گەلێ کورد ل سەر ئاخا خوە کو کوردستانە ب درێژاھیا دیروکێ ریبریێ چەندین کارەسات و جینوساید و فەرمانان بویە . وەک روون و ئاشکرا ھەمی ئەڤ بێ ویژدانیە ژ ئالیێ وان وەلاتان ھاتینە ئەنجامدان کو کوردستان ب دارێ کوتەکیێ ب چارچەک ل خوە ھژمارتیە . کوردستان وەک باغچەک ژ پێکھاتێن ئولی و مەزھەبی و نەتەوەی , دەرفەتەک زێدەتر دایە دوژمنێن کوردان کو ل بن چەندین ناڤێن جودا جودا کوردا قەتل و عام بکەن . کوردێن ئێزدی وەک ئێک ژ پێکھاتەک گرنگ نەتەوا کورد و خوەدی ئولێ خوەیێ تایبەت بەردەوام ل سەر ئول و نەتەوا خوە ھاتینە سزادان و جینوساید کرن وەک دیار کاراسەتا ڤێ داویێ فەرمانا حەفتێ و چارێ بو .
داوی جینوساید ل (٣ - ٨ - ٢٠١٤ ) بو کو تیرورستێن داعشی ب ھێرشەکا ھوڤانە ھێرشی سەر شنگالێ کر و , دیر ژ ھەمی یاسا و رێسا و ئەخلاق و سلوک و دیانەت و رەوشت و ئینسانیەتێ ب سەدان ژ کوردێن ئێزدی بونە قوربانی و ب ھزاران ژی کەفتنە دەستێ تیرورستێن چەپەل و کرین و فروتن پێ ھاتە کرن ! ب فەتوایا چەند (سفھاء الاحلام , حدساء الاسنان ) و شەلاتیێن قەوقازی و خەلیجی و مەغربی و ئەفغانی و ئەوروپی .
وەک روون و ئاشکرایە وەکی سەروکێ حکومەتا ھەرێما کوردستانێ ژی ئاماژە پێکری کو حکومەتا عیراقێ نەشیا کوردان بپارێزیت و ل حوزیرانا ٢٠١٤ پتر ژ (١٠٤) ھزار سەرباز ل موسل ھەبون ھەمیان ب چەند دەمژمێرا چەکێن خوە ھاڤێتن و جلکێن سەربازی ژی دانان و رەڤین و بارێ گران کەفتە سەر ملێن پێشمەرگەیێ کوردستانێ ل دەمەکێ دا کو چەکێ پێشمەرگەی نەیێ پێشکەفتی بو و نە د ئاستێ شەرێ دەولەتەکا تیرورستی دا بو.
پشتی کەفتنا شنگالێ حکومەتا ھەرێما کوردستانێ ب پلانەکا توکمە و رێکخستی پلان بو رزگارکرنا شنگالێ و ئازادکرنا کچ و ژنێن کوردێن ئیزدی و ئاڤاکرنا شنگالێ و ڤەگەراندنا تابلویێ پێکڤە ژیانێ وەکێ سەروکێ حکومەتێ دووپاتی ل سەر پاراستنا وی تابلویێ پێکڤە ژیانێ کر ل شنگالێ . ل کارێن ھەرە سەرەکیێ ێن نڤیسنگەھا سەروکێ حکومەتا ھەرێما کوردستانێ نێچیرڤان بارزانی ڤەکرنا نڤیسینگەھا کاروبارێن رزگارکرنا ئێزدیێن دەستێ داعشێ دا بو . ھەتا نھا وەک ئەرکەکێ نەتەوەی و نیشتیمانی ڤێ نڤیسینگەھێ شیایە ل سەرجەمێ ( ٦٤١٧ ) کەسان کو ل وانا (٣٥٤٧ ) ژ رەگەزێ مێ و (٢٨٧٠) ژ رەگەزێ نێر بون . ل سەرجەمێ ڤان گرتی و رەڤاندیێن ئێزدی ل دەستێ داعشێ دا ھەتا نھا (٣٠٩٢) ھاتینە رزگار کرن , (١١٠٢) ژن و ( ٣٣٥) زەلام و ( ٨٤٨ ) زارویێن کچ و ( ٨٠٧) زارویێن کور . پشتی ڤان ھەولێن بەردەوامێن کو ھاتینە ھاڤێتن بو دەمێ سێ سالایە ژ ئالیێ سەروکێ حکومەتی َ وەک قورتارکەرێ قوربانیێن دەستێ داعشێ و خوەدیێ پروژێ دووبارە ئاڤاکرنا شنگالێ . بەلێ مخابنی ھەتا نھا (٣٣٢٥) ژن و زەلام و کور و کچێن ئێزدی ل دەستێ داعش دا ماینە دیف وان ئامارێن رێڤەبەریا کاروبارێن ئێزدیا ل وەزارەتا ئەوقافێ ھاتینە بلاڤ کرن .
رەنگە پرسەک بێتە کرن بوچی حکومەتا ھەرێما کوردستانێ قورتارکەرێ شنگالێ و شنگالی یا بویە ؟

• ل سەرجەمێ پتر ژ شەش ھزار گرتی و رەڤاندیێن ئێزدی , ژ بلی حکومەتا ھەرێما کوردستانێ پتر ژ نیڤا ڤێ ھژمارێ رزگارکرینە , کی ئالیێ دی ئەڤ پرسە کریە ئەولەویەتا کارێ خو ؟ .
• گرنگە پرس ژ حکومەتا بەغدا بێتە کرن بوچی وە چ بو ئێزدیا نەکر , کو چو نەما ب سەری نەھاتی .
• ئەو ئالیێن خوەدیێ ھێزێن نە نیزامی ژ پەکەکێ و حەشدا شەعبی فەرە باش بزانن کو گورەپانا کارکرنا وان دوو وەلاتێن جودانە ئێک عیراقەکا تائیفی و ئێک ژی تورکیایەکا شوڤینی .
• بەردەوام حکومەتا ھەرێما کوردستانێ کار کریە و چ ژێ ھاتیە ھەتا نھا تەخسیر نەکریە بو ڤەگەراندنا ژیانێ بو شنگالێ و نێچیرڤان بارزانی ل داویی گوتارا خوە دا دووپاتی ل سەر ھندێ کر چ ژ دەستی بێت بو شنگالێ و کچ و ژنێن ئێزدی دێ دکەن .
• ناساندنا پرسا جینوسایدا ئێزدییان ژ کارێن ھەرە سەرەکی یێن حکومەتا ھەرێما کوردستانێ بویە . ل جھێ ھندێ ھندەک ھێزان گوندەک دگرت و دەولەتەک تێدا ئاڤا دکر؟! حکومەتا کوردستانێ بەرەڤانی ژ پرسا شنگالێ دکر و پتر ژ (٦٠٠) پێشمەگەریان ب شەھید دان بو ھندێ شنگال رزگار بیت و ب دەنگێ خەلکێ وێ پرسا وێ ئێک ئالیێ ببیت .
• بەردەوام حکومەتا ھەرێما کوردستانێ دووپاتی ل سەر قەرەبو کرنا خەلکێ شنگالێ کریە و ھەتا نھا ژی باشترین خزمەت پێشکێشی ئاوارێن شنگالێ ھاتیە کرن .
• شەخسێ سەروکێ حکومەتا ھەرێما کوردستانێ دووپاتی ل سەر ھندێ کریە کو دێ ھەمی پێکولا کەن کو شنگال ببیتە پارێزگەھەک سەربەخو سەر ب ھەرێما کوردستانێ ڤە .
• ئاڤاکرنا فەرماندەییا شنگال بو ھندێ ببیتە پارێزەرێ سەر و مالێ خەلکێ دەڤەرێ ل پێنگاڤێن ھەرە گرنگ بویە , بو قورتالکرنا شنگالی یا .