ئەو رەوشا نھا ل کوردستانێ تایبەتی ل دەڤەرێن کوردستانی و باژێرێ کەرکوکێ و عیراقێ دروست بوی , داویا جیھانێ نینە و دەستپێکەکە بو گوھرینێن مەزنتر و ئەڤ رەوشە ژی دەمکی و ھێدی ھێدی ئەوێن دەست بو ڤێ روژێ خەن دکری پەشیمانن و نزانن دێ چاوا چەرمێ دەستێن خوە گوھرن.
پرانیا شروڤێن سیاسی بو ھندێ دچن کو دەم ھاتیە ئەو رێککەفتنامێن ل دەستپێکا سەد سالیا بیستێ ل سەر دەڤەرا روژھەلاتا ناڤین ھاتینە کرن تایبەت (سایکس - بیکو ل سالا ١٩١٦) , کو دەڤەر دیف بەرژەوەندیا خوە پارڤەکر بو , دێ ئەو نەخشە ئێتە گوھرین . ژ بەرکو نھا رەوشا روژھەلاتا ناڤین زور خراب بویە و ژینگەھەک پری کەرب و کین و شەر و کوشتن بلاڤبویە , ھەروەسا وەلاتێن سەردەستێن جیھانێ ل دەڤەرێ پری لڤینێن سەربازی بویە , و بلوکێ (شیعی - سوننی ) ل مەزنترین رکەبەری دانە و پەیوەندیێن وان ل خرابترین ئاست دانە پشتی ریدانێن یەمەن و لوبنان .
- دووبارە ل بابەتێ خوە بزڤیرن . پشتی ریدانێن (١٦ئوکتوبەرا ) خیانەتکار و پیلانەکا ھەرێمی و نێڤدەوەلەتی ل سەر کوردستانێ , کو مەرەما وان یا سەرەکی ئەوبویە کو کیانێ ھەرێما کوردستانێ نەھێلن بەلێ سوپاس بو خودێ ب ڤێ مەرەمێ نەگەھشتن و زیترین دەم دێ بەلانسێ ھێزێ ئێتە گوھرین . بەلێ ئەڤ خیانەتێ ژی ب ھێچ رەنگەکێ نابیت بێتە بیرکرن و فەرە ھزاران لاپەرە پێ بێنە نڤیسین و ببیتە پروگرامێ خاندنێ ل ھەمی ھەرێمێ . بەلێ فەرە ل وێ چەندێ ژی بگەھین کو پرسا سەربەخویا کوردستانێ ب ھزار خیانەتا ل بیرا گەلێ کورد ناچیت .
- د نھا دا ئەو بریارێن کو حکومەتا عیراقا فیدرال بە سەروکاتیا عەبادی دەردکەتن , زور ب ئاوایەکێ دلرەقانەنە و ھیچ ل وان بریارا دیرتر نینە کو حکومەتا بورما دژی پێکھاتا بسلمان یا بناڤێ (روھینگا ) دەردکەت . بەلێ ئەگەر عەبادی بەس دیروکا نوت سالێن حوکمرانیا عیراقێ خاند بیت دێ باش زانیت کو ئەڤ چەندە بو وی و حکومەتا وی ناچیتە سەری و ب سەدان گروڤە ژی ھەنە و ل سەردەمێ شاھاتی ھەتا ب سەدامێ گور بگور دەرباز و رادەستی بەرێز عەبادی بویە .ئەمریکا کو گلوپێ کەسک بو قاسم سلێمانی و وان میلیشیاتا ھەلکر کو ناڤێن وان د لیستا تیرورێ دانە ھێرشێ سەر نیزیکترین ھەڤپەیمانێ وان بکەت کو کوردستانە ! نھا گەھشتیە وێ راستیێ کو نابیت ھەولێرەک بێھێز ھەبیت بەرامبەر بەغدایەکا بھێز ژبەرکو کورسکا بەغدا فێری وان تێگەھان نەبویە کو حکومەتا کوردستانێ ل سەر دچیت , ب ھەمی کێم و کورتیان ڤە ژی . ژ بەر ڤێ چەندێ داخازێ ژ ھەمی بەغدا دکەت ب زوترین دەم دەست ب دیالوگەکا جدی بکەن ل گەل ھەولێرێ .
- بدیتنا من حەیدەر عەبادی ل گەل دەسپێکرنەڤا دانوستاندنایە ل گەل کوردستانێ , بەلێ ژ بەر چەند ئەگەرەکان کو ل سەری دا ئیرانە دڤێت رەوش ب ڤی ئاوای بمینیت ھەروەسا نیزیک بونا ھەلبژاردنان کەشەک باش بو عەبادی دروستکریە تایبەت بەرامبەر مەزنترین ھەڤرکێ خوە کو نوری مالکی . ھەروەسا عەبادی د نھا دا ترسا کارڤەدانێن میلیشیاتێن حەشدێ نەشێت دەرگەھێ دیالوگەک جدی ڤە بکە .
- باشترین دەرفەت بو عەبادی و حکومەتا عیراقێ ئەوە کو دانوستاندنان ب جدی دەست پێبکەن و ئەو پروپاگندا دکەن ل سەر جێ بەجێ کرنا دەستوری بکەنە واقع و تایبەت پشتی رونکرنا حکومەتا ھەرێمێ ل سەر ماددێ ئێکێ دەستورێ عیراقێ , بەلێ عیراقێ نیزیکی (٦٠) ماددێن دەستوری جێ بەجێ نەکرنە و ئەڤ چەندە ژی بەغدا ل دیالوگەکا جدی و سەر بنیاتێ دەستوری دیر دکەت .
ل داویێ دا فەرە ھەمی ئالیێن کوردستانی باش ل مەترسیا ڤێ سەروبەری تێبگەھن و ل بەرژەوەندیا حزبی دیر بکەڤن و دەست ب کوردینێ بکەن و زێدەتر برینێن بنەمالێن شەھیدان ب نەئێکرێزیی نەکەلینن. ھەروەسا نھا کو حکومەتا ھەرێما کوردستانێ ب سەروکاتیا بەرێز نێچیرڤان بارزانی پشتەڤانیەک باش ل دەرڤە ھەیە و داخاز ژی ژ ئالیێن کوردستانی کریە پشتەڤانیا حکومەتا کوردستانێ بکەن . و سەروکێ حکومەتێ ژی دەست ب گەرەکا سەرەدانا کریە بو پتر دەستڤەئینانا پالپشتیا ئالێن سیاسی بو دەبازکرنا ڤێ قوناغێ وەکی سەروکێ حکومەتێ ئیشارەت پێدای (تنێ ب ئێکرێزیا مە دێ ڤێ قوناغێ دەرباز کەین) . ھەروەسا ئەڤ ریدانە فەرە ببیتە مەزنترین دەرفەت کو چاکسازیەک بەردەوام بکەین و ببینە ئێک دەنگ و ئێک رەنگ و بەردەوامیێ ب خەونا سەربەخویێ بدەین . بێ ھیڤی نەبین ل ڤان ریدانان .