تێدا ب ھیچ ئاوایەکی کەس حەز ناکەت بکەڤیتە تێدا و کێم جاران رەوش ب ڤی رادەی ئالوز دبیت . ناکوکیێن ناڤبەرا بلوکێ روژھەلات و روژئاڤا و شیعە و سوننە و کریزا سوریێ و لوبنان و یەمەن و قەتەر و گوھرینێن نەچاڤەرێکری ل گورەپانا دەڤەرێ و جیھانێ ھەمی ئیماژەنە بو ئالوزیا سەروبەری و مەترسیا رەوشێ .
کوردستان پشتی ریدانێن شازدێ ئوکتوبەرێ کەفتیە رەوشەک خراب دا و ھەلویستێ وێ ل بەر نەبونا کودەنگیا ئالیێن کوردستانی وەکریە دەنگێ وێ دیف قەبارێ وێ نەھێتە گوھلێ بون. چەندین کریزێن مەزن ھەنە فەرە ب ستراتیجەک نوی کار بو چارەسەرکرنا وان بێتە کرن.
(١)
کوردستان پشتی بیست و شەش سال ژ حوکمرانیا خومالی ھەتا نھا خوەدیێ چەندین کریزێن مەزنە و ئەڤ کریزە ب ھیچ ئاوایەکێ نابیت ب مینن و ئەڤ رەوشا ئەڤرو گەل و حکومەتا کوردستانێ تێدا وێ راستیێ دیار دکەن کو ئیدی نابیت درێژە ب ئەقلیەتەکا حوکمی بێتە دا کو کریزان دروستدکەت و پەردەپوش دکەت . پشتی خیانەتا شازدێ ئوکتوبەرێ ئالوزی کویرتر بون ناڤبەرا ئالیێن سیاسی و ھەتا رادەکێ حکومەتا بەغدا دڤیا ب رێککەفتنێن بنڤەی و ڤەشارتی وەکی ئەوا کەرکوک رادەستکری ل گەل چەند گروپێن تایبەت بکەت و ئیدی سەرەدەریێ ل گەل پارێزگەھێن باکورێ عیراقێ بکەت نەک کوردستانێ! بەلێ سوپاس بو خودێ کو ئەو پیلان ب سەرنەکەفت . د نھا دا ڤەگەراندنا ئێمناھی و باوەری و ئێکرێزی و خوشکرنا ژین و ژیارا خەلکی و بەردەوامی دان ب چاکسازیێ و گوھدان ب دەنگێن جودا و دووبارە نەکرنا شاشیێن رابوریی..فەرە ژ کارێن سەرەکیێن حکومەتا ھەرێما کوردستانێ بن ب سەروکاتیا نێچیرڤان بارزانی کو ھەتا نھا ب باشی دەست ب گەرەکا دانوستاندنا کریە و فەرە ل ھەر پێنگاڤەکا چارەنڤیس ساز ل ئێک دەنگیا ئالیان بگەرێت بو ھندێ ب ئێکرێزیا کوردستانیان ڤێ قوناغێ دەرباز بکەن. و ئەڤ پێکولە نەیا ب ساناھیە ل قوناغەک و رەوشەکا بڤی ئاوایە و ل ڤان ناکوکیێن توند بەلێ ب ھاریکاریا راگەھاندن و خوەدی قەلەم و رێکخراوێن جڤاکێ سڤیل و پارتێن سیاسی و کارکرنا حکومەتێ ب جدی و کومبون ل دوور تێگەھێ کوردستانی بونێ ل جھێ بەرژەوەندیێن حزبی و شەخسی , دێ شیاننان چەند بارەکەت و ئاریشان سڤککەت و چارەسەریێ نیزیک کەتن.
(٢)
گەلێ کورد ب درێژاھیا دیروکێ گەلەکێ ئاشتی خواز بویە و ھەردەم دووپاتی ل سەر دانوستان و ئاشتی و دیرکەفتن ل شەری کریە و زور جاران سەرکردێن کوردان بو سەرئێخستنا دانوستاندنا ژیانا خوە ئێخستیە مەترسیی و باوەری ب سوزێن بێ بنەمایێن داگیرکەرێن کوردستانێ ژی کریە بو پاراستنا گیانێ کوردستانیان و سەرکەفتنا ئاشتیێ. پشتی ئاڤاکرنا عیراقا نوی ل سالا ٢٠٠٣ و دانانا دەستور و سیستەمێ فیدرالی گەلێ کورد ل ھزرا ژیانەکا سیاسی ئارام بو و ھوسا ھزر دکر ئیدی بەغدا ئارتێشێ بەرەف باکوری بو شەری ناھنێریت و دەستور دێ بیتە دادڤان , بەلێ ئاقلیەتا سەرکردێن عیراقێ ھەمان ئەقلیەتە و ھەمان پێنگاڤا سەرکردێن بەرێ یێن عیراقێ ژ ئالیێ عەبادی ڤە ھاتە ھاڤێتن. ل دەمەکێ دا کو حکومەتا ھەرێما کوردستانێ بو دەمێ چاردە سالە بەردەوام داخازا دیالوگێ دکەت و کار دکەت کو دەستورێ عیراقێ جێ بەجێ بیت , بەلێ بەغدا ل خو بھێزکرنێ دگەریا و نھا ب پشتەڤانیا میلیشیاتێن وەلاتێن شیعە مەزھەب و بێدەنگیا ئەمریکا و ئەوروپا و خیانەتا گروپەکێ ھەرزەکارێن سیاسی ل کوردستانێ شیا واقعەکێ نوی دروست بکەت و کو ب ھیچ ئاوایەکێ جھێ قەبیلکرنێ نینە و دەمکی یە . بو دانوستاندنێ فەرە حکومەتا ھەرێما کوردستانێ کودەنگیا ئالیێن سیاسی بدەست بینیت و ئەجیندایەک روون و ئاشکرا و وەفدەک ژ سیاسی و پسپورێن لێھاتی بو ڤێ مەرەمێ دیار بکەت .
(٣)
دیارکرنا دەمێ ھەلبژاردنا
رێکخستنا ناڤ مالا کوردی و دەستپێکرنا دانوستاندنا ب پروژەکێ کوردستانی و دیر ژ بەرژەوەندیێن کەسی و حزبی دوو گاڤێن مەزنن بو باشتر کرنا رەوشا خەلکی و ڤەگەراندنەڤا باوەریێ و بھێزکەفتنەڤا ھەرێما کوردستانێ . دمینیت دیارکرنا روژا ھەلبژاردنان کو خواستەکا ھەمی ئالیێن سیاسیە بو ئەداکرنا مافەکێ سیاسی و یاسای و دەستوری. حکومەتا ھەرێما کوردستانێ بو چەندین جارە پێگیربونا خوە ب دیارکرنا روژا ھەلبژاردنان دیاردکەت و مافەکێ گشتی یە . ھەر بو ڤێ مەرەمێ ژی دروستکرنەڤا حکومەتەکا کاتی رەد دکەت وەکی سەروکێ حکومەتێ راگەھاندنی (ئەڤ حکومەتە ب خو یا کاتی یە ) واتا ئەڤ چەند ھەیڤەنە و ئەو پێنگاڤێن مە ئاماژە پێدای ل کارێن سەرەکی یێن حکومەتێ نە .
کورت و کورمانج ئەگەر کوردستانیان بڤێت ب ھەمی دەنگ و رەنگان ڤە, ئەڤ دەستکەفتیە بمینن و ب تەمامی ل دەست نەچن , فەرەئێک رێز و ئێک گوتار بن و پشتەڤانیا حکومەتا ھەرێما کوردستانێ بکەن کو چەندین وەلاتێن مەزنێن دونیایێ دوپاتی ل سەر پشتەڤانیا حکومەتا کوردستانێ کریە . ھەروەسا ب پروژەک کوردستانی بو دانوستاندنان بچنە بەغدا و دیڤدا بو پتر خزمەتکرنا کوردستانیان ھەلبژاردنەکا پاکژ و دیر تەزویرێ ئەنجام بدەن .